Levítico 11:1-47
-
Chambalametik te lek skʼoplalik sok te boloben skʼoplalik (1-47)
11 Te Jehová jich la yalbey te Moisés sok te Aarón:
2 «Jichme xa awalbey te israeletik: ‹Jaʼme ini te chambalametik te ayik ta lumkʼinal te ya xjuʼ ya aweʼik:
3 spisil te chambalametik te jatem yejkʼachik sok te ya schaʼjachʼxan sweʼelik yame xjuʼ ta weʼel.
4 »›Pero ma xjuʼ ta weʼel te chambalametik te jaʼnax ya schaʼjachʼxan sweʼelik o te jaʼnax jatem yejkʼachik. Ma xjuʼ ya aweʼik te camello te ya schaʼjachʼxan sweʼel, pero maba jatem yejkʼach. Bolobenme skʼoplal ya skʼan ya awilik.
5 Jaʼnix jich te damán* ma xjuʼ ta weʼel, melel ya schaʼjachʼxan sweʼel, pero maba jatem yejkʼach. Bolobenme skʼoplal ya skʼan ya awilik.
6 Jaʼnix jich te liebre,* melel ya schaʼjachʼxan sweʼel pero maba jatem yejkʼach. Bolobenme skʼoplal ya skʼan ya awilik.
7 Te chitam, melel jatem yejkʼach pero maba ya schaʼjachʼxan sweʼel. Bolobenme skʼoplal ya skʼan ya awilik.
8 Mame xa aweʼbeyik stiʼbalul sok mame xa apikbeyik te schamen bakʼetal. Bolobenme skʼoplal ya skʼan ya awilik.
9 »›Jaʼik ini te bintik kuxajtik ta jaʼ te ya xjuʼ ta weʼel: yame xjuʼ ya aweʼik spisil te bintik kuxajtik ta jaʼ te ay xikʼik sok ay sulilik, chikan teme ayik ta maretik o ta mukʼul jaʼetik.
10 Pero, spisil te bintik kuxajtik ta maretik sok ta mukʼul jaʼetik te maʼyuk xikʼik sok te maʼyuk sulilik, jich bitʼil te bintik jtsojbnax ya yakʼ sbaik ta jaʼ ilaybilme ya xkʼot awuʼunik.
11 Jich, yame skʼan te ilaybil ya xkʼot awuʼunik. Mame xa aweʼbeyik te stiʼbalul sok yame skʼan ilaybil awuʼun te schamen bakʼetal.
12 Spisil te bintik kuxajtik ta jaʼ te maʼyuk xikʼik sok te maʼyuk sulilik ilaybilme ya xkʼot awuʼunik.
13 »›Jaʼik ini te jaʼmal mutetik te ya xwilik te ya skʼan ilaybilik ya xkʼot awuʼunik. Mame xa aweʼik te jaʼmal mutetik ini, melel ilaybilik skʼoplal: te águila, águila te ya stsak chay, ijkʼal xulem,
14 tsajal milano-mut ni chajpuk ijkʼal milano-mut
15 ni chajpuk jojetik,
16 avestruz-mut, xkuj, sakal spechul jaʼ ni chajpuk xik,
17 chʼin xkuj, sjoj-mutil jaʼ,* xkuj te najtik schikin,
18 cisne-mut, pelícano-mut, xulem,
19 cigüeña-mut ni chajpuk garza-mut, abubilla-mut ni jaʼuk te sotsʼe.
20 Spisil chʼin chambalametik te ya xwilik te jtsojbnax ya yakʼ sbaik ta lumkʼinal sok te ya xbeenik ta chaneb yok ilaybilme ya xkʼot awuʼunik.
21 »›Te chʼin chambalametik te ya xwilik te jtsojbnax ya yakʼ sbaik ta lumkʼinal sok te ya xbeenik ta chaneb yok, jaʼnax ya xjuʼ ta weʼel te chʼin chambalametik te jun-nax ay te yaʼik sok te yokik te jich ya yakʼ xwilik ta lum.
