Génesis 24:1-67
24 Te Abrahán kʼax mamalix-a. Te Jehová la yakʼbey bendición ta swenta spisil te bintik la spase.
2 Ta jun buelta, te Abrahán ay bin la yalbey te j-abat yuʼun, te jaʼ ayxan yaʼbilal te bitʼil te yantik te ay ta snae, te swentainoj spisil te bintik ay yuʼun te Abrahán, jich la yalbey: «Awokoluk, akʼa te akʼab liʼ ta yeʼtal kaʼ.
3 Ya jkʼan te yakuk awalbon ta jamal ta stojol te Jehová te Dios yuʼun te chʼulchan sok te Dios yuʼun te balumilal, te maba ya alebey yinam te jnichʼan ta yolil te yantsil nichʼnab te cananeoetik te banti yakon ta nainele.
4 Te bin ya skʼan ya apase, jaʼ te ya xbaat ta jlumal yuʼun ya alebey yinam te jnichʼan Isaac ta yolil te machʼatik ay bin kutoj jba soke».
5 Pero, te j-abat jich la yal: «¿Bin ya jpasix-a teme maba la skʼan la sjokinon tal liʼi te achʼixe? ¿Yabal akʼan te ya kikʼ bael te anichʼan ta alumal te banti lokʼat tale?».
6 Te Abrahán jich la yal: «Mame ayuk bin-ora te ya awikʼ bael tey-a te jnichʼane.
7 Te Jehová te Dios yuʼun te chʼulchan la yikʼon lokʼel tal ta sna te jtat sok ta skʼinal te machʼatik ay bin kutoj jba soke. Jaʼnix jich la skʼoponon sok jich la yalbon ta jamal: ‹Ya kakʼbey te atsʼumbal te kʼinal ini›. Yame stikun jtul chʼul-abat swenta ya xnailaj bael awuʼun, jichme ya alebey tal yinam te jnichʼan ta lugar-abi.
8 Teme maba ya skʼan ya sjokinat tal te achʼixe, libreme ya xjilat ta swenta te bin la awalbon ta jamale. Pero mame xa awikʼ bael te jnichʼan tey-a».
9 Tey-abi, te j-abat la yakʼ te skʼab ta yeʼtal yaʼ te Abrahán, te yajwal, sok la yal ta jamal te ya skʼotes ta pasel spisil te bin albot yuʼune.
10 Jich yuʼun, te j-abat la schajpan lajunkojt camello te jaʼ yuʼun te yajwal, jich bajt ta slumal Nacor, ta Mesopotamia. Yichʼoj bael bayal ta chajp majtaniletik te jaʼ yuʼun te yajwale.
11 Te kʼalal kʼote, la yakʼ spajkan sbaik te camelloetik ta nopol* jun pozo te ay ta slokʼibal te mukʼul lume. Yakix ta malel kʼajkʼal-a sok jaʼ yorail-a te ya xlokʼ yichʼ yaʼalik te antsetike.
12 Jich la yal ta skʼoponel Dios te j-abat: «Jehová, te Dios yuʼun te kajwal Abrahán, awokoluk, lekukme ya xlokʼ kuʼun spisil te bin ya jpas yoʼtike. Akʼa ta ilel te skʼuxul awoʼtan te ma x-ijkitaywan ta stojol te kajwal Abrahán.
13 Nopol* ayon ta jun slokʼib jaʼ, sok yakik ta talel ta yichʼel bael jaʼ te yantsil nichʼnab te winiketik ta mukʼul lume.
14 Te achʼix te jich ya kalbey ‹Awokoluk, kojtesa te akʼib yuʼun ya kuchʼ jaʼ› sok teme jich ya yalbon ‹Ya xjuʼ awuchʼ jaʼ, jaʼnix jich ya xjuʼ ya kichʼbey tal jaʼ yuchʼ-euk te camelloetik awuʼun› teme xchie, jaʼukme te machʼa atsaoj ta stojol te awabat Isaac. Jaʼme jich ya awakʼbon jnaʼ te la awakʼ ta ilel te skʼuxul awoʼtan te ma x-ijkitaywan ta stojol te kajwale».
15 Te kʼalal mato xlaj yoʼtan ta skʼoponel Dios-a, lokʼ tal ta mukʼul lum jtul achʼix te Rebeca sbiil te skajanoj tal skʼib ta snejkʼel. Te Rebeca jaʼ yantsil nichʼan te Betuel; te Betuel jaʼ yal te Milcá, te yinam Nacor; te Nacor jaʼ sbankil te Abrahán.
