Génesis 26:1-35
26 Tal yorail wiʼnal ta kʼinal, yanix wiʼnal-a te bitʼil kʼax ta skʼajkʼalel te Abrahán. Jaʼ yuʼun, te Isaac bajt ta Guerar te banti ay te Abimélec, te ajwalil yuʼun te filisteoetik.
2 Jich yuʼun, te Jehová chiknaj ta stojol te Isaac sok jich la yalbey: «Mame xkoat bael ta Egipto. Jilan ta nainel ta kʼinal te banti ya kalbate.
3 Nainan ta kʼinal ini jich bitʼil jyanlum, joʼon ya jokinatxan sok ya kakʼbat bendición. Yame kakʼbat spamal te kʼinal ini soknix ya kakʼbey-euk te atsʼumbale. Ya jkʼotes ta pasel te bin la kalbey ta jamal te atat Abrahán te kʼalal jich la kalbey:
4 ‹Ya kakʼ te ya xpʼol te atsʼumbal jich te bin-utʼil te ekʼetik ta chʼulchan sok ya kakʼbey spamal te kʼinal ini te atsʼumbale. Spisil te nacionetik ta balumilal yame staik bendición ta swenta te atsʼumbale›.
5 Jich ya jpas ta swenta te la yaʼiybon jkʼop te Abrahán sok te la schʼuun spasel te bin la kalbey, jaʼ te mantaliletik kuʼun sok spisil te leyetik kuʼune».
6 Jaʼ yuʼun, te Isaac jil ta nainel ta Guerar.
7 Kʼalal te winiketik ta lugar-abi ya sjojkʼoybeyik skʼoplal te Rebeca, te Isaac ya yaltiklanbey «Jaʼ kijtsʼin». Melel ya xiw ta yalel te jaʼ yiname. Te bitʼil kʼax tʼujbil ants te Rebeca, jich ya yal ta yoʼtan te Isaac: «Ya xjuʼ ya smilonik te winiketik liʼi ta swenta te Rebeca».
8 Jun tiempo ta patil, te Abimélec, te ajwalil yuʼun te filisteoetik, yak ta yilel lokʼel kʼinal ta ventana, la yil te Isaac te yak ta smeyel* te Rebeca, te yiname.
9 Te Abimélec la stikun ta ikʼel te Isaac sok jich la yalbey: «¡Jaʼ awinam! ¿Bin yuʼun te la awal te jaʼ awijtsʼine?». Te Isaac la yalbey: «Jaʼ ta skaj te la jxiʼ te ya kichʼ milel yuʼune».
10 Te Abimélec jich la yalbey: «Pero, ¿bin-a te la apasbotike? ¡Chikan machʼa juʼ la sjokin ta wayel te awinam te jich la awakʼ jta jmulkotik!».
11 Jaʼ yuʼun, te Abimélec jich la yalbey ta mantal spisil te lum: «¡Yame xlaj te machʼa ya yutsʼin* te winik ini sok te yinam!».
12 Te Isaac jajch ta tsʼunbajel tey-a. Ta jaʼbil-abi, 100 bueltaxan la stsobey sit te bitʼil la stsʼune, melel yak ta akʼbeyel bendición yuʼun-a te Jehová.
13 Bayal pʼol te bintik ay yuʼun te Isaac, jich kʼot ta jkʼulej winik.
14 La sta bayal ta kojt tuminchijetik, bayal ta kojt wakaxetik sok kʼax bayal ta tul j-abatetik. Pero, te filisteoetik tal sbikʼtal yoʼtanik ta stojol.
15 Jaʼ yuʼun, te filisteoetik la sbutʼik ta lum te pozoetik te la sjokʼik te j-abatetik yuʼun te Abrahán te kʼalal kuxulto-ae.
16 Jich yuʼun, te Abimélec la yalbey te Isaac: «Lokʼan bael liʼi, namalto* baan ta nainel, melel jaʼ bayalxan awip te bitʼil te joʼonkotike».
17 Ta swenta-abi lokʼ bael tey-a te Isaac, bajt spas scampamento ta spamlej yuʼun Guerar sok tey nain-a.
18 Te Isaac la schaʼjokʼ te pozoetik te la yichʼ jokʼel te kʼalal kuxulto-a te Abrahán, te stat, pero te la sbutʼik te filisteoetik te kʼalal lajemix-a te Abrahán. Jich la yakʼbey sbiil te pozoetik te bitʼilnix sbiil yakʼojbey-a te state.
