Génesis 19:1-38
-
Chaʼtul chʼul-abatetik ya yulaʼtayik te Lot (1-11)
-
Te Lot sok te sfamilia albotik te yakuk x-anik bael (12-22)
-
La yichʼik lajinel te Sodoma sok te Gomorra (23-29)
-
Te yinam te Lot kʼatpʼuj ta balal atsʼam (26)
-
-
Te Lot sok te yantsil nichʼnab (30-38)
-
Te bitʼil chiknaj stsʼumbal te Moab sok te Ammón (37, 38)
-
19 Kʼalal malix kʼajkʼal-ae, kʼotik ta Sodoma te chaʼtul chʼul-abatetike, te Lot nakal ta yochibal te mukʼul lum. Te kʼalal la yil te kʼotike, te Lot bajt sta talel sok la spajkan sba kʼalal ta lum.
2 Jich la yaltiklanbey: «Awokoluk, kajwal, konik ta sna te j-abat awuʼun. Jilanik ta wayel tey-a te ajkʼabal ini sok ya kakʼ te ya spokbeyex te awokike. Te pajel ya xjuʼ te sabto ya xjajchex yuʼun ya xbaex». Jich la yalik: «Maʼuk, wokolawal, ya xjilotik ta wayel ta plaza».*
3 Pero, te bitʼil maba la skom sba ta yaltiklanbeyel, jich bajtik ta sna. Ta patil la schajpan jun lekil weʼelil sok la spas pan te maba yichʼoj levadura, jich weʼik.
4 Te kʼalal mato xbajtik ta wayel-ae, spisil te winiketik —ta chʼin keremetik kʼalalto ta mamaletik— ta lum Sodoma tal sjoytayik te nae.
5 Jajch yawtayik te Lot sok jich la yalbeyik: «¿Banti ay te winiketik te ochik tal ta ana ta ajkʼabal ini? ¡Lokʼesa tal yuʼun ya jokintik ta wayel!».
6 Te Lot lokʼ bael ta yochibal te na, pero la smak jilel te tiʼnaile.
7 Tey-abi, jich la yaltiklanbey: «Awokoluk, kermanotak, ma xa apasik te bin kʼax chopole.*
8 Ilawilik, ay chaʼtul kantsil nichʼnab te maba tabilik ta winike. Awokoluk, ya kikʼbeyex tal lokʼel ta fuera yuʼun ya apasbeyik te bin ya skʼan awoʼtanike. Pero mame ayuk bin xa apasbeyik te winiketik ini, melel tal sleik kanantayel liʼ ta jna».
9 Pero, jich la yalik: «¡Lokʼan teye!». Sok jich la yalikxan: «Te jyanlum te stukel tal ta nainel liʼi, ¿yuʼunbal jaʼ juez te tal schajpanotik? Kʼax jich te bin chopol* ya jpasbatkotik te bitʼil te winiketik ini». Tey-abi la stsakik te Lot sok kʼan stʼomik ochel te nae.
10 Jich te winiketik te ayik ta yutil na la slokʼes skʼabik yuʼun ya snitik ochel ta yutil na te Lot sok la smakik te tiʼnaile.
11 Pero la yakʼik te ma xyilik kʼinal te winiketik —mukʼ bikʼit— te ayik ta yochibal na, jich lujbik ta sleel te tiʼnaile.
12 Tey-abi, te winiketik te ayik ta yutil na sok te Lot jich la yalik: «¿Aybal yan machʼa ay awuʼun liʼ ta mukʼul lume? ¡Tsoba sok lokʼesa bael liʼi te anialtak, te awal anichʼnab sok te awiniktak!
13 Yame jlajintik te lugar ini, melel kʼax tulanix te bin ya yichʼ alel ta swenta te ants winiketik te kʼoemix ta stojol te Jehová. Jaʼ yuʼun, te Jehová la stikunonkotik ta slajinel te mukʼul lum».
14 Te Lot bajt skʼopon te snialtak —te winiketik te kʼan nujpunukik sok te yantsil nichʼnab— jich la yaltiklanbey cheʼoxeb buelta: «¡Konik! ¡Lokʼanik bael ta lugar ini! ¡Te Jehová ya slajin te mukʼul lume!». Pero, te snialtak la skuyik te yak ta lote.
15 Te kʼalal yakix ta sakubel tal-a te kʼinale, te chʼul-abatetik la yalbeyik te Lot te yakuk suj sbaike, jich la yaltiklanbeyik: «¡Ananik bael! ¡Ikʼa bael te awinam sok te chaʼtul awantsil nichʼnab, yuʼun ma pajaluk ya awichʼik castigo sok te mukʼul lum ta swenta te smulike!».
16 Pero, te Lot yokelalxanix ma xlokʼ. Manchukme jich-abi, te Jehová la snaʼtiklanbey yoʼbolil sba, jaʼ yuʼun te winiketik la snitik lokʼel te Lot, te yinam sok te chaʼtul yantsil nichʼnab jich la yikʼtiklan lokʼel ta mukʼul lum.
17 Te kʼalal lokʼikix bael ta fuera yuʼun te mukʼul lum, te jtule jich la yal: «¡Lokʼan bael ta anel yuʼun ma xlajat! ¡Mame xa sut asit ta apat sok mame ayuk banti ya xtejkʼajat ta spamlej! ¡Baan ta anel ta witstikil yuʼun maba ya awichʼ lajinel!».
