Josué 6:1-27
6 Jich yuʼun, te Jericó makal ta lek ta skaj te israeletik, maʼyuk machʼa ya xlokʼ sok maʼyuk machʼa ya x-och.
2 Jaʼ yuʼun, te Jehová jich la yalbey te Josué: «La kakʼbatix ta akʼab te Jericó sok te ajwalil yuʼune soknix te winiketik yuʼun te ay yipik ta yakʼel guerra.
3 Jich yuʼun, jaʼex te chapalex ta yakʼel guerra yame abeentayik jun buelta ta sjoyobal te mukʼul lume. Jichme xa apasulanik wakeb kʼajkʼal.
4 Yame xnailajik bael ta stojol te skaxaul chapbilkʼop juktul sacerdoteetik te yichʼojik jukchʼix xulubiletik yuʼun tat tuminchij. Pero, ta sjukebal kʼajkʼal yame abeentayik jukeb buelta ta sjoyobal te mukʼul lume sok yame yokʼesinik te xulubiletik te sacerdoteetik.
5 Te kʼalal ya yichʼ okʼesinel te xulubiletik yuʼun tat tuminchij —jaʼnax te kʼalal ya yaʼiyik te yokʼesinel* te xulubiletik—, spisil te soldadoetik tulanme ya x-awunik ta yakʼel guerra. Jich te stsʼajkʼul te mukʼul lum Jericó yame xjemtsʼuj koel, te soldadoetik yame xmoik bael ta jujuntul, tojnaxme ya x-ochik bael ta yutil te lume».
6 Jich yuʼun, te Josué te snich’an Nun la yikʼtiklan tal te sacerdoteetik sok jich la yaltiklanbey: «Kʼechaik bael te skaxaul chapbilkʼop, yame xnailajik bael juktul sacerdoteetik ta stojol te skaxaul chapbilkʼop yuʼun te Jehová, yame yichʼik bael jukchʼix xulubiletik yuʼun tat tuminchij».
7 Ta patil, jich la yalbey te soldadoetik: «Baanik sok beentayaik ta sjoyobal te mukʼul lume, te soldadoetik te chapalik ta lek sok yaʼtejibik jaʼme ya xnailajik bael ta stojol te skaxaul chapbilkʼop yuʼun te Jehová».
8 Te soldadoetik jich la spasik te bitʼil albotik yuʼun te Josué, te juktul sacerdoteetik te yichʼojik bael te jukchʼix xulubiletik yuʼun tat tuminchij te nailajemik ta stojol Jehová jajchik ta beel sok yakik ta yokʼesinel te xulubiletik, ta spatik yak ta talel te skaxaul chapbilkʼop yuʼun te Jehová.
9 Te soldadoetik te chapalik sok yaʼtejibik jaʼ nailajemik ta stojol te sacerdoteetik te yakik ta yokʼesinel te xulubiletik, te yantik soldadoetik ayik tal ta spat te skaxaul chapbilkʼop te kʼalal yak ta okʼesinel-a te xulubiletike.
10 Te Josué jich yalojbeyix ta mantal-a te soldadoetik: «Mame x-awunex sok mame xkʼopojex. Mame xlokʼ jpʼaluk kʼop ta aweik jaʼto te kʼalal bin-ora ya kalbeyex ‹¡Awunanik!›, te xchione, jaʼtome ya x-awunex-a».
11 Te Josué la yakʼ ta kʼechel te skaxaul chapbilkʼop yuʼun te Jehová ta sjoyobal te mukʼul lum Jericó, jun-nax buelta la sbeentayik ta sjoyobal. Ta patil sujtik bael ta campamento sok tey kʼax ajkʼabal yuʼunik-a.
12 Ta yan kʼajkʼal, te Josué buen sab jajch. Te sacerdoteetik la skʼechik te skaxaul chapbilkʼop yuʼun te Jehová,
13 te juktul sacerdoteetik te yichʼojik te jukchʼix xulubiletik yuʼun tat tuminchij nailajik bael ta stojol te skaxaul chapbilkʼop yuʼun Jehová, yakik ta beel sok yakik ta yokʼesinel te xulubiletik. Te soldadoetik te chapalik sok yaʼtejibik jaʼ nailajemik ta stojol te sacerdoteetik, te yantik soldadoetik ayik tal ta spat te skaxaul chapbilkʼop yuʼun te Jehová te kʼalal yak ta okʼesinel-a te xulubiletike.
14 Ta schebal kʼajkʼal la sbeentayik jun buelta ta sjoyobal te mukʼul lum, ta patil sujtik bael ta campamento. Jaʼme jich la spasulanik wakeb kʼajkʼal.
