Levítico 15:1-33
-
Boloben skʼoplal te bin ya xlokʼ ta skʼunil sbakʼetal te ants winik (1-33)
15 Te Jehová kʼopojxan sok te Moisés sok te Aarón, jich la yaltiklanbey:
2 «Jich xa awalbeyik te israeletik: ‹Teme jtul winik ay bin ya xlokʼ ta skʼunil sbakʼetal, jaʼme ya yakʼ xbolob skʼoplal yuʼun.
3 Bolobenme skʼoplal ya xkʼot ta skaj te ay bin lokʼ ta skʼunil sbakʼetal; chikan teme stalelnanix yak ta lokʼel-a o teme ya smake, boloben-nanix skʼoplal-a.
4 »›Chikan te banti ya xway te machʼa ay bin ya xlokʼ ta skʼunil sbakʼetal bolobenme skʼoplal ya xkʼot yuʼun, sok chikan te banti ya snajkan sba bolobenme skʼoplal ya xkʼot-euk.
5 Machʼauk-a te ya spik te banti way te winike yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
6 Machʼauk-a te ya snajkan sba te banti najkaj te machʼa ay bin lokʼ ta skʼunil sbakʼetal yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
7 Machʼauk-a te ya spik te machʼa ay bin lokʼ ta skʼunil sbakʼetal yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
8 Teme te machʼa ay bin ya xlokʼ ta skʼunil sbakʼetal ya stubatay te machʼa lek skʼoplal, te ants winik-abi yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
9 Chikan bin montura ya xmo-a te machʼa ay bin ya xlokʼ ta skʼunil sbakʼetal bolobenme skʼoplal ya xkʼot.
10 Machʼauk-a te ya spik te banti la snajkan sba bolobenme skʼoplal ya xkʼot jaʼto ta xmal kʼajkʼal, sok spisil te machʼa ya skʼech spisil-abi yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
11 Teme maba spokoj skʼab te machʼa ay bin ya xlokʼ ta skʼunil sbakʼetal sok te ay machʼa ya spik, te ants winik-abi yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
12 Yame skʼan ya yichʼ topʼel te vasija te pasbil ta ajchʼal te la spik te machʼa ay bin ya xlokʼ ta skʼunil sbakʼetal, yan teme pasbil ta teʼ te vasija yame skʼan ya yichʼ pokel.
13 »›Te kʼalal ya xkom ta lokʼel te bin ya xlokʼ ta skʼunil sbakʼetal te jich ya xlekub te winike, yame yajtay jukeb kʼajkʼal yuʼun ya slekubtes sba, yame skʼan ya sakʼ skʼuʼ sok ya yatintes sba sok yaʼlel slokʼib jaʼ te yak ta okinel,* jichme lek skʼoplal ya xkʼot.
14 Ta swaxakebal kʼajkʼal yame skʼan ya stsak chaʼkojt xpuliwok* o chaʼkojt jkolel stsumut* sok yame skʼan ya xbajt stejkʼan sba ta stojol te Jehová ta yochibal te nailpakʼ ta swenta tsoblej sok yame skʼan ya yakʼbey te sacerdote.
15 Te sacerdote yame yakʼ te jaʼmal mutetik, te jkojte jaʼ ta swenta te majtanil ta swenta mulil, te yane jaʼ ta swenta chikʼbil majtanil. Jich te sacerdote yame yakʼ te ya sta perdón yuʼun te smul ta stojol te Jehová ta skaj te ay bin lokʼ ta skʼunil sbakʼetal te winike.
16 »›Teme jtul winik ya xmal lokʼel yaʼlel skʼunil sbakʼetal yame yatintes sba skojtol, bolobenme skʼoplal ya xkʼot jaʼto ta xmal kʼajkʼal.
17 Yame skʼan ya yichʼ sakʼel biluk kʼuʼul o chikan te bintik pasbil ta nujkul te banti kʼot te yaʼlel skʼunil sbakʼetal, bolobenme skʼoplal ya xkʼot jaʼto ta xmal kʼajkʼal.
