Josué 7:1-26
7 Pero, te israeletik maba la schʼuunik spasel te ma xjuʼ ya stsakik te bin albil skʼoplal te ya yichʼ lajinel, melel te Acán, te snichʼan Carmí, snichʼan Zabdí, snichʼan Zérah, te talem ta stsʼumbal Judá, ay bin la yichʼ jilel te albil skʼoplal te ya yichʼ lajinele. Ta swenta-abi, te Jehová bayal ilin ta stojol te israeletik.
2 Jich yuʼun, te Josué la stikun bael chaʼoxtul winiketik ta Hai te jajchik bael ta Jericó, te Hai nopol* ay ta Bet-Aven sok ta stojol slokʼib kʼajkʼal yuʼun Betel. Jich la yaltiklanbey: «Moanik bael sok tsajtaya awilik te kʼinale». Jich moik bael te winiketik sok la stsajtay yilik te Hai.
3 Te kʼalal sujtik tal te winiketik, jich la yalbeyik te Josué: «Ma puersauk te ya xmoik bael spisil te soldadoetike, tikʼ-a te ya xbajtik 2 mil o 3 mil ta tul winiketik yuʼun ya jtsaltik te Hai. Maʼyuk bayal yajwal te lume, ma xa atikun bael spisil te soldadoetik yuʼun jich ma xlujbik spisilik-a».
4 Jich yuʼun moik bael 3 mil ta tul winiketik, pero anik ta stojol te winiketik yuʼun Hai.
5 Te winiketik yuʼun Hai jajch snutsik te israeletik ta yochibal te mukʼul lume, jaʼto ta Sebarim,* la smiltiklanik 36 ta tul israeletik te kʼalal yakik ta koel bael-ae. Jaʼ yuʼun, jkʼaxel laj yip yoʼtan te lum sok och xiwel ta yoʼtanik.
6 Te kʼalal jich la yil ini te Josué, la schʼiʼ* te skʼuʼ sok la snijan sba koel kʼalal ta lum ta stojol te skaxaul chapbilkʼop yuʼun te Jehová. Te Josué sok te jwolwanejetik yuʼun te Israel jich jilik kʼalalto ta mal kʼajkʼal sok maba la skom sbaik ta sbujkʼiyel tan ta sjolik.
7 Jich la yal te Josué: «¡Aay, Kajwal Jehová, Mukʼul Ajwalil! ¿Bin yuʼun la awikʼ tal kʼaxel ta mukʼul jaʼ Jordán te lum ini? ¿Jaʼnaxbal tal awakʼotik ta skʼab te amorreoetik yuʼun ya slajinotik? ¡Te lajuk awijkitayotik ta jejch* Jordán tikʼ la kaʼiykotik-a te jichuke!
8 Kajwal, Jehová, te lum Israel an ta stojol te skontratake, pasa perdón, ¡ma jnaʼix te bin ya kale!
9 Te kʼalal ya yaʼiyik stojol te cananeoetik sok spisil te machʼatik nainemik ta kʼinal ini, yame sjoytayotik sok yame stupʼbotik te jbiilkotik ta balumilal. ¿Bin ya xbajt apas ta swenta te smukʼul abiile?».
10 Te Jehová jich la yalbey te Josué: «¡Jajchan! ¿Bin yuʼun te nijilat koel kʼalal ta lum?
11 Staoj smul te lum Israel. Maba la schʼuunik spasel te chapbilkʼop te la kalbey te ya skʼotesik ta pasele. Ay bin la yichʼik jilel te albil skʼoplal te ya yichʼ lajinele, la yelkʼanik sok la snakʼik te banti te sbilukike.
12 Jaʼ yuʼun, te israeletik ma xjuʼ yuʼunik stsalel te skontratakike, yame x-anik lokʼel ta stojol te skontratakik, melel talix ta stojolik te lajele. Maba ya jokinex jaʼto teme ya alajinbeyik skʼoplal ta awolilik te bintik albil skʼoplal te ya yichʼ lajinele.
13 ¡Jajchan sok chʼultesa te lum Israel! Jichme xa awalbey: ‹Chʼultesa abaik yuʼun chapalexix-a te pajele, melel jich ya yal te Jehová te Dios yuʼun Israel: «Jaʼex lum Israel, ay bin ay ta awolilik te albil skʼoplal te ya yichʼ lajinele. Ma xjuʼ awuʼunik stsalel te akontratakik, jaʼto teme la alajinbeyik skʼoplal ta awolilik te bintik albil skʼoplal te ya yichʼ lajinel.
14 Yame xtal atejkʼan abaik pajel ta sab ta jujunchajp tsʼumbalil. Te tsʼumbalil te ya stsa te Jehová yame xnoptsaj* tal jujun familia. Te familia te ya stsa te Jehová yame xnoptsaj tal jujun na. Te na te ya stsa te Jehová yame xnoptsaj tal jujuntul winik.