16 Jaʼ jtul achʼix te kʼax tʼujbil sok te maba tabil ta winike. Ko bael ta slokʼib jaʼ, la snojes te skʼib, jich sujt bael.
17 Te j-abat animalnax bajt ta stojol sok jich la yalbey: «Awokoluk, akʼbon kuchʼ jtebuk jaʼ te ay ta akʼibe».
18 Jich la yal te achʼix: «Uchʼa, kajwal». Oranax la skojtes te skʼib yuʼun ya yakʼbey yuchʼ te jaʼe.
19 Te kʼalal laj yoʼtan ta yakʼbeyel yuchʼ te jaʼe, jich la yalbey: «Jaʼnix jich ya jlokʼesbey tal jaʼ yuchʼ-euk te camelloetik awuʼun chikan jayeb ya skʼan ya yuchʼik».
20 Oranax la yakʼ jilel te jaʼ te banti ya yuchʼik jaʼ te chambalametik, animal bajt ta slokʼesel tal jaʼ ta pozo. Jich la spas bayal buelta swenta ya yakʼbey yuchʼ jaʼ spisil te camelloetike.
21 Te kʼalal jich yak ta kʼoel ta pasel, te j-abate yak ta yilel te bin yak ta spasel sok chamnax yoʼtan* yuʼun, la yal ta yoʼtan teme jaʼ Jehová te la yakʼ te lek kʼot ta lokʼel te bin tal yuʼune.
22 Kʼalal laj yoʼtan ta yuchʼel jaʼ te camelloetike, te j-abat la yakʼbey te achʼix jun chʼokowil niʼil te pasbil ta oro te olil siclo* yalal sok la yakʼbey cheb yual skʼab te pasbil ta oro te lajuneb siclo* yalal.
23 Jich la yalbey: «Awokoluk, albon kaʼiy, ¿machʼa yantsil nichʼanat? ¿Aybal jochol sna te atat yuʼun tey ya xkʼax kuʼunkotik te ajkʼabale?».
24 Jich la yal te achʼix: «Joʼon yantsil nichʼanon te Betuel, te yal te Milcá te la sta sok te Nacor».
25 Jich la yalxan: «Ay jochol te banti ya xkʼax awuʼunik te ajkʼabale. Jaʼnix jich ay ak sok bayal weʼelil yuʼun te chambalametike».
26 Tey-abi, te j-abat la skejan sba sok la snijan sba ta stojol te Jehová.
27 Ta patil, jich la yal: «Akʼa yichʼ albeyel yutsil skʼoplal te Jehová te Dios yuʼun te kajwal Abrahán, melel yakʼojbey yil te skʼuxul yoʼtan te ma x-ijkitaywan sok te jun yoʼtan ta stojole. Te Jehová la stojobteson tal kʼalalto ta sna te yermanotak te kajwale».
28 Te achʼix animalnax bajt yuʼun ya scholbey yaʼiy spisil te bin kʼot ta pasel te machʼatik ay ta sna te snane.*
29 Te Rebeca ay jtul sbankil* te Labán sbiil. Te Labán animalnax lokʼ bael ta yilel te j-abat te nopol* ay ta slokʼib jaʼ.
30 Te kʼalal la yil te schʼokowil sniʼ sok te yual skʼab te Rebeca, te yijtsʼine, sok te jich la yaʼiy te la yale «Jaʼ jich te bitʼil la yalbon te winike», bajt sta te j-abat te teyto ay sok te camelloetik yuʼun ta nopol* slokʼib jaʼ.
31 Te kʼalal kʼotnaxe, jich la yalbey: «Konik, jaʼat te awichʼoj te bendición yuʼun te Jehová. ¿Bin yuʼun te ayat-to ta fuerae? La kakʼix ta chajpanel te na sok te banti ya x-ayin te camelloetik awuʼun».
32 Jich och ta na te j-abate. La slokʼesbey* smontura te camelloetik, la yakʼtiklanbey ak sok weʼelil. Jaʼnix jich la yichʼbey bael jaʼ swenta ya spok yok te j-abat sok ya spok yokik te winiketik te jokinbil yuʼune.
33 Te kʼalal pajchanbot te sweʼele, te j-abat jich la yal: «Jaʼtome ya xweʼon te kʼalal kalojbeyexix-a te bin ya jkʼan ya kalbeyexe». Te Labán jich la yalbey: «Kʼopojan kaʼiytik».
34 Jich jajch ta kʼop: «Joʼon yabaton te Abrahán.
35 Te Jehová yakʼojbey bayal bendición te kajwal. Yakʼojbey bayal skʼulejal ta swenta tuminchijetik, wakaxetik, camelloetik, burroetik, plata, oro sok j-abatetik.
