Jonás 3:1-10
3 Jich te Jonás chaʼkʼoponot yuʼun te Jehová, jich albot:
2 «Baan ta mukʼul lum Nínive sok albeya yaʼiy te ants winiketik te bin ya kalbate».
3 Te Jonás la schʼuunbey skʼop te Jehová, jich bajt ta Nínive. Te Nínive jaʼ jun mukʼul lum* te oxeb kʼajkʼal ya yichʼ beentayel ta spamal.
4 Jich te Jonás och bael ta lum Nínive, la sbeentay jun kʼajkʼal sok jich yak ta yalel: «Jaʼxanix ya skʼan 40 kʼajkʼal yuʼun ya yichʼ lajinel te Nínive».
5 Te ants winiketik yuʼun Nínive la yakʼ schʼuunel yoʼtanik ta stojol te Diose. La yalik ta mantal te akʼa skom sweʼelik sok la slapik chʼixal pakʼ,* mukʼ bikʼit jich la spasik.
6 Te kʼalal la yaʼiy stojol te ajwalil yuʼun Nínive te bin yak ta yalbeyel skʼoplal te Jonás, la stejkʼan sba jajchel ta smukʼul naktajib, la slokʼes te skʼuʼ yuʼun ajwalil, la slap chʼixal pakʼ* sok la snajkan sba ta stanul kʼajkʼ.
7 Ta swenta smantal te ajwalil sok te sjoʼtak ta aʼtel jich la stikunik ta alel ta spamal te lum Nínive:«Mame ayuk ni jtuluk ants winik ya xweʼ ni jkojtuk chambalam ni jkojtuk tuminchij ni wakaxetik. Mame skʼan ya xweʼik sok mame skʼan ya yuchʼik jaʼ.
8 Akʼa smuk sbaik ta chʼixal pakʼ* te ants winiketik soknix-euk te schambalamike. Akʼa skʼoponik te Dios sok spisil yip yoʼtanik, akʼa yijkitayik te chopol be yuʼunik soknix te utsʼinwaneje.*
9 Jichniwan ya snaʼ yoʼbolil jbatik te smelelil Dios* sok jich ma spasix-a te bin snopoj ya spas ta jtojoltike sok te ya xlamaj te yilinba yuʼun jich ma xlajotik-a».
10 Kʼalal la yil te smelelil Dios* te bin la spasik sok te la yijkitayik te chopol be yuʼunike, la snaʼtiklanbey yoʼbolil sba sok jich maba la stikunix tal te wokolil snopoj ya yakʼ tal ta stojolike.
