Génesis 37:1-36
37 Te Jacob nainxan ta skʼinal Canaán, tey te banti nain te stat jich bitʼil jyanlum.
2 Jaʼ jich te bin kʼax ta skuxlejal te Jacob:
Ayix 17 yaʼbilal-a te José, te snichʼane. Te kerem ya sjokin-a te yalatak te Bilhá sok te Zilpá, te yinamtak te stat ta skanantayel te tuminchijetike. Ta jun buelta te José la yalbey yaʼiy te stat te ay bin ma lek la spas te sbankiltake.
3 Te Israel jaʼ kʼux-xan ta yoʼtan te José te bitʼil te yantik snichʼnabe, melel mamalix-a te kʼalal ayin* te snichʼane, la yakʼbey ta pasel jlijkʼ tʼujbil snajtil kʼuʼ.
4 Kʼalal la yilik te sbankiltak te jaʼ kʼux-xan aʼiybil te José yuʼun te statike, jajch spʼajik yuʼun. Sok maba ta slekil yoʼtanik ya skʼoponikix-a.
5 Ta jun buelta, te José ay bin la swayichin sok la scholbey yaʼiy te sbankiltake, ta swenta-abi kʼaxtoxan la yichʼ pʼajel yuʼun.
6 Te José jich la yaltiklanbey: «Awokoluk, aʼiya awaʼiyik te bin la jwayichine.
7 Te kʼalal yakotik ta stomtiklanel* trigo ta jkʼinaltik, jajch te jtom trigo kuʼun, toj la stejkʼan sba. Ta patil, te trigo te tomtiklanbil awuʼunike la sjoytayik te kuʼun sok la snijan sbaik ta stojol».
8 Jich albot yuʼun te sbankiltak: «¿Yuʼunbal ya akʼan ya x-ochat ta ajwalil yuʼun ya awentainotik?». Ta swenta te bin la swayichin sok te bin la yal te José, kʼaxtoxan la yichʼ pʼajel yuʼun.
9 Ta patil, te José ayin yan swayich sok la scholbey yaʼiy te sbankiltake. Jich la yaltiklanbey: «Ayin yan jwayich. Pero, ta ora ini la snijan sbaik ta jtojol te kʼajkʼal, u sok 11 ekʼetik».
10 La scholbey yaʼiy te stat sok te sbankiltake. Jich yuʼun, utot yuʼun te stat sok jich albot yuʼun: «¿Bin ya skʼan ya yal te bin la awayichine? ¿Yuʼunbal ya jnijan jba kʼalal ta lum ta atojol te joʼon, te anan* sok te abankiltake?».
11 Te sbankiltak tal sbikʼtal yoʼtanik ta stojol te José, yan stukel te stat la snopilan jilel ta yoʼtan te bin cholbot yaʼiyike.
12 Ta jun buelta, te sbankiltak te José la yikʼik bael ta sweʼel ak te tuminchijetik yuʼun te statik ta nopol* Siquem.
13 Ta patil, te Israel jich la yalbey te José: «Te abankiltak baemik ta skanantayel te tuminchijetik ta nopol* Siquem. Laʼ, ya jkʼan ya jtikunat bael te banti ayike». Te José jich la yal: «¡Jichuk, ya xboon!».
14 Jich albot yuʼun te stat: «Awokoluk, baan, ilawil teme lek ayik te abankiltak sok ilawil bitʼil ayik te tuminchijetike, ta patil yame xtal awalbon te bin yilelike». Jich yuʼun lokʼ bael ta spamlej Hebrón, bajt ta Siquem.
15 Ta patil, kʼalal te José yak ta leaw, taot yuʼun jtul winik te jich jojkʼoybot: «¿Bin ya ale?».
16 Te José la yalbey: «Yakon ta sleel te jbankiltake. Awokoluk, albon kaʼiy, ¿banti ayik ta skanantayel te tuminchijetike?».
17 Jich albot yuʼun te winik: «Kʼejel bajtik. La kaʼiy te jich la yalik: ‹Konik ta Dotán›». Jich bajt te José, tey la statiklan te sbankiltak ta Dotán.
18 Pero, te kʼalal namalto* yak ta talel-a te José, ilot yuʼun te sbankiltak te jich jajch schapik te bitʼil ya smilike.
19 Jich jajch yalbey sbaik: «¡Ilawilik! Yak ta talel te jwayich winik.
20 Laʼik, jmiltik sok jchʼojtik ochel ta pozo. Ta patil ya kaltik te tiʼot yuʼun jkojt jtiʼawal chambalam. Ya kiltik bin ya xkʼot ta pasel sok te wayichiletik yuʼune».
