Levítico 10:1-20
10 Te Nadab sok te Abihú te snichʼnab te Aarón la stsakik te yawil yakʼalik, la yakʼbeyik skʼajkʼal sok spomil, jich jajch yakʼik kʼajkʼ ta stojol te Jehová te maba akʼbilik permiso te jich ya spasike, melel ma jichuk albilik ta mantal.
2 Jaʼ yuʼun lokʼ tal kʼajkʼ ta stojol te Jehová te la schikʼtiklan, jich lajik ta stojol te Jehová.
3 Te Moisés jich la yalbey te Aarón: «Jich la yal te Jehová: ‹Spisil te machʼatik nopol* ayik ta jtojol yame kakʼbey yil te joʼon chʼul Dioson, jaʼnix jich ta stojol spisil te lum yame kichʼ albeyel yutsil jkʼoplal›». Maʼyuk bin la yal yuʼun te Aarón.
4 Tey-abi, te Moisés la yikʼ tal te Misael sok te Elzafán te snichʼnab Uziel te jaʼ stajun* Aarón, jich la yaltiklanbey: «Laʼ lokʼesaik te awermanotakik ta chʼul awilal. Baan akʼaik jilel ta fuera yuʼun te campamentoe».
5 Jich bajt slokʼesik te chamen bakʼet te slapojikto te snajtil kʼuʼike, jich te bitʼil albotik yuʼun te Moisés.
6 Ta patil, te Moisés jich la yalbey te Aarón sok te yantik snichʼnab te jaʼik te Eleazar sok te Itamar: «Stojiluk ay te stsotsel ajolik sok mame xa achʼiʼik* te akʼuʼik yuʼun jich maba ya xlajex, sok jich maba ya xtal te yilinba te Dios ta stojol spisil te lume. Yan stukel te awermanotak yuʼun te sna Israel yame x-okʼik ta stojol te machʼatik la yichʼik milel ta kʼajkʼ yuʼun te Jehová.
7 Mame xnamajex* ta yochibal te nailpakʼ ta swenta tsoblej. Teme jiche, yame xlajex, melel ay ta atojolik te aceite te ay machʼa ya yichʼ malel ta sjol te jaʼ yuʼun te Jehová». Jich la spasik te bin albotik yuʼun te Moisés.
8 Ta patil, te Jehová jich la yalbey te Aarón:
9 «Te jaʼat sok te anichʼnab mame xa awuchʼik vino ni yantik tulan uchʼbalil te kʼalal ya x-ochex ta nailpakʼ ta swenta tsoblej swenta maba ya xlajex. Jaʼ ini jaʼ jun mantalil te ma xlaj skʼoplal ta kajalkaj atsʼumbalik.
10 Jichme ya anaʼik stsajtayel te bin chʼultesbil sok te bin maba chʼultesbil; te bin lek skʼoplal sok te bin boloben skʼoplal,
11 sok te ya awakʼbeyik snop te israeletik spisil te mantaliletik yakʼoj te Jehová ta swenta te Moisés».
12 Te Moisés jich la yalbey te Aarón sok te chaʼtulxan snichʼnab te jilemik, jaʼik te Eleazar sok te Itamar: «Tsakaik te jayeb majtanil ya xjil yuʼun te sit awal tsʼunubil ta swenta te majtaniletik te ya yichʼ chikʼel ta stojol te Jehová, pasaik ta pan te maba yichʼoj levadura, ta patil weʼaik ta nopol* kajtajibal, melel jaʼ mero chʼultesbil.
13 Yame skʼan ya aweʼik ta jun lugar te chʼultesbil, melel jaʼ te bin ay ta awenta yichʼel sok te anichʼnab ta swenta te majtaniletik te ya yichʼ chikʼel ta stojol te Jehová, jaʼ jich albilon ta mantal.
14 Jaʼat sok te akerem nichʼnab sok te awantsil nichʼnab yame skʼan ya aweʼik-euk te stan* te ya yichʼ akʼel ta majtanil te ya yichʼ jimulanel sok te yaʼ te ya yichʼ chʼultesel ta jun lugar te maba boloben skʼoplal, melel jaʼik-abi te bin ay ta awentaik yichʼel yuʼun te milbil majtanil ta swenta lamalkʼinal te ya yakʼik te israeletike.
15 Yame skʼan te jun-nax ya awichʼik bael te yaʼ te chʼultesbil, te stan,* te majtanil te ya yichʼ jimulanel sok te sjujpʼel* te majtaniletik te ya yichʼ chikʼel swenta talel kʼaxel ya yichʼ jimulanel ta stojol te Jehová, jaʼme te parte ini te ay ta awenta yichʼel spisil-ora sok te anichʼnab, jich bitʼil la yal ta mantal te Jehová».
16 Te Moisés jajch sle ta bayuk te tat tentsun yuʼun te majtanil ta swenta mulil, pero te kʼalal la snaʼ stojol te la yichʼ chikʼele, ilin ta stojol te Eleazar sok te Itamar te chaʼtul snichʼnab te jilemxan yuʼun te Aarón, jich la yaltiklanbey:
17 «¿Bin yuʼun te maba la aweʼik te majtanil ta swenta mulil ta chʼul awilal, jich bitʼil te jaʼ mero chʼultesbile? ¿Yuʼunbal ma jaʼuk la yakʼbeyex swenta ay bin ya apasik ta stojol te smul te lume sok te ya awakʼik te ya staik perdón yuʼun te smulik ta stojol te Jehovae?
18 ¡Ilawilik! Te chʼichʼ yuʼun te majtanil maba la yichʼ ichʼel bael ta yutil te chʼul awilal. La skʼan te lajuk aweʼik te majtanil ta chʼul awilal, jich te bitʼil la kichʼ albeyel ta mantal».
19 Te Aarón jich la yalbey te Moisés: «Ilawil, ta kʼajkʼal ini la yakʼik majtanil yuʼunik ta swenta mulil sok chikʼbil majtanil yuʼunik ta stojol te Jehová, pero kʼot ta pasel ta jtojol spisil-abi. Jich yuʼun, te lajuk jweʼ te majtanil ta swenta mulil, ¿labal smulan te Jehová te jichuke?».
20 Lek la yaʼiy te Moisés te kʼalal jich la yal te Aarone.
Notaetik
^ Ta yantik variante «tijil».
^ O «stio».
^ Ta yantik variante «axetʼik».
^ Ta yantik variante «xjakalajex», «xkʼubex».
^ Ta yantik variante «tijil».
^ Ta yantik variante «sniʼ yoʼtan», «stiʼ yoʼtan».
^ Ta yantik variante «sniʼ yoʼtan», «stiʼ yoʼtan».
^ Ta yantik variante «xepuil».
