Josué 2:1-24
2 Jich yuʼun, te Josué te snichʼan Nun muken la stikun chaʼtul jtsajtaywanejetik te jajchik bael ta skʼinal Sitim, jich la yaltiklanbey: «Baanik sok tsajtaya awilik te kʼinale, jaʼ xa awilikxan ta lek te skʼinal Jericó». Jich bajtik sok kʼotik ta sna jtul j-antsinel* ants te Rahab sbiile, tey jilik-a.
2 Jich la yichʼ albeyel te ajwalil yuʼun Jericó: «¡Kajwal!, ta ajkʼabal ini ay ochik tal israel-winiketik ta stsajtayel te kʼinale».
3 Te kʼalal jich la yaʼiy stojol te ajwalil yuʼun Jericó, jich la stikun ta albeyel te Rahab: «Lokʼesa tal te winiketik te ay ta anae, melel talemik ta stsajtayel spisil te kʼinale».
4 Pero, te antse la snakʼ te chaʼtul winiketik, patil jich la yal: «Yuʼun-nix tal yilonik-a te winiketike, pero ma la jnaʼ te banti talemike.
5 Te kʼalal ijkʼubix-a te kʼinal sok te ya yichʼix makel-a te yochibal te mukʼul lume, lokʼik bael te winiketike, ma jnaʼ te banti bajtike. Pero, teme ya anutsik bael ta orae, yatome ataik».
6 (Pero, te Rahab yikʼtiklanoj moel ta sba sna te winiketik sok snakʼtiklanoj te banti tomtiklanbil* te lino te kʼiil yuʼun tey-a).
7 Jich oranax bajtik te winiketik ta snutsel te jtsajtaywanejetik ta sbelal Jordán ta be jaʼetik. Jaʼnax te kʼalal lokʼik bael te jnutsawaletike, la yichʼ makel te yochibal te mukʼul lume.
8 Te kʼalal mato xwayik-a te jtsajtaywanejetik, te Rahab mo bael ta sba sna te banti ay te winiketik.
9 Sok jich la yaltiklanbey: «Ya jnaʼ te ya yakʼbeyex Jehová te kʼinal ini sok ochix bayal jxiwelkotik ta atojolik. Spisil te yajwal te lum ini maʼyukix yip yoʼtanik ta skaj te bayal xiwenik ta atojolik,
10 melel la kaʼiykotik te la stakijtes Jehová te mar Rojo ta atojolik te kʼalal lokʼex tal ta Egipto soknix te bin la apasbeyik te chaʼtul ajwaliletik yuʼun te amorreoetik te ayik ta jejch* Jordán, jaʼ te Sehón sok te Og te la amilike.
11 Te kʼalal la kaʼiykotik stojol-abi, och xiwel ta koʼtantik sok maʼyuk jtuluk te ay yip yoʼtan yuʼun ya sitintayex, melel te Jehová te Dios awuʼunik jaʼ Dios ta chʼulchan sok ta balumilal.
12 Jich yuʼun, awokolukik, alaik ta jamal ta stojol Jehová te ya awakʼik ta ilel ta stojol-euk te machʼatik ay yuʼun te jtat te kʼuxul oʼtanil te ma x-ijkitaywan jich te bitʼil la kakʼ ta ilel ta atojolik-euke. Sok akʼbonik jun señail te yuʼun-nix jich ya xkʼot ta pasel awuʼunik-ae.
13 Yame awakʼik te kuxul ya xjil te jtat, jnan,* jbankiltak,* jwixitak, kijtsʼinab sok spisil te machʼatik ay yuʼunike. Yame akoltayonkotik swenta ma xlajonkotik».
14 Jich la yalik te winiketike: «Joʼotik ya kakʼ jbatik ta lajel ta awentaik teme ma jichuk ya xkʼot ta pasel kuʼuntike. Teme maʼyuk machʼa ya awalbeyik te bin swentail te talemonkotik, yame kakʼtik awilik te kʼuxul oʼtanil te ma x-ijkitaywan sok yame jkʼoteskotik ta pasel te jkʼoptik te kʼalal ya yakʼbotik Jehová te kʼinal ini».
15 Tey-abi, te Rahab la yakʼ koukik ta lazo ta ventana, melel jaʼ spajkʼul sna te stsʼajkʼul te mukʼul lume. Te sna te Rahab ay ta stoyolil te stsʼajkʼul te mukʼul lume.
16 Ta patil, jich la yaltiklanbey: «Baanik ta witstikil sok nakʼa abaik oxeb kʼajkʼal tey-a swenta maba ya staex te machʼatik yak snutsbelexe. Teme sujtikix tal-a te machʼatik yak slebelexe, ya xjuʼ ya sujtex bael te banti talexe».
17 Jich la yalik te winiketik: «Jaʼnax ya jkʼoteskotik ta pasel te bin la awakʼ kaltik ta jamal te ya jkʼotestik ta pasel teme ya apas ini:
18 te kʼalal ya x-ochonkotik tal ta kʼinal ini, yame achuk ta aventana te tsajal lazo ini te banti ya akojtesotike. Yame skʼan ya atsob tal ta ana te atat, anan,* abankiltak,* awixitak, awijtsʼinab sok spisil te machʼatik ay yuʼun te atate.
19 Teme ay machʼa ya xlokʼ bael ta stiʼil te anae, jaʼme smul teme laje, mame jaʼukix jmulkotik ya xkʼot-abi. Pero, teme ay machʼa ya sta swokol te machʼatik ay ta yutil te ana, jaʼme jmulkotik ya xkʼot te slajele.
20 Pero, teme ay machʼa ya awalbey te bin swentail te talemonkotik, mame ayuk jmulkotik ya xkʼot ta swenta te bin la awakʼ kaltik ta jamal te ya jkʼotestik ta pasele».
21 Jich la yal te Rahab: «Jichme akʼa kʼotuk ta pasel te bitʼil la awalike».
Tey-abi la stikunlan bael, jich sujtik bael te winiketike. Ta patil, te Rahab la schuk te tsajal lazo ta sventana.
22 Jich te winiketik bajtik ta witstikil sok tey jilik oxeb kʼajkʼal-a, jaʼto te kʼalal sujtik tal te machʼatik yakik ta nutsel yuʼune. Manchukme bayuknax leotik ta beetik, maba taotik yuʼun.
23 Ta patil, te chaʼtul winiketik koik tal ta witstikil, kʼaxik bael ta mukʼul jaʼ, kʼotik ta stojol te Josué te snichʼan Nun sok la scholbeyik yaʼiy te bin kʼot ta pasel ta stojolike.
24 Jich la yalbeyik te Josué: «Te Jehová la yakʼbotikix ta jkʼabtik spisil te kʼinal ini. Spisil te yajwal te lume maʼyukix yip yoʼtanik ta skaj te bayal xiwenik ta jtojoltike».
Notaetik
^ Ta yantik variante «jmulawil».
^ Ta yantik variante «yomtiklanbil».
^ Jaʼ skʼoplal te banti ya xlokʼ tal te kʼajkʼale.
^ Ta yantik variante «jmeʼ», «jmama».
^ Ta yantik variante «jxiʼleltak».
^ Ta yantik variante «ameʼ», «amama».
^ Ta yantik variante «axiʼleltak».