15 Jaʼnax te kʼalal sakub te kʼinal ta sjukebal kʼajkʼal buen sab jajchik, la sbeentayik jukeb buelta ta sjoyobal te mukʼul lum jich te bitʼil yakik ta spasel tale. Jaʼnax te kʼajkʼal ini te la sbeentayik jukeb buelta ta sjoyobal te mukʼul lume.
16 Te kʼalal la sbeentayikix jukeb buelta ta sjoyobal te mukʼul lum Jericó, te sacerdoteetik la yokʼesinik te xulubiletik, te Josué jich la yalbey te soldadoetik: «¡Awunanik, melel te Jehová la yakʼbeyexix ta akʼabik te mukʼul lume!
17 Yame skʼan ya yichʼ lajinel te mukʼul lum sok spisil te bintik tey ay-ae; jaʼme yuʼun ya xkʼot te Jehová spisil te bintik tey ay-ae. Jaʼnax te Rahab te j-antsinel* ants ya xjuʼ kuxul ya xjil sok spisil te machʼatik ay ta sna, melel la snakʼ te jtsajtaywanejetik te la jtikunkotike.
18 Swenta maba ya yikʼbeyex awoʼtanik te bintik albil skʼoplal te ya yichʼ lajinel sok te maba ya awichʼik jilel, mame xnoptsajex* ta stojol. Teme ay bin ya awichʼik jilel te albil skʼoplal te ya skʼan ya yichʼ lajinel, yame xjuʼ ya awichʼik tal lajinel ta stojol te campamento yuʼun Israel sok ya xjuʼ ya sta swokol.
19 Pero, spisil te plata, oro sok te bintik pastiklanbil ta cobre sok ta hierro chʼultesbil ta stojol te Jehová. Yame skʼan ya yichʼ akʼel ta yawil skʼulejal te Jehová».
20 Jich yuʼun, te kʼalal la yokʼesinik te xulubiletik, awunik te soldadoetik. Jaʼnax te kʼalal la yaʼiyik te soldadoetik te la yichʼ okʼesinel te xulubiletik sok te kʼalal tulan awunik ta yakʼel guerra, jemtsʼuj koel te stsʼajkʼul te mukʼul lume. Ta patil moik bael te soldadoetik ta Jericó, ta jujuntul tojnax ochik bael ta yutil te mukʼul lum, jich la yuʼuninik.
21 La smiltiklanik ta espada te winiketik, antsetik, achʼix keremetik, meʼel mamaletik, jaʼnix jich te toroetik, tuminchijetik sok te burroetik.
22 Te Josué jich la yalbey te chaʼtul winiketik te la stsajtayik te kʼinal: «Ochanik ta sna te j-antsinel* ants, lokʼesaik tal sok spisil te machʼatik ay yuʼune jich te bitʼil la awalbeyik ta jamal».
23 Jich bajtik te jtsajtaywanejetik, la slokʼesik tal te Rahab, te stat, snan,* sbankiltak,* swixitak, yijtsʼinab sok spisil te machʼatik ay yuʼune; jich la slokʼesbeyik tal spisil te sfamilia sok la yikʼik bael ta stiʼil te campamento yuʼun Israel.
24 Ta patil la schikʼik ta jkʼaxel te mukʼul lum sok spisil te bintik tey ay-ae. Yan stukel te plata, oro sok spisil te bintik pastiklanbil ta cobre sok ta hierro la yakʼik ta yawil kʼulejalil ta swenta te sna te Jehová.
25 Te machʼatiknax kuxul la yijkitay te Josué jaʼ te Rahab te j-antsinel* ants, te stat sok spisil te machʼatik ay yuʼun te state. Te Rahab yak ta nainel ta lum Israel jaʼto ta ora ini, melel la snakʼ te winiketik te la stikun te Josué ta stsajtayel te Jericó.
26 Ta yorail-abi, te Josué jich la yal ta jamal:* «Te Jehová yame yakʼbey swokol te machʼa ya schaʼpas te mukʼul lum Jericó. Te bin-ora ya yakʼbey yiptajib te mukʼul lume yame xlaj te sba snichʼan; te bin-ora ya yotsesbey te puertaetik yuʼun te mukʼul lume yame xlaj te slajibal snichʼane».
27 Te Jehová spisil-ora la sjokin te Josué sok pujk bael skʼoplal ta swolol balumilal.
Notaetik
^ O «ya xjalajik ta yokʼesinel».
^ Ta yantik variante «jmulawil».
^ Ta yantik variante «xjijtsʼajex», «xtijtsajex».
^ Ta yantik variante «jmulawil».
^ Ta yantik variante «smeʼ», «smama».
^ Ta yantik variante «xiʼleltak».
^ Ta yantik variante «jmulawil».
^ O jaʼniwan ya skʼan ya yal «te Josué jich la yalbey te lum te jichuk akʼa yalik ta jamal».
