Josué 22:1-34
22 Jich yuʼun, te Josué la yikʼtiklan tal te rubenitaetik, te gaditaetik sok te olil stsʼumbal Manasés,
2 jich la yaltiklanbey: «Te jaʼex apasojik spisil te bin la yalbeyex ta mantal te Moisés, te j-abat yuʼun Jehová, sok achʼuunojik spasel spisil te bin la kalbeyex ta mantale.
3 Ta spisil te tiempo ini, maʼyuk bin-ora awijkitayojik te awermanotakik jaʼto ta ora ini; akʼotesojik ta pasel spisil te bin yaloj ta mantal te Jehová te Dios awuʼunik.
4 Ta ora ini, te Jehová te Dios awuʼunik la yakʼbey lamalkʼinal* te awermanotakik, jich te bitʼil albotik ta jamal. Jich yuʼun, ta ora ini ya xjuʼix te ya sujtex bael ta nailpakʼ awuʼunik, tey ta kʼinal te la yakʼbeyex ta jejch* Jordán te Moisés, te j-abat yuʼun Jehová.
5 Jaʼnax pasa ta akuxlejalik te mantaliletik sok te Ley te la yakʼbeyex te Moisés, te j-abat yuʼun Jehová, te kʼuxuk xa awaʼiy ta awoʼtanik te Jehová te Dios awuʼunik, te yakuk atʼunik spisil te beetik yuʼune, te yakuk achʼuunbeyik te mantaliletik yuʼune, te junuk awoʼtanik ta stojol sok te yakuk awakʼ abaik ta abatinel ta stojol ta spisil awoʼtanik sok ta spisil akuxlejalik».
6 Ta patil, te Josué la yakʼtiklanbey bendición sok la stikunlan bael, jich sujtik bael ta nailpakʼ yuʼunik.
7 Te Moisés yakʼojbeyix skʼinalik ta Basán te olil stsʼumbal Manasés, te yanxan olil stsʼumbal Manasés, te Josué la yakʼbey skʼinalik ta stojol smalib kʼajkʼal yuʼun te Jordán, te banti ay te yermanotakik. Kʼalal te Josué la stikunlan sujtel ta nailpakʼ yuʼunik, la yakʼtiklanbey bendición
8 sok jich la yaltiklanbey: «Sujtanik bael ta anailpakʼik sok bayal kʼulejalil, ikʼaik bael bayal ta kojt achambalamik, ichʼaik bael bayal plata, oro, cobre, hierro sok ichʼaik bael bayal ta lijk’ kʼuʼul pakʼal. Ichʼaik bael te biluketik te la jpojbeytik te jkontrataktik jaʼ chikan te jayeb ay ta awentaik yichʼele sok pukbeya abaik sok te awermanotakike».
9 Ta patil, te rubenitaetik, te gaditaetik sok te olil stsʼumbal Manasés la yijkitayik jilel te yantik israeletik ta Siló te ay ta skʼinal Canaán, jich sujtik bael ta skʼinal Galaad, ta kʼinal te la yichʼik akʼbeyel yuʼun tey ya xnainik-a, jich bitʼil la yal ta mantal te Jehová ta swenta te Moisés.
10 Te kʼalal kʼotik ta stsʼeel te Jordán ta skʼinal Canaán, te rubenitaetik, te gaditaetik sok te olil stsʼumbal Manasés, la spasik ta stsʼeel Jordán jun mukʼul skajtajib chikʼbil majtanil.
11 Ta patil, te yantikxan israeletik jich la yaʼiyik stojol: «¡Ilawilik! Te rubenitaetik, te gaditaetik sok te olil stsʼumbal Manasés la spasik jun skajtajib chikʼbil majtanil ta stiʼil skʼinal Canaán te ay ta skʼinal Jordán ta jejch te banti jaʼ skʼinal te israeletik».
12 Kʼalal te israeletik la yaʼiyik stojol, spisil te lum Israel la stsob sbaik ta Siló yuʼun ya xbajt yakʼbeyik guerra.
13 Jich yuʼun, te israeletik la stikunik bael te Finehás te jaʼ snichʼan te sacerdote Eleazar te banti ayik te rubenitaetik, te gaditaetik sok te olil stsʼumbal Manasés ta skʼinal Galaad,
14 jokinot bael yuʼun lajuntul jolaletik, te jujuntul jolaletik yuʼun te familiaetik lokʼemik tal ta jujunchajp stsʼumbal Israel; te jujuntule jaʼ jolaletik yuʼun sfamiliaik ta jujuntsojb ta mil israeletik.