36 Te kʼalal meʼelix-a te Sara, te yinam te kajwal, la yakʼbey jtul snichʼan te kajwal sok jaʼ ya yakʼbey jilel spisil te bintik ay yuʼune.
37 Te kajwal la skʼan te ayuk bin ya kalbey ta jamal. Jich la yalbon: ‹Maba ya alebey yinam te jnichʼan ta yolil te yantsil nichʼnab te cananeoetik te banti yakon ta nainele.
38 Te bin ya skʼan ya apase, jaʼ te ya xbaat ta sna te jtat sok te banti ay te jfamilia yuʼun ya alebey yinam te jnichʼan›.
39 Pero, jich la kalbey te kajwal: ‹¿Bin ya jpasix-a teme maba la skʼan la sjokinon tal te achʼixe?›.
40 Tey-abi, jich la yalbon: ‹Te Jehová, te abatinemon ta stojol, ya stikun ta atojol jtul chʼul-abat yuʼun ya sjokinat sok ya yakʼ te lek ya xkʼot ta lokʼel te banti ya xbaat. Ya skʼan ya alebey yinam te jnichʼan te banti ay te jfamiliatak sok te sna te jtate.
41 Libreme ya xjilat ta swenta te bin la awalbon ta jamal teme maba ya yakʼbatik tal te achʼix te jfamilia te banti ya xbaate. Teme jich ya xkʼot ta pasele, libreme ya xjilat ta swenta te bin la awalbon ta jamale›.
42 »Jaʼ yuʼun, te kʼalal kʼoon ta slokʼib jaʼ te naxe, jich la jkʼopon te Diose: ‹Jehová, te Dios yuʼun te kajwal Abrahán, teme ya awakʼ te lek ya xkʼot ta lokʼel te bin talon yuʼune,
43 akʼa kʼotuk ta pasel te bin ya jkʼanbate. Nopol* ayon ta jun slokʼib jaʼ. Kʼalal ya xtal jtul achʼix ta slokʼesel jaʼ, jich ya kalbey: «Awokoluk, akʼbon kuchʼ jtebuk te yaʼlel akʼib».
44 Teme jich ya yalbon «Ya xjuʼ ya awuchʼ jaʼ, jaʼnix jich ya xjuʼ ya jlokʼesbey tal jaʼ yuchʼ-euk te camelloetik awuʼun», jaʼukme te achʼix te tsabil awuʼun, Jehová, te ya xkʼot ta yinam te snichʼan te kajwale›.
45 »Te kʼalal mato xlaj koʼtan skʼoponel Dios ta koʼtan-a, yakix ta lokʼel tal ta mukʼul lum te Rebeca te skajanoj skʼib ta snejkʼel. Ko bael ta slokʼib jaʼ ta slokʼesel jaʼ. Tey-abi, jich la kalbey: ‹Awokoluk, akʼbon jaʼ kuchʼ›.
46 Jich oranax la skojtes te skʼib te skajanoj ta snejkʼel sok jich la yalbon: ‹Uchʼa, jaʼnix jich ya xjuʼ ya kichʼbey tal jaʼ yuchʼ-euk te camelloetik awuʼun›. Jich la kuchʼ te jaʼ, jaʼnix jich la yichʼbey tal jaʼ yuchʼ te camelloetike.
47 Ta patil, jich la jojkʼoybey: ‹¿Machʼa yantsil nichʼanat?›. Jich la yal: ‹Joʼon yantsil nichʼanon te Betuel, te yal te Milcá te la sta sok te Nacor›. Tey-abi la kakʼbey te chʼokow ta sniʼ sok la kakʼbey te ualil ta snukʼ skʼab.
48 Ta patil la jkejan jba sok la jnijan jba ta stojol te Jehová, la kalbey yutsil skʼoplal te Jehová te Dios yuʼun te kajwal Abrahán, te jaʼ la stojobteson bael ta stojol te smam* te sbankil te kajwal yuʼun ya kikʼ bael ta stojol te snichʼane.
49 Jich yuʼun albonik kaʼiy teme ya akʼan awakʼik ta ilel skʼuxul awoʼtanik te ma x-ijkitaywan ta stojol te kajwal sok teme jun awoʼtanik ta stojole. Pero, teme ma xa akʼanike, jaʼnix jich albonik kaʼiy jichme ya jnaʼ te bin ya skʼan ya jpase».
50 Te Labán sok te Betuel jich la yalik: «Talem ta stojol te Jehová spisil ini. Jich yuʼun ma xjuʼ ya kalbatkotik teme lek o ma lekuke.
