Génesis 34:1-31
34 Te Dina —te yantsil nichʼan te Jacob, te la sta sok te Lea— kʼayem te ya xbajt yulaʼtay te achʼixetik yuʼun te mukʼul lum-abi.
2 Ta jun buelta ilot yuʼun te Siquem, te snichʼan te Hamor te heveo-winik, te jaʼ jtul jolal yuʼun te lugar-abi. Jaʼ yuʼun la yikʼ bael ta wayel sok tey la stsak yutsʼin-a.
3 Te Siquem kʼaxto la smulan te Dina, te yantsil nichʼan te Jacob. Mero skʼanojix-a te achʼix te jich kʼan smonbey yoʼtan.
4 Ta patil, te Siquem jich la yalbey te Hamor, te state: «Kʼanbon te achʼix ini yuʼun ya xnujpunon sok».
5 Kʼalal la snaʼ stojol te Jacob te la yichʼ bolobtesbeyel skʼoplal te Dina yuʼun te Siquem, te snichʼnabe baemik ta skanantayel chambalametik ta akiltik. Jich te Jacob la sta ta nopel te maʼyuk bin ya yaltiklanbey jaʼto te kʼalal ya sujtik tale.
6 Ta patil, te stat te Siquem te jaʼ te Hamor bajt skʼopon te Jacob.
7 Pero, te snichʼnab te Jacob la snaʼik stojol, jaʼ yuʼun sujtik tal ta oranax. Kʼaxto ma lek la yaʼiy sbaik sok kʼax ilinik ta skaj te la yichʼ bolobtesbeyel skʼoplal te Israel yuʼun te Siquem, jich kʼot ta pasel kʼalal la sjokin ta wayel te yantsil nichʼan te Jacob, melel ma jichuk ya skʼan pasel.
8 Te Hamor jich la yaltiklanbey: «Te jnichʼan Siquem kʼaxto ya smulan te awantsil nichʼan. Awokoluk, akʼbeyaik yinamin.
9 Talel kʼaxel akʼa nujpunuk te kal nichʼnabtik, jich jun-nax familia ya xkʼootik. Akʼbotik te awantsil nichʼnabik sok ikʼaik te kantsil nichʼnabtike.
10 Ya xjuʼ ya xnainex liʼ te banti ayonkotik sok ya xjuʼ ya atuuntesik te jkʼinaltike. Jilanik, aʼiyaik chonbajel sok manbajel, sok jilanikix ta nainel liʼi».
11 Jich yuʼun, te Siquem jich la yalbey te stat sok te sbankiltak* te Dinae: «Swenta lek ya awilonik-a, ya kakʼbeyex chikan te bin ya akʼanbonike.
12 Ya xjuʼ ya akʼanbonik bayal stojol te achʼix sok bayal majtanil ta swenta. Chapalon yuʼun ya kakʼbeyex chikan te bin ya akʼanbonike. Pero akʼbonik kinamin te achʼixe, awokoluk».
13 Pero, te snichʼnab te Jacob la staik ta nopel te ya sloʼlayik te Siquem sok te Hamor, te state, melel te Siquem la sbolobtesbey skʼoplal te Dina, te yijtsʼinike.
14 Jaʼ yuʼun, jich la yalbeyik: «Ma xjuʼ te jich ya jpastike. Ma xjuʼ ya kakʼbeytik kijtsʼintik jtul winik te maba yichʼoj circuncisión,* melel jaʼ ya sbolobtes jkʼoplaltik.
15 Jaʼnaxme ya jchʼuunkotik spasel teme ya apasik ini: te ya apasbeyik circuncisión* spisil te winiketik ta alumalik jich te bin-utʼil pasbilotik circuncisión te joʼotike.
16 Tey-abi ya kakʼbeyexkotik te kantsil nichʼnabtik sok ya kikʼbeyexkotik te awantsil nichʼnabik. Jun-naxme ya xnainotik sok jun-nax lum ya xkʼootik.
17 Pero, teme maba ya achʼuunik spasel sok teme maba ya awichʼik circuncisión,* yame kikʼtik bael te kijtsʼinkotik, jichme ya xbootik».
