Levítico 12:1-8
-
Te ants ya slekubtes sba skʼoplal te kʼalal ayinix yal (1-8)
12 Te Jehová jich la yalbey te Moisés:
2 «Albeya yaʼiy te israeletik ini: ‹Teme jtul ants ya yikʼ yal ta schʼujt sok ya yalatay jtul chʼin kerem, jukebme kʼajkʼal boloben skʼoplal, jich bitʼil jayeb kʼajkʼal boloben skʼoplal te kʼalal ya yil schamele.
3 Ta swaxakebal kʼajkʼal ya skʼan ya yichʼ bojbeyel lokʼel te snujkulel sjol skʼunil sbakʼetal te alale.
4 Te antse yame skʼan ya slekubtesxan sba skʼoplal 33 kʼajkʼal ta patil. Mame skʼan ya spik te bin chʼultesbil ni jaʼuk ya x-och ta chʼul awilal jaʼto te kʼalal ya xlaj te jayeb kʼajkʼal ya slekubtes sbae.
5 »›Teme ya yayintes* jtul chʼin achʼix 14 kʼajkʼal boloben skʼoplal, jich bitʼil jayeb kʼajkʼal boloben skʼoplal te kʼalal ya yil schamele. Te antse yame skʼan ya slekubtesxan sba skʼoplal 66 kʼajkʼal ta patil.
6 Te kʼalal ya stsʼakaj te jayeb kʼajkʼal ya slekubtes sba skʼoplal ta swenta te ayin* te chʼin kerem o chʼin achʼix yuʼun, yame yikʼ bael ta stojol te sacerdote ta yochibal te nailpakʼ ta swenta tsoblej jkojt jkolel* tat tuminchij te juntonax yaʼbilal jich bitʼil chikʼbil majtanil sok jkojt jkolel stsumut* o jkojt xpuliwok* jich bitʼil majtanil ta swenta mulil.
7 Te sacerdote yame yakʼ ta stojol te Jehová sok jich ya yakʼ sta perdón yuʼun smul te antse, jichme lek skʼoplal ya xkʼot yuʼun te schʼichʼele. Jaʼ ini jaʼ te ley ta swenta te ants te ya yayintes* jtul chʼin kerem o jtul chʼin achʼix.
8 Teme maʼyuk stojol yuʼun ya sman jkojt tuminchij te antse, ya xjuʼ ya yakʼ chaʼkojt xpuliwok* o chaʼkojt jkolel stsumut,* te jkojte jaʼ ta swenta chikʼbil majtanil, te yane jaʼ ta swenta te majtanil ta swenta mulil, te sacerdote ya yakʼ te ya sta perdón, jichme lek skʼoplal ya xkʼot›».
Notaetik
^ Ta yantik variante «spʼejkajtes», «stojkes».
^ Ta yantik variante «pʼejkaj», «tojk».
^ Ta yantik variante «jchʼiel».
^ O «paloma».
^ O «tórtola».
^ Ta yantik variante «spʼejkajtes», «stojkes».
^ O «tórtola».
^ O «paloma».