51 Liʼ ay te Rebeca. Ikʼa bael jiche, jaʼukme yinam ya xkʼot te snichʼan te awajwale, jich te bitʼil la yal te Jehová».
52 Te kʼalal jich la yaʼiy stojol te j-abat yuʼun te Abrahán, la spajkan sba kʼalal ta lum ta stojol te Jehová.
53 Te j-abat jajch slokʼes majtaniletik te pastiklanbil ta oro sok ta plata, jaʼnix jich la slokʼes kʼuʼul pakʼal, jich la yakʼbey te Rebeca. Soknix la yakʼbey lekil majtaniletik te sbankil* sok te snane.*
54 Ta patil, te j-abat sok te swiniktak te jokinbil yuʼun weʼ uchʼajik sok tey kʼax yuʼunik-a te ajkʼabale.
Kʼalal jajch ta sab te j-abat, jich la yal: «Akʼawonik sujtel ta stojol te kajwale».
55 Pero, te sbankil* sok te snan* jich la yalik: «Akʼa sjokinotikxan lajuneb kʼajkʼal te achʼixe. Ta patil ya xjuʼ ya xbajt».
56 Pero, te j-abat jich la yal: «Ma xa awakʼik te ya xjalajonxan, melel te Jehová yakʼoj te lek kʼot ta lokʼel te banti talone. Akʼawonik sujtel ta stojol te kajwale».
57 Ta swenta-abi, jich la yalik: «Kikʼtik tal te achʼixe, kaʼiytik stojol te bin ya yale».
58 Tey-abi la yikʼik tal te Rebeca sok jich la sjojkʼoybeyik: «¿Yabal akʼan ya xbaat sok te winik ini?». «Yak, ya jkʼan ya xboon», xchi te Rebecae.
59 Jich la yakʼik bael te Rebeca* sok te ants te chʼitesot yuʼun kʼalal ta yalalilto.*
60 La yakʼbeyik bendición sok jich la yalbeyik: «Rebeca, jaʼukme nanil* ya xkʼoat yuʼun bayal ta millón ta tul sok te yakuk yuʼunin te atsʼumbal te mukʼul lumetik te ya xkontrainotik yuʼune».
61 Jich la schajpan sbaik te Rebeca sok te j-abat antsetik yuʼun, moik ta camelloetik la stʼunik bael te j-abate. Jich te j-abat la yikʼ bael te Rebecae.
62 Te Isaac sujtemix tal-a ta Beer-Lahái-Roí, melel yak ta kuxinel ta skʼinal te Négueb.
63 Ta mal kʼajkʼal yak ta beel ta akiltik yuʼun ay bin yak ta snopilanel ta yoʼtan. Te kʼalal la stoy sit..., la yil te yak ta talel camelloetik.
64 Jaʼnix jich la stoy sit te Rebeca, la sta ta ilel te Isaac. Oranax ko ta scamello.
65 Jich la sjojkʼoybey te j-abat: «¿Machʼa-a te winik te yak ta beel tal ta akiltik ta jtojoltik?». «Jaʼme te kajwale», xchi te j-abat. Jich te Rebeca la smuk sit ta pakʼ.
66 Te j-abat la scholbey yaʼiy te Isaac spisil te bin la spase.
67 Ta patil, te Isaac la yikʼ ochel te Rebeca ta snailpakʼ te Sara, te snane.* Jich la yikʼ yinamin te Rebeca. Te Isaac kʼux la yaʼiy ta yoʼtan sok jich la sta smukʼul yoʼtan ta skaj te laj te snane.
Notaetik
^ Ta yantik variante «tijil».
^ Ta yantik variante «Tijil».
^ Ta yantik variante «chajpnax la yil».
^ Jaʼ 5.7 gramo. Ilawil ta apéndice, B14.
^ Jaʼ 114 gramo.
^ Ta yantik variante «smeʼe», «smamae».
^ Ta yantik variante «xiʼlel».
^ Ta yantik variante «tijil».
^ Ta yantik variante «tijil».
^ Jaʼniwan skʼoplal te Labán.
^ Ta yantik variante «Tijil».
^ Ta hebreo: «yantsil nichʼan».
^ Ta yantik variante «xiʼlel».
^ Ta yantik variante «smeʼe», «smamae».
^ Ta yantik variante «xiʼlel».
^ Ta yantik variante «smeʼ», «smama».
^ Ta hebreo: «te ay bin yutoj sbaik soke».
^ Jaʼ te ants te la schuʼuntes sok te jaʼix yabat.
^ Ta yantik variante «meʼil», «mamail».
^ Ta yantik variante «smeʼe», «smamae».