18 Te Hamor sok te Siquem, te snichʼane, lek la yaʼiyik te bin albotik spasike.
19 Oranax la spas te kerem te bin albotike, melel kʼaxto smulanoj-a te yantsil nichʼan te Jacob. Te Siquem jaʼ te machʼa kʼax ichʼbilxan ta mukʼ ta stojol te yantik te machʼatik ayik ta sna te state.
20 Jaʼ yuʼun, te Hamor sok te Siquem bajtik te banti ay te yochibal te mukʼul lume sok jich la yaltiklanbeyik te winiketik yuʼun te lume:
21 «Te winiketik ini ya skʼanik te jun-nax koʼtantik ya xnainotik soke. Akʼa jilukik liʼ ta jkʼinaltik sok akʼa yaʼiyik chonbajel sok manbajel liʼi. Melel, mukʼ te jkʼinaltike. Ya xjuʼ ya kikʼbeykotik te yantsil nichʼnabik sok ya xjuʼ ya kakʼbeytik te kantsil nichʼnabtike.
22 Jaʼnax yuʼun ay bin la yalbotik te ya skʼan ya jpastike: te akʼa yichʼik circuncisión* spisil te winiketik kuʼuntik jich te bin-utʼil yichʼojik circuncisione. Jaʼnaxme jich ya schʼuunik te ya xjilik ta nainel sok te joʼotik, yuʼun jich jun-nax lum ya xkʼootik.
23 Jaʼme kuʼuntik ya xkʼot spisil te bintik ay yuʼunik, te skʼulejalik sok te chambalametik yuʼunik. Jich yuʼun, akʼa jpastik te bin ya skʼanbotik, yuʼun jich ya xjilik ta nainel sok te joʼotike».
24 Jaʼ yuʼun, spisil te machʼatik ya xlokʼik bael ta yochibal te mukʼul lume la schʼuunik spasel te bin albotik yuʼun te Hamor sok te Siquem, te snichʼane. Jich spisil te winiketik —spisil te machʼatik ya xlokʼik bael ta yochibal te mukʼul lum— la yichʼik circuncisión.*
25 Pero, ta yoxebal kʼajkʼal te kʼalal mato xlekub-a te yejchen te winiketik, te Simeón sok te Leví —te chaʼtul snichʼnab te Jacob sok te jaʼ sbankiltak* te Dina— bajtik ta mukʼul lum sok la yichʼik bael yespadaik ta jujuntul. Te kʼalal kʼotike, la smiltiklan spisil te winiketike, maba maliybil-a te jich ya xkʼot ta pasel.
26 La smilik ta espada te Hamor sok te Siquem, te snichʼane. Ta patil la slokʼesik tal te Dina ta sna te Siquem, jich bajtik.
27 Te kʼalal julik te yantik snichʼnab te Jacobe, la yilik te lajem spisil te winiketike. Jaʼ yuʼun och yelkʼanik te bintik ay ta mukʼul lum ta skaj te la sbolobtesbeyik skʼoplal te yijtsʼinike.
28 La yichʼbeyik bael te stuminchijik, swakaxik, sburroik sok spisil te bintik ay ta mukʼul lum sok ta skʼinalik.
29 Jaʼnix jich la yichʼbeyik bael spisil te bintik ay yuʼunik, la stsakik bael te alaletik yuʼunik, te antsetik yuʼunik sok la yelkʼanbeyik bael spisil te bintik ay ta snaike.
30 Te kʼalal la snaʼ stojol te Jacob, jich la yalbey te Simeón sok te Leví: «La awakʼbonik bayal jwokol. Jaʼ amulik te ya spʼajonik te yajwal te lum te jaʼik te cananeoetik sok te perizitaetik. Ma bayalotik te joʼotike. Yananix stsob sbaik tal ta skontrainbelonik-a sok ya smilonik soknix spisil te machʼa ay kuʼun ta jna».
31 Pero, te Simeón sok te Leví jich la yalik: «¿Yuʼunbal jaʼ lek te ya yichʼ ilel jich te bin-utʼil j-antsinel* ants te kijtsʼinkotike?».
Notaetik
^ Ta yantik variante «xiʼleltak».
^ Ta yantik variante «xiʼleltak».
^ Ta yantik variante «jmulawil».