18 »›Kʼalal ya sjokin sbaik ta wayel jtul winik sok jtul ants, teme mal lokʼel yaʼlel skʼunil sbakʼetal te winike, ta schebalik yame skʼan ya x-atinik, bolobenme skʼoplal ya xkʼotik jaʼto ta xmal kʼajkʼal.
19 »›Kʼalal jtul ants yak ta yilel schamel, jukebme kʼajkʼal boloben skʼoplal. Machʼauk-a te ya xpikot yuʼune bolobenme skʼoplal ya xkʼot jaʼto ta xmal kʼajkʼal.
20 Chikan te banti ya xway te kʼalal yak ta yilel schamel-ae bolobenme skʼoplal ya xkʼot yuʼun, sok chikan te banti ya snajkan sba bolobenme skʼoplal ya xkʼot-euk.
21 Machʼauk-a te ya spik te banti way te antse yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
22 Machʼauk-a te ya spik te banti la snajkan sba te antse yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
23 Teme ay machʼa ya spik te banti way o te banti la snajkan sba te antse, te ants winik-abi bolobenme skʼoplal ya xkʼot jaʼto ta xmal kʼajkʼal.
24 Teme jtul winik ya sjokin ta wayel te antse sok teme taot yuʼun te schʼichʼel ta skaj te yak ta yilel schamel, bolobenme skʼoplal ya xkʼot yuʼun jukeb kʼajkʼal sok bolobenme skʼoplal ya xkʼot chikan te banti ya xwaye.
25 »›Teme jtul ants ya xkʼax schʼichʼel pero ma jaʼuk yorail te ya yil te schamel o teme ya xjalaj ta yilel te schamel te ma jichuk stalel, bolobenme skʼoplal ya xkʼot te jayeb kʼajkʼal ya xlokʼ schʼichʼel, jichnix te bin-utʼil te kʼalal yak ta yilel schamel.
26 Chikan te banti ya xway te jayeb kʼajkʼal ya xkʼax te schʼichʼel bolobenme skʼoplal jich te bin-utʼil te banti ya xway te kʼalal yak ta yilel schamel, sok chikan te banti ya snajkan sbae bolobenme skʼoplal, jichnix te bin-utʼil te kʼalal yak ta yilel schamel.
27 Machʼauk-a te ya spik spisil-abi bolobenme skʼoplal ya xkʼot. Yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal.
28 »›Te kʼalal ya xkom ta kʼaxel te schʼichʼel te antse, yame yajtay jukeb kʼajkʼal, ta patil lekme skʼoplal ya xkʼot.
29 Ta swaxakebal kʼajkʼal yame skʼan ya stsak chaʼkojt xpuliwok* o chaʼkojt jkolel stsumut* sok yame yichʼ bael ta stojol te sacerdote ta yochibal te nailpakʼ ta swenta tsoblej.
30 Te sacerdote yame yakʼ jkojt jaʼmal mut jich bitʼil majtanil ta swenta mulil, te yane jich bitʼil chikʼbil majtanil. Jich te sacerdote ya yakʼ te ya sta perdón yuʼun smul ta stojol te Jehová ta skaj te boloben skʼoplal yuʼun te schʼichʼele.
31 »›Jich yuʼun, parteme xa awakʼik te israeletik yuʼun te bintik boloben skʼoplal, swenta maba ya xlajik ta skaj te boloben skʼoplalik te jich ya sbolobtesbeyik skʼoplal te nailpakʼ templo kuʼun te ay ta yolilike.
32 »›Jaʼ ini jaʼ te ley ta stojol te winik te ay bin ya xlokʼ ta skʼunil sbakʼetal, te winik te boloben skʼoplal ta skaj te ya xmal lokʼel yaʼlel skʼunil sbakʼetal
33 soknix ta stojol te ants te boloben skʼoplal ta skaj te yak ta yilel schamel, te winik o ants te ay bin ya xlokʼ ta skʼunil sbakʼetal sok te winik te ya sjokin ta wayel jtul ants te boloben skʼoplale›».
