Levítico 2:1-16
-
Te majtanil yuʼun sit awal tsʼunubil (1-16)
2 »›Teme ay machʼa ya yakʼ majtanil yuʼun sit awal tsʼunubil ta stojol te Jehová, yame skʼan te pasbil ta lekil harina. Yame skʼan ya smalbey aceite sok ya yakʼbey sakal pom ta sba.
2 Ta patil ya yichʼ bael ta stojol te snichʼnab te Aarón te jaʼik sacerdoteetik, jich te sacerdote ya stsak jojp te lekil harina te yichʼoj aceite sok sakal pom sok yame yakʼ te xtomet schʼailel ta sba te skajtajib chikʼbil majtanil swenta snaʼojibal. Jaʼ jun majtanil te ya yichʼ chikʼel ta stojol te Jehová te kʼax sumetnax yikʼe.*
3 Te jayeb majtanil ya xjil yuʼun te sit awal tsʼunubil jaʼme yuʼun ya xkʼot te Aarón sok te snichʼnab. Jaʼ mero chʼultesbil majtaniletik te ya yichʼ chikʼel ta stojol te Jehová.
4 »›Teme ya awakʼ majtanil yuʼun sit awal tsʼunubil te wobil ta horno, yame skʼan te pasbil ta lekil harina. Yame skʼan te jaʼuk rosca-pan te wotsʼbil ta aceite te maba yichʼoj levadura o jayal galletaetik te jaxbil ta aceite sok te maba yichʼoj levadura.
5 »›Teme jaʼ sit awal tsʼunubil te bin ya awakʼ ta majtanil te pasbil ta samet, yame skʼan te pasbil ta lekil harina te maba yichʼoj levadura sok te wotsʼbil ta aceite.
6 Yame skʼan ya yichʼ xetʼtiklanel sok yame skʼan ya amalbey aceite ta sba. Jaʼ jun majtanil yuʼun sit awal tsʼunubil.
7 »›Teme jaʼ sit awal tsʼunubil te bin ya awakʼ ta majtanil te pasbil ta cacerola, yame skʼan te pasbil ta lekil harina sok ta aceite.
8 Yame skʼan ya awichʼ bael ta stojol te Jehová te majtanil yuʼun sit awal tsʼunubil te pasbil sok te bintik la yichʼix albeyel skʼoplale, sok ya awakʼbey te sacerdote te jaʼ ya yichʼ bael ta skajtajib chikʼbil majtanil.
9 Te sacerdote ya stsak jtebuk te majtanil yuʼun te sit awal tsʼunubil swenta snaʼojibal sok ya yakʼ te xtomet schʼailel ta sba te skajtajib chikʼbil majtanil. Jaʼ jun majtanil te ya yichʼ chikʼel ta stojol te Jehová te kʼax sumetnax yikʼe.*
10 Te jayeb majtanil ya xjil yuʼun te sit awal tsʼunubil jaʼme yuʼun ya xkʼot te Aarón sok te snichʼnab. Jaʼ mero chʼultesbil majtaniletik te ya yichʼ chikʼel ta stojol te Jehová.
11 »›Mame xa awakʼbeyik ta stojol te Jehová majtanil yuʼun sit awal tsʼunubil te yichʼoj levadura, melel ma xjuʼ ya achikʼik swenta xtomet schʼailel te levadura ni jaʼuk te chab te jich ya xkʼot te bin-utʼil chikʼbil majtaniletik ta stojol te Jehová.
12 »›Ya xjuʼ ya awakʼik ta stojol te Jehová jich bitʼil majtanil yuʼun sba sit awal tsʼunubil, pero maba ya yichʼ akʼel ta skajtajib chikʼbil majtanil jich bitʼil majtanil te kʼax sumetnax* yikʼe.
13 »›Spisil te majtaniletik yuʼun sit awal tsʼunubil te ya awakʼe, yame skʼan yichʼojuk yatsʼamul. Mame xa awakʼ te maʼyuk yatsʼamul yuʼun te chapbilkʼop yuʼun te Dios awuʼun te sit awal tsʼunubil te ya awakʼ ta majtanile. Ta jujun buelta te ya awakʼ jun majtanil, yame skʼan yichʼojuk yatsʼamul.
14 »›Teme ya awakʼ ta majtanil ta stojol te Jehová te sba sit awal tsʼunubil awuʼun, yame skʼan te jaʼuk yachʼil sit awal tsʼunubil te bakubtesbil ta kʼajkʼ sok te chewbile. Jaʼme te majtanil yuʼun te sba sit awal tsʼunubil te yijixe.
15 Yame skʼan ya amalbey aceite sok ya awakʼbey sakal pom ta sba. Jaʼ jun majtanil yuʼun sit awal tsʼunubil.
16 Te sacerdote yame yakʼ te xtomet schʼailel jtebuk te sit awal tsʼunubil te chewbil, te aceite sok spisil te sakal pom yichʼoje. Jaʼ jun majtanil te ya yichʼ chikʼel ta stojol te Jehová.
Notaetik
^ Ta hebreo: «slamantes oʼtanile».
^ Ta hebreo: «slamantes oʼtanile».
^ Ta yantik variante «xjukʼetnax».
