Josué 18:1-28
18 Spisil te lum Israel la stsob sbaik ta Siló, tey la stejkʼanik-a te nailpakʼ ta swenta tsoblej, melel la yuʼuninikix te kʼinal-abi.
2 Pero aytoxan jukchajp stsʼumbal-a te Israel te matoba yichʼojik akʼbeyel-a te skʼinalike.
3 Jich yuʼun, te Josué jich la yalbey te israeletik: «¿Jayebxan tiempo ya amaliyik yuʼun ya awichʼik te kʼinal te la yakʼbeyex te Jehová te Dios yuʼun te antiguo ameʼ atatike?
4 Tsaaik oxtul winiketik ta jujunchajp tsʼumbalil. Ya jtikunlan bael yuʼun ya sbeentayik ta yilel te kʼinal sok ya spasbeyik tal jun smapail te kʼinal te banti ya yichʼik akʼbeyel te jujunchajp tsʼumbalile. Te kʼalal ya sujtik tal, akʼa talukik ta jtojol.
5 Yame skʼan ya apukbey abaik ta juksejp te kʼinale. Te Judá teynixme ya xjil ta skʼinalik te ay ta stojol sur soknix te stsʼumbal José teynixme ya xjil ta skʼinalik te ay ta stojol norte.
6 Yan te jaʼexe pasbeyaik tal jun smapail te kʼinal te bitʼil ya apukbey abaik ta juksejp. Ta patil ichʼbonik tal te sjunil-abi yuʼun liʼ ya jpas suerte* ta awentaik ta stojol te Jehová te Dios kuʼuntike.
7 Pero, te levitaetik maba ya yichʼik akʼbeyel skʼinalik ta awolilik, melel te bin ya yichʼik akʼbeyel stukelik jaʼ te ya x-ochik ta sacerdoteil yuʼun Jehová; yan stukel te Gad, Rubén sok te olil stsʼumbal Manasés la yichʼikix akʼbeyel skʼinalik ta stojol slokʼib kʼajkʼal yuʼun Jordán, jaʼ te la yichʼik akʼbeyel yuʼun Moisés, te j-abat yuʼun Jehová».
8 Jich te winiketik te bajtike, la schajpan sbaik. Te Josué jich la spas ta mantal te machʼatik ya spasik te smapail te kʼinal: «Baanik, beentayaik ta yilel te kʼinal, pasbeyaik tal smapail te kʼinal, sujtanik tal ta jtojol sok joʼon ya jpas suerte* ta awentaik ta stojol te Jehová liʼ ta Siló».
9 Jich bajtik te winiketik, la sbeentayik ta yilel te kʼinal, la spasbeyik smapail te kʼinal te banti la spukbey sbaik ta juksejp jaʼ chikan te jayeb ta pam mukʼul lumetik aye sok la stsʼibayik spisil ta jun libro. Ta patil sujtik tal ta stojol te Josué ta scampamento te ay ta Siló.
10 Jich te Josué la spas te suerte* ta swentaik ta stojol te Jehová ta Siló. Tey la spuktiklanbey skʼinal-a te israeletik te Josué jaʼ chikan te jayeb la yichʼik akʼbeyele.
11 Te suerte* kʼot ta stojol te stsʼumbal Benjamín jaʼ chikan te jayeb ta chajp familia ay yuʼunike, te kʼinal te la staike ay ta yolil skʼinal te stsʼumbal Judá sok José.
12 Te stiʼil skʼinalik ta stojol norte jajch bael ta Jordán, te stiʼil skʼinalik mo bael ta chʼin witsetik yuʼun Jericó te ay ta stojol norte. Jaʼnix jich mo bael ta wits te ay bael ta stojol smalib kʼajkʼal sok kʼot kʼalal ta jochol takin kʼinal yuʼun Bet-Aven.
13 Te stiʼil skʼinalik kʼax bael kʼalal ta skʼinal Luz, ta chʼin witstikil yuʼun te skʼinal Luz te ay ta stojol sur, jaʼ te Betel; te stiʼil skʼinalik ko bael ta Atarot-Addar ta wits te ay ta stojol sur yuʼun Bet-Horón ta alan.
14 Te stiʼil skʼinalik jajch tal ta stojol smalib kʼajkʼal sok la yakʼ bael buelta ta stojol sur te ya xjajch tal k’alal ta wits te ay ta yelaw Bet-Horón te ay ta stojol sur; kʼot ta lokʼel ta Quiryat-Baal, jaʼ te Quiryat-Jearim, jaʼ jpam mukʼul lum yuʼun Judá. Jaʼ te stiʼil skʼinalik te ay ta stojol smalib kʼajkʼal.
15 Te stiʼil skʼinalik te ay ta stojol sur jajch tal ta stiʼil te Quiryat-Jearim, bajt ta stojol smalib kʼajkʼal, kʼot kʼalal ta slokʼib jaʼetik yuʼun Neftóah.
16 Te stiʼil skʼinalik ko bael ta yeʼtal wits te ay ta spamlej yuʼun Hinón te ay ta stojol norte ta spamlej yuʼun Refaím sok ko bael ta spamlej yuʼun Hinón te ay ta stojol sur yuʼun te chʼin witsetik yuʼun te jebuseoetik, ko bael ta En-Roguel.
17 Te stiʼil skʼinalik jajch bael ta stojol norte sok kʼot kʼalal ta En-Semes, tey-abi kʼot kʼalal ta Guelilot te ay ta yelaw yuʼun te moel kʼinal yuʼun Adumim, ko bael te banti yakʼoj te ton te Bohán snichʼan Rubén.
18 Kʼax bael ta chʼin witsetik te ay ta stojol norte ta yelaw te Arabá sok ko bael ta Arabá.
19 Te stiʼil skʼinalik kʼax bael ta chʼin witsetik te ay ta stojol norte yuʼun Bet-Hoglá sok kʼot ta lokʼel ta stojol norte yuʼun te mar Salado* te ay ta stojol sur yuʼun Jordán. Jaʼ te stiʼil skʼinalik te ay ta stojol sur.
20 Jaʼ stiʼil skʼinalik kʼot te mukʼul jaʼ Jordán te ay ta stojol slokʼib kʼajkʼal. Jaʼme te kʼinal te la yichʼik akʼbeyel te stsʼumbal Benjamín jaʼ chikan te jayeb ta chajp familia ay yuʼunike, jaʼme te stiʼil skʼinalik ta sjoyobal.
21 Jaʼik ini te mukʼul lumetik yuʼun te stsʼumbal Benjamín jaʼ chikan te jayeb ta chajp familia ay yuʼunike: te Jericó, Bet-Hoglá, Émec-Queziz,
22 Bet-Arabá, Zemaraim, Betel,
23 Avim, Pará, Ofrá,
24 Kefar-Amoní, Ofní sok te Gueba: 12 ta pam mukʼul lumetik sok te chʼin lumetik yuʼunike.
25 Te Gabaón, Ramá, Beerot,
26 Mizpé, Kefirá, Mozá,
27 Réquem, Irpeel, Taralá,
28 Zelá, Ha-Élef, Jebusí —jaʼ te Jerusalén—, Guibeá sok te Quiryat: 14 ta pam mukʼul lumetik sok te chʼin lumetik yuʼunike.
Jaʼik ini te kʼinal te la yichʼik akʼbeyel te stsʼumbal Benjamín jaʼ chikan te jayeb ta chajp familia ay yuʼunike.
Notaetik
^ Jaʼ skʼoplal te mar Muerto.