18 Pero, te Lot jich la yal: «¡Maʼuk, Jehová, awokoluk, ma xa atikunon tey-a!
19 Ya jnaʼ te lek awiloj te j-abat awuʼun ini sok te awakʼojbon kil bayal slekil awoʼtan* te bitʼil kuxulonto awuʼune. Pero ma xjuʼ kuʼun ya kaʼiy te ya xboon ta anel ta witstikil. Ya jxiʼ teme ay bin chopol* ya xkʼot ta jtojol sok te ya xlajone.
20 Ilawil, ay nopol* chʼin lum te banti ya xjuʼ ya xboon ta anele. Awokoluk, ¿yabal xjuʼ ya xboon tey-a? Ma jaʼuk jun mukʼul lum. Jichme ya xkolon-a».
21 Jich albot yuʼun: «Lek ay, ya kichʼxan ta wenta te bin la awalbone, maba ya jlajin te lum te ya awale.
22 ¡Suja aba! ¡Baan ta anel tey-a, melel maʼyuk bin ya xjuʼ ya jpas jaʼto teme kʼoate!». Jaʼ yuʼun la sbiilin Zóar* te lum-abi.
23 Lokʼemix tal kʼajkʼal-a te kʼalal kʼot ta skʼinal Zóar te Lot.
24 Tey-abi, te Jehová la yakʼ taluk kʼajkʼ sok azufre ta stojol te Sodoma sok te Gomorra. Jaʼ la yakʼ tal te Jehová ta chʼulchan.
25 Jich la slajin te mukʼul lumetik-abi. La yichʼ lajinel spisil te spamlej, jich bitʼil te yajwal te mukʼul lumetik sok spisil te jaʼmaletik.
26 Pero, te yinam te Lot te yak ta animal bael ta spat, la sut sit ta spat, jich kʼatpʼuj ta balal atsʼam.
27 Te Abrahán sabto jajch, bajt te banti la stejkʼan sba ta stojol te Jehová.
28 Kʼalal la yil te Sodoma sok te Gomorra sok spisil te spamlej, ay bin yan-nax la yil-a: ¡tey ta lumkʼinal xtomet yak ta lokʼel chʼail jich te bin-utʼil schʼailel jun horno!
29 Kʼalal te Dios la slajin te mukʼul lumetik ta spamlej, la yichʼ ta wenta te Abrahán. Jaʼ yuʼun la slokʼes te Lot ta mukʼul lumetik te banti yak ta nainel, melel ya yichʼ lajinel.
30 Ta patil, te Lot la xiʼ te ya xnain ta Zóar, jaʼ yuʼun bajt ta witstikil sok te chaʼtul yantsil nichʼnab. Tey nainik ta yutil chʼen sok te chaʼtul yantsil nichʼnab.
31 Te wixilal jich la yalbey te yijtsʼin: «Mamalix te jtatike, sok maʼyuk yan winik ta lum ini te ya xjuʼ ya jokintik ta wayel jich te bitʼil kʼayemik ta spasel te ants winiketik ta balumilal.
32 Kakʼbeytik yuchʼ vino te jtatik yuʼun ya xwayotik sok, jich ma xchʼay-a te stsʼumbale».
33 Jaʼ yuʼun, ta ajkʼabal-abi la syakubtesik sok vino te statike. Ta patil, te wixilal bajt sjokin ta wayel te state. Te Lot ma la snaʼ bin-ora jokinot ta wayel yuʼun te yantsil nichʼan ni jaʼuk te bin-ora jajch baele.
34 Ta yan kʼajkʼal, te wixilal jich la yalbey te yijtsʼine: «Te ajkʼabey, joʼon la jokin ta wayel te jtatike. Akʼa kakʼbeytikxan yuchʼ vino ta ajkʼabal ini yuʼun jaʼat ya ajokinix ta wayel. Jich ma xlaj-a te stsʼumbal te jtatike».
35 Jaʼ yuʼun, ta ajkʼabal-abi la schaʼyakubtesik sok vino te statike. Ta patil, te ijtsʼinal bajt sjokin ta wayel te state. Pero, te Lot ma la snaʼ bin-ora jokinot ta wayel yuʼun te yantsil nichʼan ni jaʼuk te bin-ora jajch baele.
36 Jich te chaʼtul achʼixetik la sta yalik ta swenta te Lot, te statike.
37 Te wixilal la yayintes* jtul kerem sok Moab la yakʼbey sbiilin. Jaʼme te tatil yuʼun te moabitaetik ta kʼajkʼal ini.
38 Jaʼnix jich, te ijtsʼinal la yayintes* jtul kerem sok Ben-Ammí la yakʼbey sbiilin. Jaʼme te tatil yuʼun te ammonitaetik ta kʼajkʼal ini.
Notaetik
^ Ta yantik variante «ma leke».
^ Ta yantik variante «ma lek».
^ O «skʼuxul awoʼtan te ma x-ijkitaywan».
^ Ta yantik variante «ma lek».
^ Ta yantik variante «tijil».
^ Te ya skʼan ya yal «chʼin».
^ Ta yantik variante «spʼejkajtes», «stojkes».
^ Ta yantik variante «spʼejkajtes», «stojkes».
