Levítico 23:1-44
-
Kʼajkʼaletik te chʼultesbilik sok kʼinetik (1-44)
-
Sábado (3)
-
Kʼin Pascua (4, 5)
-
Kʼin yuʼun pan te maba yichʼoj levadura (6-8)
-
Majtanil yuʼun sba sit te awal tsʼunubil (9-14)
-
Kʼin yuʼun Semanaetik (15-21)
-
Mame skʼan ya yichʼ tsobel spisil te sit awal tsʼunubil (22)
-
Kʼin yuʼun yokʼesinel trompetaetik (23-25)
-
Skʼajkʼalel stael perdón (26-32)
-
Kʼin yuʼun te axibal naetik (33-43)
-
23 Te Jehová kʼopojxan sok te Moisés, jich la yalbey:
2 «Kʼopona te israeletik sok jich xa awaltiklanbey: ‹Te kʼinetik te ya skʼan ya apasulanik ta stojol te Jehová jaʼme chʼul tsoblejetik. Jaʼik ini te kʼinetik ya skʼan ya apasulanik:
3 »›Ya xjuʼ ya x-aʼtejex wakeb kʼajkʼal, pero ta sjukebal kʼajkʼal jaʼ jun sábado te ya skʼan ya akux awoʼtanik, jaʼ jun chʼul tsoblej. Ma xjuʼ ya apasik biluk ta chajp aʼtelil. Jaʼ jun sábado ta swenta te Jehová chikan te banti ya xnainex.
4 »›Jaʼik ini te kʼinetik ya skʼan ya apasulanik ta stojol te Jehová, te chʼul tsoblejetik te ya skʼan ya apasik ta yorail te ya skʼan pasele.
5 Ta skʼajkʼalel 14 yuʼun te sbabial u, te kʼalal yakix ta ijkʼubel-a te kʼinale,* jaʼme te Kʼin Pascua yuʼun te Jehová.
6 »›Ta skʼajkʼalel 15 yuʼun te u-abi jaʼme te Kʼin yuʼun pan te maba yichʼoj levadura ta stojol te Jehová. Jukebme kʼajkʼal ya skʼan ya aweʼik pan te maba yichʼoj levadura.
7 Ta sbabial kʼajkʼal yame skʼan ya apasik chʼul tsoblej. Mame skʼan ya apasik tulan aʼtelil.
8 Ta jukeb kʼajkʼal yame awakʼik jun majtanil te ya yichʼ chikʼel ta stojol te Jehová. Ta sjukebal kʼajkʼal yame yichʼ pasel chʼul tsoblej. Mame skʼan ya apasik tulan aʼtelil›».
9 Te Jehová jich la yalbeyxan te Moisés:
10 «Kʼopona te israeletik sok jich xa awaltiklanbey: ‹Kʼalal ya x-ochex ta kʼinal te ya kakʼbeyex sok te atsobojikix-a te sit awal tsʼunubil awuʼunike, yame skʼan ya awichʼbeyik bael te sacerdote jtom te sba sit te awal tsʼunubil awuʼunike.
11 Talel kʼaxel yame sjimulan jtom te sba sit te awal tsʼunubil ta stojol te Jehová swenta lek ya awichʼik ilel-a. Te sacerdote yame skʼan ya sjimulan ta yan kʼajkʼal yuʼun te sábado.
12 Te bin kʼajkʼalil ya yichʼ jimulanele, yame skʼan ya awakʼik jkojt jkolel* tat tuminchij te maʼyuk schamel sok te juntonax yaʼbilal jich bitʼil chikʼbil majtanil ta stojol te Jehová.
13 Te majtanil ta swenta sit awal tsʼunubil jaʼme cheb ta slajunebal yuʼun te jun efá* yuʼun lekil harina te wotsʼbil ta aceite, jun majtanil te ya yichʼ chikʼel ta stojol te Jehová, te malbil majtanil yuʼun jaʼme jun ta schanebal hin* yuʼun vino.
14 Mame xa aweʼik pan, bakubtesbil sit awal tsʼunubil sok yachʼil sit awal tsʼunubil jaʼto te kʼalal ya awichʼik bael te smajtan te Dios awuʼunike. Jaʼ ini jaʼ jun mantalil te ma xlaj skʼoplal ta kajalkaj atsʼumbalik chikan banti ya xnainex.
15 »›Ta yan kʼajkʼal yuʼun te sábado, te bin kʼajkʼalil ya awichʼik bael te jtom sit awal tsʼunubil yuʼun te majtanil te ya yichʼ jimulanel, ya skʼan ya awajtayik jukeb sábado. Yame skʼan te tsʼakaluk te semanaetike.
