Levítico 24:1-23
24 Te Jehová kʼopojxan sok te Moisés, jich la yalbey:
2 «Yame skʼan ya awalbey ta mantal te israeletik te akʼa yichʼbatik tal batsʼil aceite yuʼun oliva yuʼun ya yichʼ tsumel te yawil kʼajkʼetik te jich spisil-ora ya xojobtes te kʼinale.
3 Jaʼme ay ta swenta te Aarón te tsumuluk yuʼun te yawil kʼajkʼetik ta nailpakʼ ta swenta tsoblej te ay ta jejch yuʼun te cortina te ay ta stojol bael te skaxaul Testigo Kʼop. Yame skʼan te tsumul yuʼun ta stojol Jehová ta xmal kʼajkʼal jaʼto kʼalal ta sab. Jaʼ ini jaʼ jun mantalil te ma xlaj skʼoplal ta kajalkaj stsʼumbal.
4 Yame skʼan te spisiluk-ora chapaluk yuʼun te yawil kʼajkʼetik te ay ta skajtajib kʼajkʼ te pasbil ta batsʼil oro te ay ta stojol te Jehová.
5 »Tsaka te lekil harina sok pasa 12 ta sejp wobil rosca-panetik. Tuuntesa cheb ta slajunebal yuʼun te jun efá* ta swenta jujunsejp.
6 Chaʼchol moel xa awakʼ te rosca-panetik sok wakpejch ta jujunchol tey ta sba te mesa te pasbil ta batsʼil oro te ay ta stojol te Jehová.
7 Yame skʼan ya awakʼbey batsʼil sakal pom ta sba te jujunchol panetik, jich ya xkʼot te bitʼil snaʼojibal, jun majtanil te ya yichʼ chikʼel ta stojol te Jehová.
8 Ta jujun sábado yame skʼan ya scholan te panetik ta stojol te Jehová. Jaʼ ini jaʼ jun chapbilkʼop te ma xlaj skʼoplal ta stojol te israeletik.
9 Jaʼme yuʼun ya xkʼot te Aarón sok te snichʼnab, yame skʼan ya sweʼik ta jun lugar te chʼultesbil, melel mero chʼultesbil ya xkʼot ta stojol te majtaniletik te ya yichʼ chikʼel ta stojol te Jehová. Jaʼ jun mantalil te ma xlaj skʼoplal».
10 Ta yolil te israeletik ay jtul winik te jaʼ yal jtul israel-ants, pero egipcio-winik te state; te winik-abi jajch smaj sba sok jtul israel-winik ta campamento.
11 Te yal te israel-ants jajch sbolkʼoptay sok sbolobtesbey skʼoplal te sbiil te Diose.* Jaʼ yuʼun la yikʼik bael ta stojol te Moisés. Te snan* Selomit sbiil te jaʼ snichʼan te Dibrí, te talem ta stsʼumbal Dan.
12 La yichʼ chukel jaʼto te kʼalal la yichʼ naʼel te bin la sta ta nopel te Jehová.
13 Tey-abi, te Jehová jich la yalbey te Moisés:
14 «Lokʼesa ta fuera yuʼun te campamento te machʼa la sbolobtesbey skʼoplal te jbiil. Spisil te machʼatik la yaʼiyik stojol yame skʼan ya skajan skʼabik ta sjol te winik, ta patil spisil te lum yame skʼan ya schʼojik ta ton.
15 Jichme ya skʼan ya awalbey te israeletik: ‹Teme ay machʼa ya sbolobtesbey skʼoplal te Dios yuʼune, yame skʼan ya stoj te smule.
16 Jaʼ yuʼun, te machʼa ya sbolkʼoptaybey sbiil te Jehová yame skʼan ya yichʼ milel. Yame skʼan ya yichʼ chʼojel ta ton yuʼun spisil te lume. Chikan teme jyanlum o jtul israel yame skʼan ya yichʼ milel ta skaj te ya sbolkʼoptay te sbiil te Diose.
17 »›Teme ay machʼa ya smil jtul ants winik yame skʼan ya yichʼ milel-euk.
18 Machʼauk-a te ya yejchentes jkojt alakʼil chambalam* te ya xlaj yuʼun, yame skʼan ya yakʼbey sjelol te chambalam-abi.
19 Teme ay machʼa ya yejchentes spatxujk, jaʼnixme jich ya skʼan pasbeyel-euk.
20 Teme ay machʼa la swakʼbey* sbakel, teme ay machʼa la stʼusbey te sit, teme ay machʼa la slokʼesbey te sbakel ye; jaʼnixme jich ya skʼan ya yichʼ pasbeyel-euk.
21 Teme ay machʼa ya yejchentes jkojt chambalam te ya xlaj yuʼun, yame skʼan ya yakʼbey sjelol, pero teme ay machʼa ya yejchentes jtul ants winik te ya xlaj yuʼun, yame skʼan ya yichʼ milel.
22 »›Pajalme ya skʼan ya akʼotesik ta pasel te bintik jchapoj ta stojol te jyanlumetik sok te israeletik, melel joʼon Jehovaon te Dioson awuʼunik›».
23 Tey-abi, te Moisés kʼopoj sok te israeletik, jich la slokʼesik bael ta fuera yuʼun te campamento te machʼa la sbolobtesbey skʼoplal sbiil te Dios sok la schʼojik ta ton. Te israeletik mero jich la spasik te bitʼil la yal ta mantal te Jehová ta swenta te Moisés.
Notaetik
^ Jaʼ 4.4 litro. Ilawil ta apéndice, B14.
^ Jaʼ skʼoplal te biilil Jehová jich bitʼil ya yakʼ ta naʼel te versículo 15 sok 16.
^ Ta yantik variante «smeʼ», «smama».
^ Jaʼ te chambalam te ma xtiʼawan.
^ Ta yantik variante «skʼasbey».
