Levítico 27:1-34
27 Te Jehová kʼopojxan sok te Moisés, jich la yalbey:
2 «Kʼopona te israeletik sok jich xa awaltiklanbey: ‹Teme ay machʼa ay bin mukʼ skʼoplal ya yalbey ta jamal te Jehová te jaʼ ya yakʼbey stojol jtul ants winik,
3 te stojol ya xkʼot jtul winik te 20 kʼalal 60 yaʼbilal jaʼ 50 siclo* yuʼun plata, jaʼ chikan te jayeb siclo ya yichʼ tuuntesel ta chʼul awilal.
4 Pero, teme jaʼ jtul ants jaʼ 30 siclo* yuʼun plata ya xkʼot te stojole.
5 Teme joʼeb kʼalal 20 yaʼbilal te ants winik, te jayeb stojol ya xkʼot te winik jaʼ 20 siclo* yuʼun plata, yan te antse 10 siclo* yuʼun plata.
6 Teme ay jun u kʼalal joʼeb yaʼbilal, te jayeb stojol ya xkʼot te chʼin kerem jaʼ joʼeb siclo* yuʼun plata, yan stukel te chʼin achʼixe jaʼ oxeb siclo* yuʼun plata.
7 »›Teme 60 yaʼbilal o kʼaxemxan, te jayeb stojol te winik jaʼ 15 siclo* yuʼun plata, yan te antse 10 siclo* yuʼun plata.
8 Pero, teme ay machʼa jkʼaxel pobre te ma xjuʼ ya stoj te bin jamal ya yal ta swenta te jayeb stojol albil skʼoplale, yame stejkʼan sba ta stojol te sacerdote, jich te sacerdote ya yal te jayeb stojol ya xkʼot, jaʼ chikan te jayeb ya xjuʼ yuʼun stojel te machʼa ay bin jamal la yale.
9 »›Teme ta swenta te bin la awal ta jamal ya skʼan ya awakʼ jkojt chambalam te lek ya yil te Jehová, chikan bin-a te ya yichʼ akʼbeyel te Jehová chʼultesbilme ya xkʼot.
10 Ma xjuʼ ya yichʼ jelel jkojt chambalam te lek ta yan te ma leke ni jaʼuk jkojt chambalam te ma lek ta yan te leke, pero teme aynix la yichʼ jelel jkojt chambalam ta yan, te sbabial chambalam te la yichʼ akʼel sok te la yichʼ jelel-ae chʼultesbilme ya xkʼotik.
11 Teme jaʼ jkojt chambalam te boloben skʼoplal te ma xjuʼ ta akʼel jich bitʼil majtanil ta stojol te Jehová, yame yichʼ akʼel ta stojol te sacerdote te chambalame.
12 Te sacerdote jaʼme ya yal te jayeb stojol jaʼ chikan teme lek o ma lekuk te chambalame, jichme stojol ya xkʼot jaʼ chikan te jayeb stojol ya yal te sacerdote.
13 Pero, te machʼa ay bin jamal la yal ya skʼan ya schaʼman te chambalam, yame skʼan ya yakʼ junxan ta yoʼebal te stojole.
14 »›Teme ay machʼa ya schʼultes te sna sok ya yakʼbey jich te bitʼil chʼultesbil ta stojol te Jehová, te sacerdote jaʼme ya yal te jayeb stojol jaʼ chikan teme lek o ma lekuke, jichme stojol ya xkʼot jaʼ chikan te jayeb stojol ya yal te sacerdote.
15 Pero, teme te machʼa la schʼultes te sna ya skʼan ya schaʼman, yame skʼan ya yakʼ junxan ta yoʼebal te stojole, jich ya yuʼunin yan buelta te snae.
16 »›Teme ay machʼa ya schʼultes junuk parte skʼinal ta stojol te Jehová, te stojol ya xkʼot jaʼ chikan te jayeb sit awal tsʼunubil ya xtuun swenta ya yichʼ tsʼunel. Te jujun homer* yuʼun sit cebada jaʼ 50 siclo* yuʼun plata.
17 Teme ya schʼultes te kʼinal ta yorail te jaʼbil yuʼun Jilel ta libre, mame xjelon te stojole.
18 Teme ya schʼultes te kʼinal te kʼalal kʼaxemix-a te jaʼbil yuʼun Jilel ta libre, te sacerdote yame yal jayeb stojol jaʼ chikan te jayebxan jaʼbil ya skʼan ya sta te yan jaʼbil yuʼun Jilel ta libre, jichme ya xpejkʼaj te stojole.
19 Pero, teme ay bin-ora te machʼa la schʼultes te kʼinal ya skʼan ya schaʼman, yame skʼan ya yakʼ junxan ta yoʼebal te stojole, jich ya yuʼunin yan buelta te kʼinale.