15 Te machʼa la yichʼ tael te yichʼoj te bintik albil skʼoplal te ya yichʼ lajinel, yame yichʼ chikʼel sok spisil te bintik ay yuʼune, melel maba la schʼuun te chapbilkʼop yuʼun te Jehová sok ay bin kʼexlaltik sba la spas ta lum Israel»›».
16 Ta yan kʼajkʼal, te Josué buen sab jajch sok la yakʼ noptsajuk* tal te jujunchajp stsʼumbal Israel, te tsʼumbalil te la yichʼ tsaele jaʼ te Judá.
17 La yakʼ noptsajuk* tal te familiaetik yuʼun Judá, te familia te la yichʼ tsaele jaʼ te zerahitaetik. Ta patil la yakʼ noptsajuk tal ta jujuntul te winiketik yuʼun te sfamilia te zerahitaetik, te machʼa la yichʼ tsael jaʼ te Zabdí.
18 Ta slajibal la yakʼ noptsajuk* tal ta jujuntul te winiketik yuʼun te sna te Zabdí, te machʼa la yichʼ tsaele jaʼ te Acán, te snichʼan Carmí, snichʼan Zabdí, snichʼan Zérah te talem ta stsʼumbal Judá.
19 Jich yuʼun, te Josué jich la yalbey te Acán: «Awokoluk, jnichʼan, ichʼa ta mukʼ te Jehová te Dios yuʼun Israel sok albeya ta jamal te amule. Awokoluk, albon te bin la apase. Mame xa amukbon».
20 Te Acán jich la yalbey te Josué: «Melelnix-a, joʼon te jtaoj jmul ta stojol te Jehová te Dios yuʼun Israel. Jaʼme te bin la jpas ini:
21 te kʼalal la yichʼ pojel tal te biluketike, la kil jlijkʼ tʼujbil k’u’ul te toyol stojol te talem ta Sinar, sok 200 siclo* yuʼun plata soknix jpejch oro te 50 siclo* yalal, la jmulan, jich la kichʼ bael. Jnakʼoj ta yeʼtal lum ta banti te nailpakʼ kuʼune sok tey mukul-euk-a te takʼine».
22 Ta oranax te Josué la stikun chaʼoxtul winiketik; jich animalnax bajtik ta snailpakʼ te Acán, tey mukul kʼot staik-a te jlijkʼ kʼuʼul pakʼal sok te takʼine.
23 Jich la slokʼesik tal te biluketik ta snailpakʼ te Acán, la yichʼik bael ta stojol te Josué sok ta stojol spisil te israeletik soknix la yakʼik ta stojol te Jehová.
24 Jich yuʼun, te Josué sok spisil te lum Israel la yikʼik moel ta spamlej yuʼun Acor te Acán te snichʼan Zérah, jaʼnix jich la yichʼik bael te plata, te tʼujbil kʼuʼul te toyol stojol, te pechel oro sok la yikʼbeyik bael te skerem nichʼnab, yantsil nichʼnab, te toroetik yuʼun, te burroetik yuʼun, te tuminchijetik yuʼun, te snailpakʼ sok spisil te bintik ay yuʼune.
25 Te Josué jich la yal: «¿Bin yuʼun te la awichʼ tal te wokolil ta jtojoltike? Ta ora ini te Jehová ya yakʼbat awokol-euk». Jich yuʼun, spisil te lum Israel la schʼojik ta ton, jich la smilik; ta patil la schikʼik. Ta spisilik la yichʼik chʼojel ta ton.
26 Sok la sbusanbeyik bayal ton ta sba te teyto ayik-a jaʼto ta ora ini. Jaʼto jich lamaj te yilinba te Jehová. Jaʼ swentail te lugar-abi sbiilinoj spamlej yuʼun Acor* jaʼto ta ora ini.
Notaetik
^ Ta yantik variante «tijil».
^ Te ya skʼan ya yal «te banti ya slokʼesik tonetik».
^ Ta yantik variante «xetʼ».
^ Jaʼ skʼoplal te banti ya xlokʼ tal te kʼajkʼale.
^ Ta yantik variante «xjijtsʼaj», «xtijtsaj».
^ Ta yantik variante «jijtsʼajuk», «tijtsajuk».
^ Ta yantik variante «jijtsʼajuk», «tijtsajuk».
^ Ta yantik variante «jijtsʼajuk», «tijtsajuk».
^ Jaʼ 2.28 kilo. Ilawil ta apéndice, B14.
^ Jaʼ 570 gramo.
^ Te ya skʼan ya yal «wokolil».
