Levítico 21:1-24
21 Te Jehová jaʼnix jich la yalbey te Moisés: «Jich xa awalbey te sacerdoteetik, te snichʼnab te Aarón: ‹Mame ayuk jtuluk sacerdote ya sbolobtes sba skʼoplal ta skaj te ya spik te machʼa ya xlaj ta slumale.
2 Pero, jich ya xjuʼ ya spas sok te machʼa jun-nax schʼichʼel soke jich bitʼil te snan,* stat, snichʼan, yantsil nichʼan sok te sbankil o yijtsʼin,
3 sok ya xjuʼ ya sbolobtes sba skʼoplal ta swenta te swix o yijtsʼin te mato tabil ta winik te sjokinojto ta nainel sok te mato nujpuneme.
4 Mame skʼan ya sbolobtes sba skʼoplal ta swenta jtul ants te jaʼ yinam jtul winik ta slumale.
5 Mame skʼan ya sjoxik* stsotsel sjolik ni jaʼuk ya setʼbeyik sniʼil yisimik ni jaʼuk ya sboj te sbakʼetalike.
6 Yame skʼan te chʼultesbilex ta sit te Dios awuʼunik sok mame skʼan ya abolobtesbeyik skʼoplal te Dios awuʼunike, melel jaʼik te machʼatik te ya yakʼik te majtaniletik te ya yichʼ chikʼel ta stojol te Jehová te jaʼ weʼelil* yuʼun te Dios yuʼunike. Yame skʼan te chʼultesbilex.
7 Mame xnujpunex sok j-antsinel* ants o jtul ants te boloben skʼoplal ni jaʼuk sok jtul ants te ijkitaybil yuʼun smamalal, melel te sacerdote chʼultesbil ta stojol te Dios yuʼune.
8 Yame skʼan ya achʼultes, melel jaʼ ya yakʼ te weʼelil ta stojol te Dios awuʼun. Yame skʼan te chʼultesbil ya xkʼot ta atojol, melel joʼon Jehovaon te chʼul Dioson te yakon schʼultesbelex.
9 »›Teme ya sbolobtes sba skʼoplal te yantsil nichʼan te sacerdote te kʼalal ya yakʼ sba ta antsinel, yak ta sbolobtesbeyel skʼoplal te state. Yame skʼan ya achikʼik.
10 »›Te mukʼul sacerdote te ay ta yolil te yermanotak te la yichʼ malel aceite ta sjol sok te ya xjuʼ ya slap te kʼuʼul ta swenta sacerdoteetik mame skʼan te chʼetel te stsotsel sjol sok mame skʼan te ya schʼiʼ* te skʼuʼ.
11 Mame skʼan ya xnoptsaj* ta stojol te machʼa ya xlaje, manchukme stat o snan* mame skʼan ya sbolobtes sba skʼoplal yuʼun.
12 Mame skʼan ya xlokʼ bael ta chʼul awilal sok mame skʼan ya sbolobtesbey skʼoplal te chʼul awilal yuʼun te Dios yuʼune, melel yichʼoj te señail te yakʼoj sba ta stojol te Dios, jaʼ te aceite te ya xtuun te kʼalal ay machʼa ya yichʼ tsael ta stojol te Diose. Joʼon Jehovaon.
13 »›Yame skʼan ya xnujpun sok jtul achʼix te maba tabil ta winike.
14 Mame skʼan ya xnujpun sok jtul meʼba ants, jtul ants te ijkitaybil, jtul ants te boloben skʼoplal o jtul j-antsinel* ants, yame skʼan ya xnujpun sok jtul achʼix te jun-nax slumalik te maba tabil ta winike.
15 Mame skʼan ya sbolobtesbey skʼoplal te stsʼumbal te ay ta yolil te lum yuʼune, melel joʼon Jehovaon te yakon schʼultesbelex›».
16 Te Jehová kʼopojxan sok te Moisés, jich la yalbey:
17 «Jich xa awalbey te Aarón: ‹Mame ayuk jtuluk ta atsʼumbal ta kajalkaj bael te ay bin ma lekuk ta sbakʼetal ya xjuʼ ya xnoptsaj* ta yakʼel te weʼelil ta stojol te Dios yuʼune.
18 Mame xjuʼ ya xnoptsaj* te machʼa ay bin ma lekuk ta sbakʼetal jich bitʼil ini: te ma xyil kʼinal o koxo, te ay bin jinem ta sit yelaw* o te najt jchʼixuk skʼab o yok,
19 te wakʼem* yok o skʼab,
20 te kʼujul spat o komil winik,* te ay bin ma lek ta sit, te ay schin, te ay bin chiknajem ta snujkulel o te ma lek te sbakʼ skʼunil sbakʼetal.
21 Mame ayuk jtuluk stsʼumbal te sacerdote Aarón te ay bin ma lekuk ta sbakʼetal te ya xnoptsaj* ta yakʼel majtaniletik te ya yichʼ chikʼel ta stojol te Jehová. Ta skaj te ay bin ma lekuk ta sbakʼetal mame xjuʼ te ya xnoptsaj ta yakʼel te weʼelil ta stojol te Dios yuʼune.
22 Ya xjuʼ ya sweʼ te weʼelil ta stojol te Dios te bintik mero chʼultesbil sok te bintik chʼultesbile.
23 Pero ma xjuʼ ya xnoptsaj* te banti ay te cortina sok te banti ay te kajtajibal, melel ay bin ma lekuk ta sbakʼetal. Mame skʼan ya sbolobtesbey skʼoplal te chʼul awilal kuʼun, melel joʼon Jehovaon te yakon schʼultesbelex›».
24 Jich yuʼun, te Moisés kʼopoj sok te Aarón, te snichʼnab sok spisil te israeletike.
Notaetik
^ Ta yantik variante «smeʼ», «smama».
^ Ta yantik variante «sjochik».
^ Jaʼ skʼoplal te milbil majtaniletik.
^ Ta yantik variante «jmulawil».
^ Ta yantik variante «xetʼ».
^ Ta yantik variante «xjijtsʼaj», «xtijtsaj».
^ Ta yantik variante «smeʼ», «smama».
^ Ta yantik variante «jmulawil».
^ Ta yantik variante «xjijtsʼaj», «xtijtsaj».
^ Ta yantik variante «xjijtsʼaj», «xtijtsaj».
^ Ta hebreo: «jinem sniʼ».
^ Ta yantik variante «kʼasem».
^ Jaʼniwan skʼoplal jtul winik te ma stalelukix te kʼax kom o kʼax jay ta skaj jun chamel.
^ Ta yantik variante «xjijtsʼaj», «xtijtsaj».
^ Ta yantik variante «xjijtsʼaj», «xtijtsaj».
