Génesis 4:1-26
4 Te Adán la sjokin ta wayel te Eva, jich la yikʼ yal ta schʼujt te yiname. Te kʼalal ayin* te Caín, jich la yal te Evae: «La yakʼbon jtul jkerem-al te Jehová».
2 Ta patil, te Eva la yayintes* te Abel te jaʼ yijtsʼin te Caín.
Te Abel kʼot ta jkanantuminchij, yan stukel te Caín la stsʼun sit awal tsʼunubil.
3 Te kʼalal kʼax te tiempoe, te Caín la yakʼbey ta majtanil te Jehová chaʼoxchajp sit te awal tsʼunubil yuʼune.
4 Yan stukel te Abel jaʼ la yakʼ chaʼoxkojt te sba yal te tuminchijetik yuʼun sok maba la slokʼesbey te sjujpʼele.* Te Jehová lek la yil te Abel sok te majtanil la yakʼe.
5 Yan stukel te Caín ma lek la yichʼ ilel ni jaʼuk te majtanil la yakʼe. Jaʼ yuʼun, te Caín bayal ilin sok yanaj sit yelaw yuʼun.
6 Te Jehová jich la yalbey te Caín: «¿Bin yuʼun te bayal ilinemat sok te yanajem asit awelawe?
7 Teme ya ajel te atalel sok te jaʼ ya apas te bin lek, ¿mabal lekuk ya kilat yan buelta? Pero, teme maba ya ajel te atalel sok teme ma jaʼuk ya apas te bin lek, te mulil yame skʼan ya xnain ta awoʼtan, melel ya skʼan ya yuʼuninat, ¿yabal xjuʼ awuʼun stsalel?».
8 Ta patil-abi, te Caín jich la yalbey te Abel te jaʼ te yijtsʼine: «Konik te banti ay te akiltik». Te kʼalal ayikix tey-ae, te Caín la stsak ta majel te yijtsʼin te jich la smil.
9 Ta patil, te Jehová jich la sjojkʼoybey te Caín: «¿Banti ay te awijtsʼin Abel?». Te Caín jich la yal: «Ma jnaʼ. ¿Yuʼunbal jaʼ jkanantaywanejon yuʼun?».
10 Jich la yal te Dios: «¿Bin-a te la apase? ¡Chʼama awaʼiy! Kʼalalto ta lumkʼinal yak yawtaybelon te schʼichʼel te awijtsʼine.
11 Ta ora ini yame xbolob akʼoplal sok yame awichʼ tenel lokʼel ta lumkʼinal te la yuchʼbey schʼichʼel te awijtsʼine, te jaʼatnix la amale».
12 Te kʼalal ya atsʼun te sit te awal tsʼunubil ta lumkʼinal, maba ya yakʼbat te site. Sok jichme ya xkʼoat te bin-utʼil te machʼa yak ta anel sok bayuk ya xbaat ta kuxinel ta balumilal.
13 Tey-abi, te Caín jich la yalbey te Jehová: «Kʼax mukʼ te castigo te la kichʼ yuʼun te jmule, jich ya kaʼiy te ma xjuʼ kuʼune.
14 Ta ora ini yak atenbelon lokʼel ta kʼinal sok maba ya akʼan te ya kilbatix te asite. Jich ya xkʼoon te bin-utʼil te machʼa yak ta anel sok te bayuk ya xboon ta kuxinel ta balumilal, chikan te machʼa ya staone yananix xbajt smilon-a».
15 Jaʼ yuʼun, te Jehová jich la yalbey: «Ta swenta-abi chikan te machʼa ya smil te Caín yame yichʼ akʼbeyel spakol jukeb buelta».
Jich te Jehová la yakʼ jun señail ta stojol te Caín, yuʼun jich chikan te machʼa ya xtaot yuʼune maba ya xmilot.
16 Tey-abi, te Caín lokʼ bael ta stojol te Jehová, bajt ta nainel ta skʼinal Nod* te ay ta stojol te banti ya xlokʼ tal te kʼajkʼal ta Edén.
17 Te Caín la sjokin ta wayel te yiname. Te ants la yikʼ yal ta schʼujt, jich ayin* te Enoc. Ta patil, te Caín jajch spas jun mukʼul lum sok la yakʼbey sbiilin Enoc jich bitʼil sbiil te snichʼane.
18 Te snichʼan Enoc jaʼ te Irad; te snichʼan te Irad jaʼ te Mehujael; te snichʼan Mehujael jaʼ te Metusael; te snichʼan Metusael jaʼ te Lamec.
19 Te Lamec cheb yinam la yikʼ. Te sbabiale Adá sbiil, te schebale Zilá sbiil.
20 Te Adá la yayintes* te Jabal. Jaʼ te machʼa sbabial kuxin ta nailpakʼ sok la schʼites chambalametik.
21 Te yijtsʼine Jubal sbiil. Jaʼ sbabial te machʼa la stij te arpa sok te amay.*
22 Yan stukel te Zilá jaʼ la yayintes* te Tubal-Caín te jaʼ yaʼtel spasel aʼtejibaletik te pasbil ta cobre sok ta hierro. Te swix* te Tubal-Caín, Naamá sbiil.
23 Te Lamec tal ta yoʼtan yalbeyel te kʼopetik ini te yinamtak jaʼik te Adá sok te Zilá:
«Aʼiya awaʼiyik jkʼop, yinamtak Lamec.Aʼiya awaʼiyik te bin ya kalbeyexe:
la jmil jtul winik te la yejchenteson,ta melel, la jmil jtul kerem te la smajone.
24 Teme jukeb buelta ya skʼan akʼbeyel spakol te machʼa ya smil te Caín,77 buelta ya skʼan akʼbeyel spakol te machʼa ya smil te Lamec».
25 Te Adán la schaʼjokin ta wayel te yiname, jich te Eva la yayintes* jtul kerem te Set la yakʼbey sbiilin, melel la yal: «Te Dios la yakʼbon yan kal yuʼun ya sjelolin te Abel, melel la yichʼ milel yuʼun te Caine».
26 Jaʼnix jich, te Set* ayin* jtul snichʼan te Enós la yakʼbey sbiilin. Ta yorail-abi, te ants winiketik jajch yalbeyik sbiil te Jehová.
Notaetik
^ Ta yantik variante «pʼejkaj», «tojk».
^ Ta yantik variante «spʼejkajtes», «stojkes».
^ Ta yantik variante «xepuile».
^ Te ya skʼan ya yal «te banti ayik te machʼatik lokʼemik ta anele».
^ Ta yantik variante «pʼejkaj», «tojk».
^ Ta yantik variante «spʼejkajtes», «stojkes».
^ O «flauta».
^ Ta yantik variante «spʼejkajtes», «stojkes».
^ Ma xnaʼbaj ta lek teme jaʼ wixilal o ijtsʼinal te Naamá.
^ Ta yantik variante «spʼejkajtes», «stojkes».
^ Te ya skʼan ya yal «najkanbil» o «ya yichʼ yaʼtel».
^ Ta yantik variante «pʼejkaj», «tojk».