21 Te kʼalal jich la yaʼiy stojol te Rubén, kʼan skoltay te José. Jich la yaltiklanbey te yijtsʼinab: «Ma jmiltik».
22 Te Rubén jich la yalxan: «Ma xa amalik chʼichʼ. Chʼojaik ochel ta pozo te ay ta jochol takin kʼinal, mame xa amilik». Melel snopoj te ya skʼan skoltay te José ta stojol te sbankiltak swenta ya yikʼ sujtel ta stojol te state.
23 Jich yuʼun, jaʼnax te kʼalal kʼot te José, te sbankiltak la slokʼesbeyik te tʼujbil snajtil kʼuʼ te slapoj-ae.
24 La stsakik sok la schʼojik ochel ta pozo. Ta yorail-abi, maʼyuk yaʼlel-a.
25 Ta patil la snajkan sbaik ta weʼel, tey-abi la stoy sitik, la staik ta ilel te yak ta talel bayal ta tsojb ants winiketik. Jaʼik ismaelitaetik te lokʼik tal ta Galaad yuʼun ya xkoik bael ta Egipto. Te scamelloik skuchojik tal ládano,* bálsamo sok spat teʼ te ay xuchʼile.
26 Jich yuʼun, te Judá jich la yal: «¿Bin ya xlokʼ kuʼuntik-a te ya jmiltik te kijtsʼintik sok te ya jmuk ta koʼtantike?
27 Jchontik bael ta stojol te ismaelitaetik, jich maʼyuk bin ya jpasbeytik-a te joʼotike, melel kijtsʼintiknix-a sok jun jchʼichʼeltik sok». Lek la yaʼiyik te yantike.
28 Jich yuʼun, te kʼalal kʼaxik tey-a te ismaelitaetik,* la slokʼesik tal ta pozo te Josee, jich la schonik sok te ismaelitaetik ta 20 ta sejp plata. Jich te winiketik-abi, la yikʼik bael te José ta Egipto.
29 Ta patil, kʼalal te Rubén bajt yan buelta ta pozo, la yil te maba tey ayix-a te José, la schʼiʼ* skʼuʼ yuʼun.
30 Tey-abi bajt te banti ay te yijtsʼinab, jich la yaltiklanbey ta aw: «¡Maba tey ayix-a te kereme! ¿Bin ya jpasix-abi?».
31 Jich yuʼun la smilik jkojt tat tentsun, la yichʼik tal te snajtil kʼuʼ te José sok la smulik ta chʼichʼ.
32 Ta patil la stikunik ta stojol te statik te tʼujbil najtil k’u’ul sok jich la yalbeyik: «La jtatik ini. Awokoluk, ilawil teme jaʼ te snajtil kʼuʼ te anichʼan o maʼuk».
33 Te kʼalal la yile, jich la yal ta aw: «¡Jaʼ te snajtil kʼuʼ te jnichʼane! ¡Milotniwan sok tiʼotniwan yuʼun jkojt jtiʼawal chambalam te Josee!».
34 Tey-abi, te Jacob la schʼiʼ* skʼuʼ sok la smey ta schʼujt chʼixal pakʼ.* Bayal kʼajkʼal la yokʼetay te snichʼane.
35 Spisil te skerem nichʼnab sok te yantsil nichʼnab kʼan smukʼubtesbeyik kʼinal yaʼiy, pero maba la skʼan. Jich ya yalulan-a: «Ya kokʼetay te jnichʼan jaʼto te kʼalal ya xkoon ta Mukenale».* Jich la yokʼetayxan te José.
36 Te ismaelitaetik la schonik te José ta Egipto, jaʼ la schonbeyik te Potifar, te jwolwanej yuʼun te jkananetik yuʼun te faraón sok te yichʼoj mukʼ yaʼtel ta stojol te ajwalile.
Notaetik
^ Ta yantik variante «pʼejkaj», «tojk».
^ Ta yantik variante «syomtiklanel».
^ Ta yantik variante «ameʼ», «amama».
^ Ta yantik variante «tijil».
^ Ta yantik variante «tijil».
^ Ta yantik variante «jakalto», «kʼubulto».
^ O «xuchʼil teʼ te sumetnax yikʼ».
^ O «jchonbajel madianitaetik».
^ Ta yantik variante «xetʼ».
^ Ta yantik variante «xetʼ».