20 Yan teme maba ya schaʼman te kʼinal te jich ya yichʼ chonbeyel yan winik, ma xjuʼ ya yichʼ chonel yan buelta.
21 Te kʼalal ya xjil ta libre te kʼinal ta jaʼbil yuʼun Jilel ta libre, chʼultesbilme ya xkʼot ta stojol te Jehová, jich ya yichʼ akʼel te kʼinal ta stojol. Jaʼme yuʼun ya xkʼot te sacerdoteetik.
22 »›Teme ay machʼa ya schʼultes ta stojol te Jehová te skʼinal smanoj te ma jaʼuk te kʼinal akʼbile,
23 te sacerdote yame yal te jayeb stojol jaʼ chikan te jayebxan jaʼbil ya skʼan ya sta te yan jaʼbil yuʼun Jilel ta libre, yame yal te jayeb stojol ta kʼajkʼalnix-abi. Chʼultesbilme ya xkʼot ta stojol te Jehová.
24 Ta jaʼbil yuʼun Jilel ta libre, te kʼinal ya sujt ta stojol te machʼa la schon te jaʼnix yuʼun-ae.
25 »›Te jayeb stojol ya xlokʼ spisil te winiketik ya yichʼ pʼisel jaʼ chikan te jayeb siclo ya yichʼ tuuntesel ta chʼul awilal. Te siclo ya skʼan te jaʼ pajal sok 20 guerá.*
26 »›Pero, te jaʼex mame skʼan te ay machʼa ya awakʼik* ta stojol te sba yal te chambalametik, melel jaʼ yuʼunix te Jehová. Chikan teme toro o tuminchij, melel jaʼ yuʼunix te Jehová.
27 Yan teme jaʼ jkojt chambalam te boloben skʼoplal te ya stoj lokʼel jaʼ chikan te jayeb stojol la yichʼ albeyel skʼoplal, yame skʼan ya yakʼ junxan ta yoʼebal te stojole. Pero, teme maʼyuk machʼa ya schaʼman, ya yichʼ chonel jaʼ chikan te jayeb stojol la yichʼ albeyel skʼoplal.
28 »›Pero mame ayuk machʼa te ay bin jkʼaxel yakʼoj ta stojol te Jehová ta spisil te bintik ay yuʼun te ya xjuʼ ya yichʼ chonel o ya xjuʼ ya yichʼ chaʼmanel, chikan teme jaʼ ants winik, chambalam o kʼinal. Merome chʼultesbil spisil te bin akʼbil ta stojol te Jehová.
29 Jaʼnix jich ma xjuʼ ya yichʼ manel lokʼel te machʼa parte akʼbil yuʼun ya yichʼ lajinel. Yananixme yichʼ milel-a.
30 »›Spisil te jun ta slajunebal te bin ya xlokʼ ta lumkʼinal, chikan teme sit awal tsʼunubil o sit teʼetik, jaʼme yuʼun te Jehová. Jaʼ te bin chʼultesbil ta stojol te Jehová.
31 Teme ay machʼa ya skʼan ya schaʼman te jun ta slajunebal te bin la yakʼe, yame yakʼ junxan ta yoʼebal te stojole.
32 Spisil te jun ta slajunebal te chambalametik, chikan teme wakax, tuminchij o tentsun te ya xkʼax ta yeʼtal snabateʼ te jkanantuminchij chʼultesbil ya xkʼot ta stojol te Jehová.
33 Maba ya skʼan ya yichʼ ilel teme lek o maba lek te chambalam sok maba ya skʼan ya yichʼ jelel. Pero, teme aynix la yichʼ jelel te chambalame, te sbabial chambalam te la yichʼ akʼel sok te la yichʼ jelel-ae chʼultesbilme ya xkʼotik. Ma xjuʼ ya yichʼik chaʼmanel›».
34 Jaʼik ini te mantaliletik te akʼbot yuʼun Jehová te Moisés ta wits Sinaí ta stojol te israeletik.
Notaetik
^ Jaʼ 570 gramo. Ilawil ta apéndice, B14.
^ Jaʼ 342 gramo. Ilawil ta apéndice, B14.
^ Jaʼ 228 gramo. Ilawil ta apéndice, B14.
^ Jaʼ 114 gramo.
^ Jaʼ 57 gramo. Ilawil ta apéndice, B14.
^ Jaʼ 34.2 gramo.
^ Jaʼ 171 gramo. Ilawil ta apéndice, B14.
^ Jaʼ 114 gramo.
^ Jaʼ 220 litro. Ilawil ta apéndice, B14.
^ Jaʼ 570 gramo. Ilawil ta apéndice, B14.
^ Jaʼ 11.4 gramo. Ilawil ta apéndice, B14.
^ O «achʼultesik».
