Josué 24:1-33
-
Te Josué la scholbey skʼoplal te bin kʼax ta stojol te lum Israel (1-13)
-
La stijbey yoʼtan te lum Israel yuʼun ya x-abatinik ta stojol te Jehová (14-24)
-
«Te joʼon sok te machʼatik ay kuʼune jaʼme ya kakʼ jbakotik ta abatinel ta stojol te Jehová» (15)
-
-
«Te Josué la spas jun chapbilkʼop sok te lum Israel» (25-28)
-
Laj te Josué sok la yichʼ mukel (29-31)
-
Te sbakel te José la yichʼ mukel ta Siquem (32)
-
Laj te Eleazar sok la yichʼ mukel (33)
24 Te Josué la stsob ta Siquem spisil te stsʼumbal Israel sok la yikʼtiklan tal te jwolwanejetik yuʼun te Israel, te jolaletik yuʼunik, te juecetik yuʼunik sok te machʼatik yichʼoj mukʼ yaʼtelik yuʼunik, la stejkʼan sbaik ta stojol te smelelil Diose.*
2 Te Josué jich la yalbey spisil te lume: «Jich ya yal te Jehová te Dios yuʼun Israel: ‹Ta yan jejch yuʼun te mukʼul jaʼ Éufrates te banti nainik bayal tiempo te antiguo ameʼ atatik —te tey ochem skʼoplal-a te Taré, te stat te Abrahán sok te stat te Nacor— sok te la yichʼik ta mukʼ yantik diosetik tey-ae.
3 »›Ta patil la kikʼ bael ta yan jejch yuʼun te mukʼul jaʼ Éufrates te antiguo ameʼ atatik Abrahán, la kakʼ sbeentay spisil te skʼinal Canaán sok la kakʼ pʼoluk te stsʼumbale. La kakʼbey te Isaac;
4 jich te Isaac la kakʼbey te Jacob sok te Esaú. Ta patil, te Esaú la kakʼbey skʼinalin te wits Seír; te Jacob sok te snichʼnab koik bael ta Egipto.
5 Ta patil la jtikun te Moisés sok Aarón. La jtikunbey wokoliletik te Egipto, ta patil la jlokʼesex tal tey-a.
6 Te kʼalal la jlokʼes tal te ameʼ atatik ta Egipto sok te kʼoex ta mar, te egipcioetik la snutsik bael te ameʼ atatik kʼalalto ta mar Rojo sok carretaetik yuʼun guerra soknix soldadoetik te kajajtik ta caballo.
7 Jajch skʼanbeyik bayal wokol te Jehová, jich la yakʼ tal ijkʼal kʼinal ta yolil te egipcioetik sok te jaʼexe, la yakʼ tal te mar ta sbaik sok mukotik yuʼun, jaʼex la awilik te bin la jpas ta Egipto. Ta patil, bayal jaʼbil nainex ta jochol takin kʼinal.
8 »›La kikʼtiklan bael ta skʼinal te amorreoetik te ayik ta nainel ta jejch* Jordán sok la yakʼbeyex guerra. Pero la kakʼbeyex ta akʼabik swenta ya awuʼuntayik te skʼinalik sok la jlajinlan ta atojolik.
9 Jich yuʼun, te Balac snichʼan Zipor, te ajwalil yuʼun Moab, la yakʼbey guerra te lum Israel. Te Balac la stikun ta ikʼel te Balaam te snichʼan Beor yuʼun ya sbolkʼoptayex.
10 Pero maba la jkʼan la kaʼiybey skʼop te Balaam. Jaʼ yuʼun, bayal buelta la yakʼbeyex bendición sok joʼon la jkoltayex lokʼel ta skʼab.
11 »›Jich kʼaxex bael ta jejch mukʼul jaʼ Jordán sok kʼoex ta Jericó. La yakʼbeyex guerra te jwolwanejetik* yuʼun Jericó, te amorreoetik, perizitaetik, cananeoetik, hititaetik, guirgaseoetik, heveoetik sok te jebuseoetik, pero joʼon la kakʼbeyex ta akʼabik.
12 Jaʼ yuʼun la kakʼ chebajuk* yoʼtanik, jich anik bael ta atojolik jich bitʼil la spasik te chaʼtul ajwaliletik yuʼun te amorreoetik. Ma jaʼuk ta swenta te espada awuʼunik ni jaʼuk ta swenta te atʼimalteʼik te jich kʼot ta pasele.
13 Jich la kakʼbeyex akʼinalik te maba la awil awokolik ta stael sok te mukʼul lumetik te ma jaʼuk la apasik soknix nainex tey-a. Yakex ta sweʼel sit tsʼusubetik sok sit olivoetik te ma jaʼukex la atsʼunike›.
14 »Jaʼ yuʼun xiʼaik* te Jehová sok junuk awoʼtanik* ya x-abatinex ta stojol ta smelelil, lokʼesaik te diosetik te la yichʼik ta mukʼ te antiguo ameʼ atatik ta jejch mukʼul jaʼ Éufrates sok ta Egipto, jaʼ xa awakʼ abaik ta abatinel ta stojol te Jehová.
15 Teme maba lek ya awilik te ya awakʼ abaik ta abatinel ta stojol te Jehová, tsaaik ta ora ini te machʼa ya awichʼik ta mukʼe: teme jaʼ te diosetik te la yichʼik ta mukʼ te antiguo ameʼ atatik ta jejch mukʼul jaʼ Éufrates o jaʼ te diosetik yuʼun te amorreoetik te jaʼ yuʼunik te kʼinal te banti ayex ta nainele. Pero, te joʼon sok te machʼatik ay kuʼune jaʼme ya kakʼ jbakotik ta abatinel ta stojol te Jehová».
