Josué 16:1-10
16 Te skʼinalik te la yichʼik akʼbeyel ta swenta suerte* te stsʼumbal José, jajch tal ta Jordán ta banti nopol* Jericó, kʼot kʼalal ta jaʼetik yuʼun Jericó te ay ta stojol slokʼib kʼajkʼal, kʼax bael ta jochol takin kʼinal te mo bael ta Jericó, kʼot kʼalal ta witstikil yuʼun Betel.
2 Jajch tal ta Betel te nopol* ay ta Luz te jaʼ jpam lum, kʼax bael kʼalal ta stiʼil skʼinal te arkitaetik te ay ta Atarot,
3 ko bael ta stojol smalib kʼajkʼal ta stiʼil skʼinal te jafletitaetik, kʼot kʼalal ta stiʼil skʼinal Bet-Horón ta alan sok ta Guézer sok kʼot ta lokʼel ta mar.
4 Jich la yichʼ skʼinalik te stsʼumbal José —te Manasés sok te Efraín—.
5 Jaʼ ini, jaʼ stiʼil skʼinal-a te stsʼumbal Efraín jaʼ chikan te jayeb ta chajp familia aye: te stiʼil skʼinal te la yichʼik akʼbeyel ta stojol slokʼib kʼajkʼal jaʼ te Atarot-Addar, kʼot kʼalal ta Bet-Horón ta kajal,
6 te stiʼil skʼinalik kʼot kʼalal ta mar. Te Micmetat ay ta stojol norte-a, te stiʼil skʼinalik la yakʼ bael buelta ta Taanat-Siló te ay ta stojol slokʼib kʼajkʼal sok kʼax bael ta Janóah te ay ta stojol slokʼib kʼajkʼal.
7 Jajch tal ta Janóah, ko bael ta Atarot sok ta Naará, kʼot kʼalal ta Jericó sok kʼot ta lokʼel ta Jordán.
8 Jajch tal ta Tapúah, kʼax bael kʼalal ta be jaʼ yuʼun Caná te ay ta stojol smalib kʼajkʼal sok kʼot ta lokʼel ta mar. Jaʼik ini, te kʼinal te la yichʼik akʼbeyel te stsʼumbal Efraín, jaʼ chikan te jayeb ta chajp familia aye
9 sok tey ochem skʼoplal-a te mukʼul lumetik sok te chʼin lumetik te la yichʼik akʼbeyel te stsʼumbal Efraín te ay ta yolil skʼinal te la yichʼik akʼbeyel te stsʼumbal Manasés.
10 Pero maba la stentiklanik lokʼel te cananeoetik te nainemik ta Guézer-ae; teyto ayik ta nainel ta yolil te stsʼumbal Efraín jaʼto ta ora ini sok la yichʼik sujel ta spasel tulan aʼtelil.
