Jonás 1:1-17
1 Te Jonás* snichʼan Amitái jich albot yuʼun te Jehová:
2 «Baan ta mukʼul lum Nínive sok albeya yaʼiy te ants winiketik te ya yichʼik lajinele, melel kilojix te schopolilike».*
3 Pero, te Jonás lokʼ ta anel ta stojol te Jehová, bajt ta Tarsis; ko bael ta Jope sok tey la sta jun barco te ya xbajt ta Tarsis. Jich yuʼun la stoj spasaje sok mo ta barco te ya xbajt ta Tarsis sok te machʼatik tey ayik-ae, jich lokʼ ta anel ta stojol te Jehová.
4 Tey-abi, te Jehová la yakʼ tal tulan ikʼ ta yolil mar, jich jajch tulan yikʼal jaʼal te jtebxanix kʼan jinuk yuʼun te barcoe.
5 Kʼax bayal xiwik te jtijbarcoetike, jaʼ yuʼun ta jujuntul jajch skʼanbeyik koltayel te dios yuʼunike. Sok jajch schʼojik koel ta mar te ijkatsiletik swenta ya xko yalal-a te barcoe. Pero, te Jonás koem bael ta yutil-a te barco te banti la smejtsʼan sba sok kʼub swayel tey-a.
6 Te capitán yuʼun te barco bajt ta stojol sok jich la yalbey: «¿Bin yuʼun te wayalate? ¡Jajchan, kʼopona te dios awuʼune! Jichniwan ya snaʼ yoʼbolil jbatik te smelelil Dios* swenta ma xlajotik-a».
7 Jaʼ yuʼun, jich talel kʼaxel la yalbey sbaik: «Laʼik, akʼa jpastik suerte* swenta ya jnaʼtik machʼa smul te jwokoltike». Te kʼalal jich la spasike, chiknaj ta ilel te jaʼ smul te Jonás.
8 Jich la yalbeyik te Jonás: «Awokoluk, ala kaʼiytik, ¿machʼa smul te wokolil talem ta jtojoltike? ¿Bin awaʼtel? ¿Banti talemat? ¿Banti alumal? ¿Banti talem atsʼumbal?».
9 Jich la yal te Jonás: «Hebreoon sok ya kichʼ ta mukʼ te Jehová te Dios te ay ta chʼulchan, te machʼa la spas te mar sok te lumkʼinal».
10 Te kʼalal jich la yaʼiyik stojol te winiketike, ochxan bayal xiwel ta yoʼtanik sok jich la sjojkʼoybeyik: «¿Bin yuʼun te jich la apase?». (Te winiketik snaʼojikix-a te lokʼ ta anel ta stojol Jehová te Jonás, melel jaʼnix cholbotik yuʼun).
11 Sok jich la yalbeyik te Jonás: «¿Bin ya skʼan ya jpasbatkotik yuʼun ya xlamaj-a te yip te mare?». Melel te mar bejbe* yak ta toyelxan yip.
12 Jich la yal te Jonás: «Tsakawonik sok chʼojawonik koel ta mar, yuʼun jich ya xlamaj-a te yip te mare; melel jnaʼoj te joʼon jmul te talem ta atojolik te tulan yikʼal jaʼale».
13 Pero, te winiketik tulan jajch stijikxan te barcoe swenta ya xkʼotik ta stiʼil mar, pero maba juʼ yuʼunik, melel bejbe* yak ta toyelxan yip sbul te mare.
14 Jaʼ yuʼun, jich tulan la skʼoponik te Jehová: «¡Awokoluk, Jehová, mame xa awakʼ xlajotik ta skaj te winik ini! Mame xa awakʼ jmulintik te slajel jtul winik te maʼyuk smule, melel jaʼ skʼanojel awoʼtan ini Jehová».
15 Ta patil la stsakik te Jonás sok la schʼojik koel ta mar, jich lamaj yip te mare.
16 Te kʼalal la yilik te jich kʼot ta pasele, te winiketik la xiʼik te Jehová, la yakʼbeyik milbil majtanil te Jehová sok ay bin jamal la yalik te ya spasik ta stojole.
17 Jich yuʼun, te Jehová la stikun tal jkojt mukʼul chay yuʼun ya xbikʼot-a te Jonás, jich ayin oxeb kʼajkʼal sok oxeb ajkʼabal ta schʼujt mukʼul chay te Jonás.
Notaetik
^ Te ya skʼan ya yal «stsumut o paloma».
^ Ta yantik variante «ma lek stalelike».
^ Ta yantik variante «xkechkon».
^ Ta yantik variante «xkechkon».
