Levítico 18:1-30
-
Te machʼatik ma xjuʼ ya sjokin sbaik ta wayel (1-30)
-
Mame skʼan ya yichʼ kʼayinbeyel stalel te cananeoetik (3)
-
Ya sjokin sbaik ta wayel te machʼatik ay bin yutoj sbaik (6-18)
-
Sjokinel ta wayel jtul ants te yak ta yilel schamel (19)
-
Winik te ya sjokin ta wayel yan winik (22)
-
Te machʼatik ya skuch sbaik sok chambalametik (23)
-
Te lumkʼinal yame xejtay lokʼel te machʼatik boloben skʼoplalik (24-30)
-
18 Te Jehová kʼopojxan sok te Moisés, jich la yalbey:
2 «Albeya yaʼiy te israeletik ini: ‹Joʼon Jehovaon te Dioson awuʼunik.
3 Mame jichuk atalelik te bin-utʼil te machʼatik ayik ta skʼinal Egipto te banti nainemex-ae. Jaʼnix jich mame jichuk xa apasik te bin ya spasik te machʼatik ayik ta skʼinal Canaán te banti ya kikʼex baele. Sok mame xa apasik te bin kʼayemik ta spasele.
4 Kʼotesaik ta pasel te bintik jchapoj, tʼunaik te mantaliletik kuʼun sok chʼuunaik spasel. Joʼon Jehovaon te Dioson awuʼunik.
5 Yame skʼan ya achʼuunik spasel te mantaliletik kuʼun sok te bintik jchapoj. Te machʼa ya spas yame xkuxin ta swenta-abi. Joʼon Jehovaon.
6 »›Mame ayuk machʼa ya xnoptsaj* ta stojol te machʼa ay bin yutoj sba sok swenta ya sjokin ta wayel. Joʼon Jehovaon.
7 Mame xa ajokin ta wayel te atat sok mame xa ajokin ta wayel te anane.* Jaʼ anan; mame xa ajokin ta wayel.
8 »›Mame xa ajokin ta wayel te yinam te atate. Melel yame xbolobtesbot skʼoplal te atate.
9 »›Mame xa ajokin ta wayel te awix o awijtsʼin, chikan teme jaʼ yantsil nichʼan te atat o jaʼ achʼix yuʼun te anane,* chikan teme ayin* ta na o ta yan lugar.
10 »›Mame xa ajokin ta wayel te yantsil nichʼan te akerem o te achʼix yuʼun te awantsil nichʼan, melel yame xbolob akʼoplal yuʼun.
11 »›Mame xa ajokin ta wayel te achʼix yuʼun te yinam te atat te jaʼ stsʼumbal te atat, melel jaʼ awix o awijtsʼin.
12 »›Mame xa ajokin ta wayel te swix o yijtsʼin te atate, melel jun-nax schʼichʼel sok te atate.
13 »›Mame xa ajokin ta wayel te swix o yijtsʼin te anane,* melel jun-nax schʼichʼel sok te anane.
14 »›Mame xa abolobtesbey skʼoplal te sbankil o yijtsʼin te atat te kʼalal ya ajokinbey ta wayel te yiname, melel jaʼ amejun.*
15 »›Mame xa ajokin ta wayel te awalib, melel jaʼ yinam te anichʼan. Mame xa ajokin ta wayel.
16 »›Mame xa ajokin ta wayel te yinam te abankil o awijtsʼin, melel yame xbolobtesbot skʼoplal yuʼun te abankil o awijtsʼin.
17 »›Mame xa ajokin ta wayel jtul ants soknix te achʼix yuʼun o te smamatak,* melel ay bintik yutoj sba sok. Kʼax ilobtik sba.
18 »›Mame xnujpunat sok te swix o yijtsʼin te awiname, melel yame skontrain sbaik. Mame xa ajokin ta wayel te bitʼil kuxulto te awiname.
19 »›Mame xnoptsajat* ta stojol jtul ants swenta ya ajokin ta wayel te kʼalal boloben skʼoplal ta skaj te yak ta yilel schamele.
20 »›Mame xa ajokin ta wayel te yinam yan winik, melel yame xbolob akʼoplal yuʼun.
21 »›Mame xa awakʼ ta majtanil ni jtuluk te atsʼumbal ta stojol te Mólek. Mame jichuk xa awakʼ ta bolobtesbeyel skʼoplal sbiil te Dios awuʼun. Joʼon Jehovaon.
22 »›Mame xa ajokin ta wayel jtul winik jich te bitʼil ya ajokin ta wayel jtul ants, melel kʼax ilobtik sba.
23 »›Mame ayuk jtuluk winik te ya skuch sba sok jkojtuk chambalam, melel yame xbolobtesbot skʼoplal yuʼun. Mame ayuk jtuluk ants te ya yakʼ sba ta kuchel yuʼun chambalam, melel ma staleluk te jich ya yichʼ pasel.
24 »›Mame xa awakʼ xbolob akʼoplal ta spasel spisil ini, melel jaʼ ya sbolobtes sba skʼoplalik yuʼun te nacionetik te ya jten lokʼel ta atojolik.
25 Jaʼ yuʼun, boloben skʼoplal te lumkʼinal sok ya kakʼbey castigo ta skaj te smule. Te lumkʼinal yame xejtay lokʼel te machʼatik ayik tey-a.
26 Pero, te jaʼex yame skʼan ya achʼuunik spasel te mantaliletik kuʼun sok te bintik jchapoj, mame xa apasik ni junuk te bintik ilobtik sba ini, manchukme jaʼ jtul israel o jtul jyanlum te yak ta nainel ta awolilik.
27 Melel spisil te bintik ilobtik sba-abi la spasik te machʼatik nainik ta nailal tey ta lumkʼinal, jaʼ yuʼun ta ora ini boloben skʼoplal te lumkʼinale.
28 Jich yuʼun, te lumkʼinal maba ya xejtayex lokʼel ta skaj te ya abolobtesbeyik skʼoplal jich te bin-utʼil ya yichʼik xejtayel lokʼel te nacionetik te nainik ta nailal tey-ae.
29 Teme ay machʼa ya spas junuk te bintik ilobtik sba-abi, yame yichʼ milel.
30 Yame skʼan ya akʼotesik ta pasel te bintik ay ta awentaik spasel ta jtojol te kʼalal maba ya atʼunik te bintik ilobtik sba la spasik te machʼatik nainik ta nailal tey-a, yuʼun jich maba ya abolobtes aba akʼoplalik-a. Joʼon Jehovaon te Dioson awuʼunik›».
Notaetik
^ Ta yantik variante «xjijtsʼaj», «xtijtsaj».
^ Ta yantik variante «ameʼe», «amamae».
^ Ta yantik variante «ameʼe», «amamae».
^ Ta yantik variante «pʼejkaj», «tojk».
^ Ta yantik variante «ameʼe», «amamae».
^ O «atia».
^ O «yantsil nichʼan te skerem-al o te achʼix yuʼun te yachʼixe».
^ Ta yantik variante «xjijtsʼajat», «xtijtsajat».