16 Ta swenta-abi, te lum Israel jich la yal: «Maʼyuk bin-ora ya kijkitaytik te Jehová sok maba ya kichʼtik ta mukʼ yantik diosetik.
17 Te Jehová te Dios kuʼuntik jaʼ te machʼa la slokʼesotik tal sok te la slokʼes te jmeʼ jtatik ta skʼinal Egipto te banti kichʼojtik mosoinel-ae, jaʼ te machʼa la kiltik te la spas bayal milagroetik sok te la skanantayotik te banti beenotik kʼaxel sok te lumetik te banti kʼaxotike.
18 Te Jehová la stentiklan lokʼel spisil te lumetik soknix te amorreoetik te liʼ ayikix ta nainel-a te kʼalal mato liʼ ayotik-a te joʼotike. Jaʼnix jich te joʼotik ya kakʼ jbakotik ta abatinel ta stojol te Jehová, melel jaʼ Dios kuʼuntik».
19 Jich yuʼun, te Josué jich la yalbey te lum Israel: «¿Yuʼun-nixbal ya xjuʼ awuʼunik-a te ya x-abatinex ta stojol te Jehovae? Melel jaʼ jun Dios te chʼultesbile sok te jaʼnax ya skʼan ichʼel ta mukʼe. Maba ya spasbeyex perdón te atoybailik sok te amulike.
20 Teme ya awijkitayik te Jehová sok teme ya awichʼik ta mukʼ te diosetik yuʼun te jyanlumetik, yame skontrainex sok yame slajinex, manchukme ay bin lek la spas ta atojolik ta nailalto».
21 Pero, te lum Israel jich la yalbey te Josué: «¡Maʼuk, te joʼotik ya x-abatinotik ta stojol te Jehová!».
22 Jich yuʼun, te Josué jich la yalbey te lum Israel: «Jaʼexnix testigo ya xkʼoex ta atojolik te sok spasemal awoʼtanik la awalik te ya x-abatinex ta stojol te Jehová». Jaʼ yuʼun, jich la sjakʼik: «Jich, testigoonkotik».
23 «Jaʼ yuʼun lokʼesaik te diosetik yuʼun te jyanlumetik te ay ta awolilik sok akʼa awoʼtanik ta stojol te Jehová te Dios yuʼun Israel».
24 Te lum Israel jich la yalbey te Josué: «¡Ya kakʼ jbatik ta abatinel ta stojol te Jehová te Dios kuʼuntik sok ya jchʼuunbeytik te skʼope!».
25 Ta yorail-abi, te Josué la spas jun chapbilkʼop sok te lum Israel, la yakʼ jun mantalil ta stojolik sok ay bin la schapbeyik skʼoplal ta Siquem.
26 Jich yuʼun, te Josué la stsʼibay te kʼopetik-abi ta Ley yuʼun Dios sok la yakʼ jun mukʼul ton ta yeʼtal te mukʼul teʼ te ay ta stsʼeel te chʼul awilal yuʼun te Jehová.
27 Te Josué jich la yalbeyxan te lum Israel: «¡Ilawilik! Te ton ini testigo ya xkʼot ta jtojoltik, melel la yaʼiy stojol spisil te bin la yalbotik te Jehová sok jaʼ testigo ya xkʼot ta atojolik yuʼun maba ya amuk ta awoʼtanik te Dios awuʼunike».
28 Ta patil, te Josué la stikunlan bael te lum Israel ta skʼinalik te la yichʼik akʼbeyele.
29 Te kʼalal kʼoemix ta pasel spisil ini, laj te Josué snichʼan Nun, te j-abat yuʼun Jehová, ayix 110 yaʼbilal-a.
30 La smukik ta Timnat-Sérah ta kʼinal te banti la yichʼ akʼbeyel te ay ta witstikil yuʼun Efraín ta stojol norte yuʼun te wits Gaas.
31 Te lum Israel abatin ta stojol te Jehová te jayeb kʼajkʼal kuxul te Josué sok te jayeb kʼajkʼal kuxulik jilel te jwolwanejetik yuʼun te Israel te kʼalal lajemix-a te Josué, jaʼ te machʼatik snaʼojik spisil te bintik la spas te Jehová ta stojol te lum Israel.
32 Te sbakel te José te la yichʼik tal ta Egipto te israeletik, la smukik ta Siquem ta kʼinal te la sman te Jacob ta 100 ta sejp takʼin te jaʼ la smanbey te snichʼnab Hamor. Te Siquem jaʼ stat te Hamor. Te kʼinal-abi, jaʼ la yichʼik akʼbeyel te snichʼnab José.
33 Jaʼnix jich laj te Eleazar snichʼan Aarón. La smukik ta chʼin wits yuʼun te Finehás te jaʼnix snichʼan te Eleazar. Jaʼ te la yichʼ akʼbeyel ta witstikil yuʼun Efraín.
Notaetik
^ Jaʼ skʼoplal te banti ya xlokʼ tal te kʼajkʼale.
^ O jaʼniwan ya skʼan ya yal «te yajwalik te kʼinal».
^ O jaʼniwan ya skʼan ya yal «xiwel».
^ O «te maʼyuk amulik».
