Josué 23:1-16
23 Bayal kʼajkʼal ta patil kʼalal te Jehová la yakʼbey skux yoʼtan te lum Israel ta stojol te skontratak sok bayalix yaʼbilal-a te Josué sok mamalix-a,
2 te Josué la stsob tal spisil te lum Israel, te jwolwanejetik, te jolaletik, te juecetik sok te machʼatik yichʼoj mukʼ yaʼtelik, jich la yaltiklanbey: «Mamalonix sok ayix kaʼbilal.
3 Jaʼexnix la awilik spisil te bin la spas te Jehová te Dios awuʼunik ta stojol spisil te nacionetik ini ta awentaik, melel jaʼ la yakʼ guerra ta awentaik te Jehová te Dios awuʼunike.
4 La jtentiklan lokʼel te nacionetik te ayik ta nainel ta stojol smalib kʼajkʼal yuʼun Jordán jaʼto kʼalal ta Mukʼul mar* soknix la kakʼbeyex ta swenta suerte* te skʼinalike. Ay yantik nacionetik te ay machʼatik yakikto ta nainel tey-a, pero jaʼ awuʼunikix te skʼinalike.
5 Te Jehová te Dios awuʼunik jaʼ te machʼa la stentiklan lokʼel ta atojolik, la spojbey te skʼinalik yuʼun ya awuʼuninik jich te bitʼil la yalbeyex ta jamal te Jehová te Dios awuʼunike.
6 »Jaʼnaxme ya skʼan te ma xiwex sok ya achʼuunik spasel spisil te bin tsʼibaybil ta Ley yuʼun Moisés, sok te maʼyuk bin-ora ya xbaex ta awaʼelik ni ta akʼexamik,*
7 sok mame xa ajokinik te nacionetik te ay ta ajoyobalik. Mame xa awalbeyik sbiil te diosetik yuʼunik ni ayuk bin ya awalik ta jamal ta stojolik, maʼyuk bin-ora ya skʼan te ya awakʼ abaik ta abatinel ta stojolik sok te ya anijan abaik ta stojolik.
8 Te bin ya skʼan ya apasike, jaʼ te jun-nax ya awakʼ abaik ta stojol te Jehová te Dios awuʼunik, jich te bitʼil apasojik tal jaʼto ta ora ini.
9 Te Jehová yame stentiklan lokʼel ta atojolik mukʼul nacionetik te bayal yipik; maʼyuk jtuluk winik te juʼem yuʼun te ya stsalexe.
10 Jtulnax winik awuʼunik ya snuts bael jmil ta tul, melel te Jehová te Dios awuʼunik jaʼ yak ta yakʼel guerra ta atojolik, jich bitʼil la yalbeyex ta jamal.
11 Jich yuʼun, spisiluk-ora wikʼiluk asitik swenta kʼuxuk ta awoʼtanik te Jehová te Dios awuʼunike.
12 »Pero, teme ya xnamajex* ta stojol sok jaʼ ya atʼunik te machʼatik jilemik ta nainel ta nacionetik te ayik ta ajoyobalik sok te bayal machʼa ya xnujpunex sok, te ya ajokinik sok te ya sjokinex,
13 naʼaikme te Jehová te Dios awuʼunik maba ya stentiklanix lokʼel ta atojolik te nacionetik ini. Jich ya xkʼot ta atojolik te bin-utʼil pejtsʼ, te bin-utʼil chʼajan, te bin-utʼil lazo te ya smajex ta apatik sok jich te bin-utʼil chʼixetik te ay ta asitik, jaʼto te kʼalal ya xtupʼ akʼoplalik ta lekil kʼinal ini te la yakʼbeyex te Jehová te Dios awuʼunike.
14 »Ta ora ini, ilawilik, nopol* ya xlajonix; te jaʼexe anaʼojik ta lek ta spisil awoʼtanik sok ta spisil akuxlejalik te maʼyuk ni jpʼaluk kʼop te maba kʼot ta pasel ta spisil te bintik lek la yal ta jamal te Jehová te Dios awuʼunike. Spisil kʼoem ta pasel ta swenta alekilalik, maʼyuk ni jpʼaluk kʼop te maba kʼot ta pasele.
15 Jich te bitʼil kʼot ta pasel ta atojolik spisil te bintik lek yaloj ta jamal te Jehová te Dios awuʼunike, jaʼnixme jich te Jehová ya yakʼbeyex tal spisil te wokoliletik te la yal ta jamal te ya yakʼe sok ya stupʼbeyex akʼoplalik ta lekil kʼinal ini te la yakʼbeyex te Jehová te Dios awuʼunike.
16 Teme maba ya akʼotesik ta pasel te chapbilkʼop yuʼun Jehová te Dios awuʼunik te la yalbeyex te ya apasike, teme ya awichʼik ta mukʼ yantik diosetik sok te ya anijan abaik ta stojolike, yame x-ilin ta atojolik te Jehová sok ta oranax ya xtupʼ akʼoplalik ta lekil kʼinal te la yakʼbeyexe».
Notaetik
^ Jaʼ skʼoplal te mar Mediterráneo.
^ Ta yantik variante «axin kʼabik».
^ Ta yantik variante «xjakalajex», «xkʼubex».
^ Ta yantik variante «tijil».