22 Jaʼik ini te ya xjuʼ ta weʼel: spisil ta chajp kʼulubetik te bayuk banti ya xbajtik, yantik kʼulubetik te ya xjuʼ ta weʼel, chil sok pʼirich.*
23 Biluk chʼin chambalam te ya xwil te jtsojbnax ya yakʼ sba ta lumkʼinal sok te chaneb yok ilaybilme ya xkʼot awuʼunik.
24 Yame xjuʼ ya xbolob akʼoplalik yuʼun. Machʼauk-a te ya spik te chamen chambalam bolobenme skʼoplal ya xkʼot jaʼto ta xmal kʼajkʼal.
25 Machʼauk-a te ya yichʼ bael te sbakʼetal te chamen chambalametik-abi yame skʼan ya sakʼ te skʼuʼ sok bolobenme skʼoplal ya xkʼot jaʼto ta xmal kʼajkʼal.
26 »›Biluk chambalam te jatem yejkʼach pero maba ya schaʼjachʼxan sweʼel bolobenme skʼoplal ya skʼan ya awilik. Machʼauk-a te ya spike bolobenme skʼoplal ya xkʼot.
27 Spisil chambalam te ya xbeen ta chaneb yok sok te kʼun te yeʼtal yoke bolobenme skʼoplal ya skʼan ya awilik. Machʼauk-a te ya spik te chamen chambalame bolobenme skʼoplal ya xkʼot jaʼto ta xmal kʼajkʼal.
28 Te machʼa ya yichʼ bael te sbakʼetal te chamen chambalametik-abi yame skʼan ya sakʼ te skʼuʼ sok bolobenme skʼoplal jaʼto ta xmal kʼajkʼal. Bolobenme skʼoplal ya skʼan ya awilik.
29 »›Jaʼik ini te chambalametik te jtsojbnax ya yakʼ sbaik ta lumkʼinal te boloben skʼoplal ya skʼan ya awilik: chʼo te ya sjokʼ lum, chʼo, spisil ta chajp chambalam te staslajan ya xbeenik,
30 geco, mukʼul lagarto, salamandra te ya xkuxin ta jaʼ, lagartija sok camaleón.
31 Te chambalametik-abi te jtsojbnax ya yakʼ sbaik ta lumkʼinal bolobenme skʼoplal ya skʼan ya awilik. Machʼauk-a te ya spik te chamen chambalametik bolobenme skʼoplal ya xkʼot jaʼto ta xmal kʼajkʼal.
32 »›Pero, teme ay chamen chambalam te chʼay koel ta sba te bin pasbil ta teʼ, jlijkʼ kʼuʼul pakʼal, jlijkʼ nujkul o xejtʼelul chʼixal pakʼ* bolobenme skʼoplal ya xkʼotik. Biluk aʼtejibal te ya yichʼ tuuntesel ta spisil-ora yame skʼan mulel ta jaʼ bolobenme skʼoplal ya xkʼot jaʼto ta xmal kʼajkʼal. Ta patil lekme skʼoplal ya xkʼot.
33 Teme ay chʼay koel ta vasija te pasbil ta ajchʼal, yame skʼan ya atopʼ sok biluk-a te bintik ay ta yutil bolobenme skʼoplal ya xkʼot.
34 Chikan biluk weʼelil te ya xtaot yuʼun te jaʼ te ay ta vasija-abi bolobenme skʼoplal ya xkʼot sok biluk uchʼbalil te ay ta vasija-abi bolobenme skʼoplal ya xkʼot.
35 Chikan biluk-a te ya xchʼay koel tal ta sba te chamen chambalam bolobenme skʼoplal ya xkʼot. Chikan teme ta horno o te banti ya yichʼ nupʼel kʼajkʼ yame skʼan ya yichʼ jinel. Bolobenme skʼoplal, sok bolobenme skʼoplal ya skʼan ya awilik.