19 Kʼalal te j-abatetik yuʼun te Isaac yakik ta sjokʼel lum ta spamlej, la staik slokʼib jaʼ te lek ta uchʼele.
20 Pero, te jkanantuminchijetik ta Guerar jajch stsak sbaik ta kʼop sok te jkanantuminchijetik yuʼun te Isaac, jich la yalik: «¡Jaʼ kuʼunkotik te jaʼe!». Jaʼ yuʼun, te Isaac la yakʼbey sbiilin Ésec* te pozo-abi, melel la yichʼ kontrainel yuʼun.
21 Jajch sjokʼik yan pozo, pero jaʼnix jich jajch stsak sbaik ta kʼop yuʼun. Jaʼ yuʼun, Sitná* la yakʼbey sbiilin te pozo.
22 Ta patil lokʼ bael tey-a, la sjokʼ yan pozo, pero maba la stsak sbaikix ta kʼop yuʼun. Jaʼ yuʼun, Rehobot* la yakʼbey sbiilin te pozo sok jich la yal: «Jaʼ wokolayal te Jehová te yakʼojbotik mukʼul kʼinal sok bayalotikix liʼ ta kʼinal».
23 Tey-abi lokʼ bael tey-a, mo bael ta Beer-Seba.
24 Ta ajkʼabal-abi, te Jehová chiknaj ta stojol te Isaac sok jich albot yuʼun: «Joʼon Dioson yuʼun te atat Abrahán. Mame xiwat, melel joʼon jokinojat. Ya kakʼbat bendición sok ya kakʼ te kʼax bayal ya xkʼot te atsʼumbal ta swenta te kabat Abrahán».
25 Jaʼ yuʼun, te Isaac tey la spas skajtajib chikʼbil majtanil-a sok jajch yalbey sbiil te Jehová. Tey la spas snailpakʼ-a, sok te j-abatetik yuʼun la sjokʼik jun pozo.
26 Ta patil, te Abimélec lokʼ bael ta Guerar, bajt yil te Isaac. Jokinbil bael yuʼun te Ahuzat, te machʼa ya x-albot yuʼun te bin ya spase, soknix te Ficol, te machʼa ya swentain te soldadoetik.
27 Te Isaac jich la sjojkʼoy: «¿Bin yuʼun te tal awilonik te bitʼil la apʼajonik sok te la atenonik lokʼel ta alumalike?».
28 Jich la yalik: «Kilojkotik ta jamal te sjokinojat te Jehová. Jaʼ yuʼun, jich la jnoptik te ya kalbatkotik: ‹Awokoluk, ayuk bin ya kalbey jbatik ta jamal. Ya jkʼan ya jpastik te chapbilkʼop ini sok te jaʼate:
29 mame ayuk bin chopol* xa apasbotik jich te bitʼil maʼyuk bin chopol la jpasbatkotik. Ayuk ta awoʼtan te lek la kiltikat ta spisil-ora sok te jun awoʼtan la kakʼatkotik lokʼel. Ta ora ini, jaʼ yakʼojbat bendición te Jehová›».
30 Jich yuʼun, te Isaac la schajpanbey jun lekil weʼelil, jich weʼ uchʼajik.
31 Ta yan kʼajkʼal, sabto jajchik sok la schaʼyalbey sbaik te chapbilkʼop la spasike. Tey-abi, te Isaac la yakʼtiklan bael, jich jun yoʼtan bajtik.
32 Ta kʼajkʼal-abi, te j-abatetik yuʼun Isaac ay bin tal yalbeyik ta swenta te pozo te la sjokʼike. Jich la yalbeyik: «¡La jtatik jaʼ!».
33 Jaʼ yuʼun, Sibá la yakʼbey sbiilin te pozo. Ta swenta-abi, Beer-Seba la sbiilin te mukʼul lum, jaʼto jich sbiil ta ora ini.
34 Kʼalal 40 yaʼbilal-a te Esaú, nujpun sok te Judit te yantsil nichʼan te Beerí, te hitita-winik, sok te Basemat te yantsil nichʼan te Elón, te hitita-winik.
35 Te antsetik-abi, bayal la yakʼbeyik smel yoʼtan te Isaac sok te Rebeca.
Notaetik
^ O «la yil bitʼil te Isaac yak ta yakʼbeyel yil skʼuxul yoʼtan».
^ Ta yantik variante «yilbajin».
^ Ta yantik variante «jakalto», «kʼubulto».
^ Te ya skʼan ya yal «ya stsak sbaik ta kʼop» o «ya skontrain sbaik».
^ Te ya skʼan ya yal «sleel mulil».
^ Te ya skʼan ya yal «mukʼul sjamalul kʼinal».
^ Ta yantik variante «ma lek».
