Josué 19:1-51
-
Te kʼinal te la yichʼ akʼbeyel te stsʼumbal Simeón (1-9)
-
Te kʼinal te la yichʼ akʼbeyel te stsʼumbal Zabulón (10-16)
-
Te kʼinal te la yichʼ akʼbeyel te stsʼumbal Isacar (17-23)
-
Te kʼinal te la yichʼ akʼbeyel te stsʼumbal Aser (24-31)
-
Te kʼinal te la yichʼ akʼbeyel te stsʼumbal Neftalí (32-39)
-
Te kʼinal te la yichʼ akʼbeyel te stsʼumbal Dan (40-48)
-
Te kʼinal te la yichʼ akʼbeyel te stsʼumbal Josué (49-51)
19 Te kʼalal la spasik te schebal suerte,* jaʼ kʼot ta stojol te stsʼumbal Simeón jaʼ chikan te jayeb ta chajp familia ay yuʼunike. Te skʼinal te la yichʼik akʼbeyele ay ta yolil te skʼinal te la yichʼ akʼbeyel te Judá.
2 Te skʼinal te la yichʼik akʼbeyel jaʼ te Beer-Seba, Seba, Moladá,
3 Hazar-Sual, Balá, Ézem,
4 Eltolad, Betul, Hormá,
5 Ziclag, Bet-Marcabot, Hazar-Susá,
6 Bet-Lebaot sok te Saruhén: 13 ta pam mukʼul lumetik sok te chʼin lumetik yuʼunike;
7 te Ain, Rimón, Éter sok te Asán: chanpam mukʼul lumetik sok te chʼin lumetik yuʼunike;
8 soknix spisil te chʼin lumetik te ayik ta sjoyobal te mukʼul lumetik-abi, jaʼto kʼalal ta Baalat-Beer te jaʼnix jich naʼbil sba bitʼil Ramá te ay ta stojol sur. Jaʼik ini te kʼinal te la yichʼik akʼbeyel te stsʼumbal Simeón jaʼ chikan te jayeb ta chajp familia ay yuʼunike.
9 Te skʼinal te la yichʼik akʼbeyel te Judá, tey akʼbotik chaʼoxsejp skʼinalik-euk-a te stsʼumbal Simeón, melel kʼax mukʼ skʼinal staoj te stsʼumbal Judá. Jich yuʼun, te stsʼumbal Simeón la yichʼik akʼbeyel te skʼinalik ta yolil skʼinal te stsʼumbal Judá.
10 Te kʼalal la spasik te yoxebal suerte,* jaʼ kʼot ta stojol te stsʼumbal Zabulón jaʼ chikan te jayeb ta chajp familia ay yuʼunike, te stiʼil skʼinalik kʼot kʼalal ta Sarid.
11 Te stiʼil skʼinalik mo bael ta Mareal te ay ta stojol smalib kʼajkʼal, kʼot kʼalal ta Dabéset, tey-abi kʼax bael ta spamlej te ay ta yelaw te Jocneam.
12 Jajch tal ta Sarid, toj kʼax bael ta stojol slokʼib kʼajkʼal, kʼot kʼalal ta stiʼil skʼinal Kislot-Tabor, kʼot ta lokʼel ta Daberat, tey-abi mo bael ta Jafía.
13 Tey-abi bajt ta stojol Jafía, toj kʼax bael ta stojol slokʼib kʼajkʼal ta Gat-Héfer, ta Et-Cazín, kʼot ta lokʼel ta Rimón sok kʼot kʼalal ta Neá.
14 Te stiʼil skʼinalik la yakʼ buelta ta stojol norte, toj kʼax bael ta Hanatón, kʼot ta lokʼel ta spamlej yuʼun Iftá-El,
15 tey ochem skʼoplal-a te Catat, Nahalal, Simrón, Idalá sok te Belén: 12 ta pam mukʼul lumetik sok te chʼin lumetik yuʼunike.
16 Jaʼik ini te kʼinal te la yichʼik akʼbeyel te stsʼumbal Zabulón jaʼ chikan te jayeb ta chajp familia ay yuʼunike. Jaʼik-abi te mukʼul lumetik sok te chʼin lumetik yuʼunik te la yichʼik akʼbeyele.
17 Te kʼalal la spasik te schanebal suerte,* jaʼ kʼot ta stojol te stsʼumbal Isacar jaʼ chikan te jayeb ta chajp familia ay yuʼunike.
18 Te stiʼil skʼinalik kʼot kʼalal ta Jezreel, Kesulot, Sunem,
19 Hafaraim, Shion, Anaharat,
20 Rabit, Quisión, Ébez,
21 Rémet, En-Ganim, En-Hadá sok ta Bet-Pazez.
22 Te stiʼil skʼinalik kʼot kʼalal ta Tabor ta Sahazuma, ta Bet-Semes sok kʼot ta lokʼel ta Jordán: 16 ta pam mukʼul lumetik sok te chʼin lumetik yuʼunike.
23 Jaʼik ini te kʼinal te la yichʼik akʼbeyel te stsʼumbal Isacar jaʼ chikan te jayeb ta chajp familia ay yuʼunike; jaʼik-abi te mukʼul lumetik sok te chʼin lumetik yuʼunik te la yichʼik akʼbeyele.
24 Te kʼalal la spasik te yoʼebal suerte,* jaʼ kʼot ta stojol te stsʼumbal Aser jaʼ chikan te jayeb ta chajp familia ay yuʼunike.