36 Jaʼnax te slokʼib jaʼetik sok te pozoetik leknanix skʼoplalik stukelik-a, pero machʼauk-a te ya spik te sbakʼetal te chamen chambalametik-abi bolobenme skʼoplal ya xkʼot.
37 Teme ay jkojt chamen chambalam te ya xchʼay koel te banti ay te sit awal tsʼunubil te ya yichʼ tsʼunel, maba ya xbolob skʼoplal te sit awal tsʼunubile.
38 Teme ya yichʼ ajchʼesel te sit awal tsʼunubil, pero ay chʼay koel tal ta sba te chamen chambalame, bolobenme skʼoplal ya skʼan ya awilik te sit awal tsʼunubil.
39 »›Teme ay laj jkojt chambalam te ya xjuʼ ya aweʼike, machʼauk-a te ya spikbey te sbakʼetal bolobenme skʼoplal ya xkʼot jaʼto ta xmal kʼajkʼal.
40 Machʼauk-a te ya sweʼ jtebuk te stiʼbalul te chamen chambalame yame skʼan ya sakʼ te skʼuʼ bolobenme skʼoplal ya xkʼot jaʼto ta xmal kʼajkʼal. Machʼauk-a te ya yichʼ bael te sbakʼetal te chamen chambalam-abi yame skʼan ya sakʼ te skʼuʼe sok bolobenme skʼoplal ya xkʼot jaʼto ta xmal kʼajkʼal.
41 Spisil te chambalametik te jtsojbnax ya yakʼ sbaik ta lumkʼinal ilaybilme ya xkʼot. Ma xjuʼ ta weʼel.
42 Mame skʼan ya aweʼik ni jkojtuk chambalam te staslajan ya xbeenik ta lumkʼinal ni jkojtuk chambalam te ya xbeen ta chaneb yok ni jkojtuk chʼin chambalam te jtsojbnax ya yakʼ sba ta lumkʼinal sok te bayal yoke, melel ilaybilikme.
43 Mame ilaybiluk ya xkʼoex ta skaj te chʼin chambalametik te jtsojbnax ya yakʼ sbaik ta lumkʼinal sok mame xa awakʼ xbolob akʼoplalik yuʼun.
44 Melel joʼon Jehovaon te Dioson awuʼunik, yame skʼan te ya achʼultes abaik te jich chʼultesbil ya xkʼoex jich te bin-utʼil chʼul Dioson te joʼone. Jaʼ yuʼun mame xa abolobtes akʼoplalik ta skaj te chʼin chambalametik te jtsojbnax ya yakʼ sbaik sok te ya xbeenik ta lumkʼinal.
45 Melel joʼon Jehovaon te la jlokʼesex tal ta skʼinal Egipto swenta jaʼ Dios ya xkʼoon awuʼunik, yame skʼan chʼultesbilex jich te bin-utʼil chʼul Dioson te joʼone.
46 »›Jaʼ ini jaʼ te ley ta swenta te chambalametik te chaneb yok, te jaʼmal mutetik te ya xwilik, spisil te bintik kuxajtik ta jaʼ sok spisil te chʼin chambalametik te jtsojbnax ya yakʼ sbaik ta lumkʼinal,
47 swenta jich ya anaʼik te bin lek skʼoplal sok te bin boloben skʼoplal sok te chambalametik te ya xjuʼ ta weʼel sok te ma xjuʼ ta weʼel›».
Notaetik
^ Jaʼ pajal yilel sok mukʼul tʼul te maʼyuk sne te ya xkuxin ta tontikil.
^ Jaʼ pajal yilel sok tʼul, pero najtʼxan te schikin sok yok.
^ Jkojt mukʼul mut te pechel yok te ya smul sba ta jaʼ ta stsakel chayetik.
^ O «saltamonte».