16 Ta yan kʼajkʼal yuʼun te sjukebal sábado yame awajtayik 50 kʼajkʼal, tey-abi yame skʼan ya awakʼik jun majtanil yuʼun yachʼil sit awal tsʼunubil ta stojol te Jehová.
17 Chikan te banti yakex ta nainel yame skʼan ya awichʼik bael chaʼpejch panetik jich bitʼil majtanil te ya yichʼ jimulanel. Yame skʼan ya yichʼ pasel sok cheb ta slajunebal yuʼun te jun efá* yuʼun lekil harina te yichʼoj levadura sok te wobile. Jaʼik te sba sit awal tsʼunubil awuʼunik te lekikxan te ya awakʼik ta stojol te Jehová.
18 Te kʼalal ya awakʼik te pan jaʼnix jich ya skʼan ya awakʼik juk-kojt jkolel* tuminchijetik te juntonax yaʼbilalik te maʼyuk schamelik, jkojt jkolel toro sok chaʼkojt tat tuminchijetik. Yame yichʼik tuuntesel jich bitʼil chikʼbil majtanil ta stojol te Jehová te jun-nax ya yichʼik akʼel sok te majtanil yuʼun sit awal tsʼunubil sok te malbil majtaniletik yuʼunik, jun majtanil te ya yichʼ chikʼel ta stojol te Jehová te kʼax sumetnax yikʼe.*
19 Yame skʼan ya awakʼik jkojt jkolel* tat tentsun jich bitʼil majtanil ta swenta mulil soknix chaʼkojt jkolel tuminchij te juntonax yaʼbilalik jich bitʼil majtanil ta swenta lamalkʼinal.
20 Te sacerdote talel kʼaxel ya sjimulan te chaʼkojt jkolel* tuminchij soknix te panetik yuʼun te sba sit te awal tsʼunubil te lekikxan jich bitʼil majtanil te ya yichʼ jimulanel ta stojol te Jehová. Yame skʼan te chʼultesbil ya xkʼot ta stojol te Jehová, jaʼ te bin yuʼun ya xkʼot te sacerdotee.
21 Ta kʼajkʼalnix-abi yame skʼan ya yichʼ pasel chʼul tsoblej. Mame skʼan ya apasik tulan aʼtelil. Jaʼ ini jaʼ jun mantalil te ma xlaj skʼoplal ta kajalkaj atsʼumbalik chikan banti ya xnainex.
22 »›Te kʼalal ya atsobik te sit awal tsʼunubil awuʼunik, mame xa atsobik kʼalalto ta stiʼil te akʼinalik sok mame xa atsobik te bin jilemix awuʼunike. Yame skʼan ya awijkitaybeyik jilel te pobreetik sok te jyanlumetik. Joʼon Jehovaon te Dioson awuʼunik›».
23 Te Jehová jich la yalbeyxan te Moisés:
24 «Albeya yaʼiy te israeletik: ‹Ta sbabial kʼajkʼal yuʼun te sjukebal u yame skʼan ya akux awoʼtanik, jaʼ jun kʼajkʼal te ya yichʼ naʼel, jaʼ jun chʼul tsoblej te banti ya yichʼ akʼel ta naʼel ta swenta yokʼesinel trompetaetik.
25 Mame skʼan ya apasik tulan aʼtelil. Yame skʼan ya awakʼik jun majtanil te ya yichʼ chikʼel ta stojol te Jehová›».
26 Te Jehová jaʼnix jich la yalbey te Moisés:
27 «Pero, ta slajunebal kʼajkʼal yuʼun te sjukebal ue, jaʼme te Skʼajkʼalel stael perdón. Yame skʼan ya apasik chʼul tsoblej sok yame skʼan ya apejkʼan abaik,* yame skʼan ya awakʼik jun majtanil te ya yichʼ chikʼel ta stojol te Jehová.
28 Mame skʼan ya x-aʼtejex ta kʼajkʼal-abi, melel jaʼ skʼajkʼalel stael perdón yuʼun amulik ta stojol te Jehová te Dios awuʼunike.
29 Spisil te machʼa maba ya spejkʼan sba* ta kʼajkʼal-abi yame yichʼ milel.
30 Machʼauk-a te ya spas biluk aʼtelil ta kʼajkʼal-abi, joʼonme ya jlajin.
31 Mame xa apasik biluk aʼtelil. Jaʼ ini jaʼ jun mantalil te ma xlaj skʼoplal ta kajalkaj atsʼumbalik chikan banti ya xnainex.
32 Jaʼ jun sábado te ya skʼan ya akux awoʼtanik sok yame skʼan ya apejkʼan abaik ta sbalunebal kʼajkʼal ta u-abi ta xmal kʼajkʼal. Jaʼme sábado ya xkʼot awuʼunik ta xmal kʼajkʼal jaʼto ta yan xmal kʼajkʼal».