25 Te stiʼil skʼinalik jaʼ te Helcat, Halí, Beten, Acsaf,
26 Alamélec, Amad sok te Misal. Te stiʼil skʼinalik te ay bael ta stojol smalib kʼajkʼal kʼot kʼalal ta Carmelo sok ta Sihor-Libnat,
27 sok sujt tal ta stojol slokʼib kʼajkʼal ta Bet-Dagón sok kʼot kʼalal ta Zabulón soknix kʼot ta stojol norte ta spamlej yuʼun Iftá-El, kʼot ta Bet-Émec sok ta Neiel, kʼax bael ta Cabul ta kʼexam kʼabal,*
28 ta Ebrón, Rehob, Hamón sok ta Caná, kʼot kʼalal ta Mukʼul Sidón.
29 Te stiʼil skʼinalik sujt tal ta Ramá, kʼot kʼalal ta mukʼul lum Tiro te joytaybil ta tsʼajkʼe. Tey-abi sujt tal ta Hosá kʼot ta lokʼel ta stiʼil mar ta skʼinal Aczib,
30 Umá, Afec sok ta skʼinal Rehob: 22 ta pam mukʼul lumetik sok te chʼin lumetik yuʼunike.
31 Jaʼik ini te kʼinal te la yichʼik akʼbeyel te stsʼumbal Aser jaʼ chikan te jayeb ta chajp familia ay yuʼunike. Jaʼik-abi te mukʼul lumetik sok te chʼin lumetik yuʼunik te la yichʼik akʼbeyele.
32 Te kʼalal la spasik te swakebal suerte,* jaʼ kʼot ta stojol te stsʼumbal Neftalí jaʼ chikan te jayeb ta chajp familia ay yuʼunike.
33 Te stiʼil skʼinalik jajch tal ta Hélef, jaʼ te banti ay te mukʼul teʼ te ay ta Zaananim, kʼax ta Adamí-Néqueb sok ta Jabneel, kʼot kʼalal ta Lacum sok kʼot ta lokʼel ta Jordán.
34 Te stiʼil skʼinalik sujt tal ta stojol smalib kʼajkʼal ta Aznot-Tabor, kʼot kʼalal ta Hucoc, kʼot ta skʼinal Zabulón te ay ta stojol sur sok kʼot ta skʼinal Aser te ay ta stojol smalib kʼajkʼal soknix ta skʼinal Judá, ta Jordán te ay ta stojol slokʼib kʼajkʼal.
35 Te mukʼul lumetik te joytaybilik ta tsʼajkʼ jaʼ te Zidim, Zer, Hammat, Racat, Kinéret,
36 Adamá, Ramá, Hazor,
37 Quedes, Edréi, En-Hazor,
38 Yirón, Migdal-El, Horem, Bet-Anat sok te Bet-Semes: 19 ta pam mukʼul lumetik sok te chʼin lumetik yuʼunike.
39 Jaʼik ini te kʼinal te la yichʼik akʼbeyel te stsʼumbal Neftalí jaʼ chikan te jayeb ta chajp familia ay yuʼunike. Jaʼik-abi te mukʼul lumetik sok te chʼin lumetik yuʼunik te la yichʼik akʼbeyele.
40 Te kʼalal la spasik te sjukebal suerte,* jaʼ kʼot ta stojol te stsʼumbal Dan jaʼ chikan te jayeb ta chajp familia ay yuʼunike.
41 Te stiʼil skʼinalik te la yichʼik akʼbeyele jaʼ te Zorá, Estaol, Ir-Semes,
42 Saalabín, Ayalón, Itlá,
43 Elón, Timná, Ecrón,
44 Eltequé, Guibetón, Baalat,
45 Jehúd, Bene-Berac, Gat-Rimón,
46 Me-Jarcón sok te Racón, te stiʼil skʼinalik kʼax ta nopol* Jope.
47 Pero, te skʼinal te Dan maba tikʼ lokʼik-a. Jaʼ yuʼun bajt yakʼbeyik guerra te Lésem, la yuʼuninik sok la slajinbeyik skʼoplal ta espada. Jich la yichʼik te kʼinal sok tey jilik ta nainel-a, la yakʼbeyik sbiilin Dan ma jaʼukix te Lésem, jich la yakʼbeyik sbiilin ta swenta te antiguo statik, te Dan.
48 Jaʼik ini te kʼinal te la yichʼik akʼbeyel te stsʼumbal Dan jaʼ chikan te jayeb ta chajp familia ay yuʼunike. Jaʼik-abi te mukʼul lumetik sok te chʼin lumetik yuʼunik te la yichʼik akʼbeyele.
49 Jich laj yoʼtanik ta spukel te kʼinal te la yichʼik akʼbeyel te lum Israel. Jich te israeletik la yakʼbeyik skʼinal ta yolilik te Josué te snichʼan Nun.
50 Ta swenta smantal Jehová la yakʼbeyik te mukʼul lum te la skʼan te Josué, jaʼ te Timnat-Sérah te ay ta witstikil yuʼun Efraín, jaʼ la schaʼpas te mukʼul lum sok tey jil ta nainel-a.
51 Jaʼik ini te kʼinal te la yakʼik ta swenta suerte,* ta Siló te sacerdote Eleazar, te Josué snichʼan Nun sok te jolaletik yuʼun te familiaetik yuʼun te stsʼumbal Israel, jich la spasik ta stojol Jehová ta yochibal te nailpakʼ ta swenta tsoblej. Jich laj yoʼtanik ta spukel te kʼinale.