15 Te kʼalal kʼotik ta skʼinal Galaad, te banti ayik te rubenitaetik, te gaditaetik sok te olil stsʼumbal Manasés, jich la yaltiklanbeyik:
16 «Jichme yakik ta yalel spisil te lum yuʼun te Jehová: ‹¿Bin yuʼun te ma junuk awoʼtan la awakʼ abaik ta stojol te Dios yuʼun Israel? Yoʼtik ini la awijkitayikix ta stʼunel te Jehová te kʼalal la apasik jun skajtajib chikʼbil majtanil sok la atoy abaik ta stojol te Jehová.
17 ¿Mabal bayalukix jmultik ta swenta te bin la yichʼ pasel ta nopol* Peor? Kʼalalto ta ora ini, matoba lekubenotik ta swenta te jmultike, manchukme la yichʼ akʼbeyel castigo ta swenta chamel te lum yuʼun te Jehová.
18 ¡Pero, te jaʼexe yato akʼan ya awijkitayik te Jehová! Teme yoʼtik ini ya atoy abaik ta stojol te Jehová, te pajele ya x-ilin ta stojol spisil te lum Israel.
19 Teme jaʼ ta swenta te boloben skʼoplal ya akuyik te kʼinal te la awichʼik akʼbeyele, jaʼ xa awichʼik te kʼinal te jaʼ yuʼun te Jehová te banti ay te nailpakʼ templo yuʼun te Jehová sok jilanik ta nainel ta kolilkotik; pero mame xa atoy abaik ta stojol te Jehová sok mame xa awakʼ jmulintik te atoybailik ta skaj te ya apasik yan skajtajib chikʼbil majtanil te ma jaʼuk te skajtajib chikʼbil majtanil yuʼun te Jehová te Dios kuʼuntike.
20 Te Acán snichʼan Zérah, la yakʼ ta ilel te ma junix yoʼtan ta stojol Dios kʼalal la yelkʼan te bintik albil skʼoplal te ya yichʼ lajinel, ¿mabal ilinuk te Dios ta stojol spisil te lum Israel? Sok ma jaʼuknax stukel laj ta skaj te smule›».
21 Jich yuʼun, te rubenitaetik, te gaditaetik sok te olil stsʼumbal Manasés jich la sjakʼbeyik te jolaletik* yuʼun te lum Israel:
22 «¡Te Jehová, te jaʼnax mukʼul Dios te ma jichuk te bitʼil te yantik diosetik! ¡Te Jehová, te jaʼnax mukʼul Dios te ma jichuk te bitʼil te yantik diosetik! Jaʼ ya snaʼ stojol sok ya xbajt snaʼ stojol-euk te lum Israel. Teme la jtoy jbatik sok teme ma junuk koʼtantik la kakʼ jbatik ta stojol te Jehová, mame kuxuluk xa awijkitayotik ta ora ini.
23 Yame yakʼ jtoj jmultik te Jehová teme ya jpastik jun skajtajib chikʼbil majtanil swenta ya kijkitaytik te Jehová sok teme ya kakʼtik chikʼbil majtaniletik tey-a, majtaniletik yuʼun sit awal tsʼunubil sok milbil majtaniletik ta swenta lamalkʼinal.
24 Pero ma jichuk la jpastik, la jpastik ta swenta te ay bin la jmel koʼtantik yuʼune. Jich la kaltik: ‹Ta pajel chaʼbej, te awal anichʼnabik jich ya xbajt yalbey te kal jnichʼnabkotike: «¿Bin yuʼun te ya awichʼik ta mukʼ te Jehová te Dios yuʼun Israel?
25 Te Jehová la yakʼ te jaʼ stiʼil jkʼinaltik ya xkʼot te Jordán sok jaʼ stiʼil akʼinalik-euk te stsʼumbalex Rubén sok te stsʼumbalex Gad. Te jaʼexe ma snujpʼuk te ya awichʼik ta mukʼ te Jehová». Te awal anichʼnabik ma xbajt yakʼik te ya yichʼik ta mukʼ te Jehová te kal jnichʼnabkotike›.