33 Te Jehová kʼopojxan sok te Moisés, jich la yalbey:
34 «Albeya yaʼiy te israeletik ini: ‹Ta skʼajkʼalel 15 yuʼun te sjukebal u yame xjajch ta pasel te Kʼin yuʼun te axibal naetik* ta stojol te Jehová, yame xjalaj jukeb kʼajkʼal.
35 Ta sbabial kʼajkʼal yame skʼan ya apasik chʼul tsoblej sok mame skʼan ya apasik tulan aʼtelil.
36 Ta jukeb kʼajkʼal yame awakʼik jun majtanil te ya yichʼ chikʼel ta stojol te Jehová. Ta swaxakebal kʼajkʼal yame skʼan ya apasik chʼul tsoblej sok yame skʼan ya awakʼik jun majtanil te ya yichʼ chikʼel ta stojol te Jehová. Jaʼ jun mukʼul tsoblej te kʼax mukʼ skʼoplal. Mame skʼan ya apasik tulan aʼtelil.
37 »›Jaʼ ini te kʼinetik te ya skʼan ya apasulanik ta stojol te Jehová te jaʼik chʼul tsoblejetik swenta ya awakʼik jun majtanil te ya yichʼ chikʼel ta stojol te Jehová: te chikʼbil majtanil, te majtanil yuʼun sit awal tsʼunubil ta swenta te milbil majtanil sok te malbil majtaniletik jaʼ chikan te jayeb ya yichʼ akʼel ta jujun kʼajkʼale.
38 Jaʼik-abi te bin ya skʼan ya awakʼbeyik te Jehová, parte te ya awakʼbeyik ta jujun sábado yuʼun te Jehová, te majtaniletik ya awakʼik, te majtaniletik ta swenta skʼotesel ta pasel yuʼun te bin jamal awalojik sok te majtaniletik te spasemal awoʼtan ya awakʼik.
39 Pero, ta skʼajkʼalel 15 yuʼun te sjukebal u te kʼalal atsobojikix-a te sit awal tsʼunubil, jukebme kʼajkʼal ya skʼan ya apasik kʼin ta stojol te Jehová. Te sbabial kʼajkʼal sok te swaxakebal kʼajkʼal yame skʼan ya akux awoʼtanik.
40 Ta sbabial kʼajkʼal yame skʼan ya atsobik te sit lekil teʼetik, yabinal palmeraetik, skʼabkʼab teʼetik te bayal yabinal sok álamo-teʼetik te ay ta spamlej, jukebme kʼajkʼal tseʼel awoʼtanik ta stojol te Jehová te Dios awuʼunik.
41 Jukebme kʼajkʼal ta jaʼbil ya skʼan ya apasik te kʼin ta stojol te Jehová. Yame skʼan ya apasik ta sjukebal u. Jaʼ jun mantalil te ma xlaj skʼoplal ta kajalkaj atsʼumbalik.
42 Jukebme kʼajkʼal ya skʼan ya xnainex ta axibal naetik. Spisil te machʼatik jaʼik israeletik yame skʼan ya xnainik ta axibal naetik.
43 Swenta ya snaʼik te atsʼumbalik ta pajel chaʼbej te la kakʼ nainukik ta axibal naetik te israeletik te kʼalal la jlokʼesik tal ta Egipto. Joʼon Jehovaon te Dioson awuʼunik›».
44 Jich yuʼun, te Moisés kʼopoj sok te israeletik ta swenta te kʼinetik te ya skʼan ya spasulanik ta stojol te Jehová.
Notaetik
^ Jich yilel te jaʼ te kʼalal malix-a te kʼajkʼal sok te ya x-ochix ta ijkʼubel-a te kʼinale.
^ Ta yantik variante «jchʼiel».
^ Jaʼ 4.4 litro. Ilawil ta apéndice, B14.
^ Jaʼ 917 mililitro. Ilawil ta apéndice, B14.
^ Jaʼ 4.4 litro. Ilawil ta apéndice, B14.
^ Ta yantik variante «jchʼiel».
^ Ta hebreo: «slamantes oʼtanile».
^ Ta yantik variante «jchʼiel».
^ Ta yantik variante «jchʼiel».
^ Jteb ma spisiluk-ora te kʼalal ya yichʼ alel ya apejkʼan abaik, jaʼ skʼoplal te bayal ta chajp te bitʼil ay machʼa ya slokʼes sba ta yoʼtan, junuk jaʼ te ya skom sweʼel.
^ O jaʼniwan ya skʼan ya yal «skom sweʼel».
^ Jaʼ skʼoplal naetik te cheʼoxebnax kʼajkʼal ya yichʼ tuuntesel.