26 »Jaʼ yuʼun, jich la kaltik: ‹Jpastik jun skajtajib chikʼbil majtanil pero ma yuʼunuk ya kakʼtik chikʼbil majtaniletik tey-a ni jaʼuk milbil majtaniletik,
27 jaʼ ta swenta te jaʼ testigo ya xkʼot ta atojolik sok ta jtojolkotik soknix ta stojol te jtsʼumbaltik te ya xtale, te ya kakʼ jbatik ta abatinel ta stojol te Jehová ta swenta te chikʼbil majtanil kuʼuntik, milbil majtaniletik sok te milbil majtaniletik ta swenta lamalkʼinal, yuʼun jich ta pajel chaʼbej te awal anichʼnabik ma jichuk ya xbajt yalbey te kal jnichʼnabkotik: «Te jaʼexe, ma snujpʼuk te ya awichʼik ta mukʼ te Jehová»›.
28 Jaʼ yuʼun, jich la kaltik: ‹Teme ta pajel chaʼbej jich ya kichʼtik albeyel-abi sok teme jich ya yichʼik albeyel te jtsʼumbaltik, te joʼotik jich ya kaltik: «Ilawilik te skajtajib chikʼbil majtanil yuʼun te Jehová te la spasik te antiguo jmeʼ jtatik ma jaʼuk la spasik swenta yakʼel chikʼbil majtaniletik ni jaʼuk ta swenta yakʼel milbil majtaniletik, jaʼ la spasik swenta testigo ya xkʼot ta atojolik sok ta jtojolkotik»›.
29 ¡Te joʼotik maʼyuk bin-ora ya jtoy jbatik ta stojol te Jehová sok te ya kijkitaytik ta stʼunel te Jehová soknix maʼyuk bin-ora ya jpastik yan skajtajib chikʼbil majtanil yuʼun ya kakʼtik chikʼbil majtaniletik tey-a, majtaniletik yuʼun sit awal tsʼunubil sok milbil majtaniletik te ma jaʼuk ta skajtajib chikʼbil majtanil yuʼun te Jehová te Dios kuʼuntik te ay ta yelaw te nailpakʼ templo!».
30 Te sacerdote Finehás, te jolaletik yuʼun te lum sok te jolaletik ta familia ta jujun mil israeletik, jun yoʼtan jilik kʼalal la yaʼiyik te bin la yalik te stsʼumbal Rubén, Gad sok te Manasés.
31 Jich yuʼun, te Finehás te snichʼan te sacerdote Eleazar jich la yaltiklanbey te stsʼumbal Rubén, Gad sok te Manasés: «Ta ora ini, jnaʼojtikix te ay ta koliltik te Jehová, melel jun awoʼtan awakʼoj abaik ta stojol te Jehová. Jich la akoltayik ta skʼab Jehová te israeletik».
32 Ta patil, te Finehás te snichʼan te sacerdote Eleazar sok te jolaletik la yijkitayik ta skʼinal Galaad te rubenitaetik sok te gaditaetik, jich sujtik bael ta skʼinal Canaán sok la yaltiklanbeyik te yantik israeletik te bin kʼot ta pasel.
33 Te israeletik jun yoʼtan jilik ta swenta te bin la yichʼik albeyele. Jich te israeletik la yichʼik ta mukʼ te Dios sok maʼyuk bin-ora la yalikix te ya yakʼbeyik guerra te rubenitaetik sok te gaditaetik swenta ya slajinbeyik skʼoplal te skʼinalik te banti nainemike.
34 Jich yuʼun, te rubenitaetik sok te gaditaetik la yakʼbeyik sbiil te skajtajib chikʼbil majtanil,* melel jich la yalik: «Jaʼ testigo kuʼuntik te jaʼ smelelil Dios* te Jehová».
Notaetik
^ Ta hebreo: «kux-oʼtan».
^ Jaʼ skʼoplal te banti ya xlokʼ tal te kʼajkʼale.
^ Ta yantik variante «tijil».
^ Ta hebreo: «jolaletik ta familia ta jujun mil israeletik».
^ Ta swenta te bin la yichʼ cholbeyel skʼoplal te skajtajib chikʼbil majtanil laniwan sbiilin Testigo.
