Levítico 3:1-17
3 »›Teme ay machʼa ya skʼan ya yakʼ swakax ta milbil majtanil ta swenta lamalkʼinal, chikan teme stat o smeʼ, yame skʼan te manchuk ay schamel te chambalam te ya yakʼ ta stojol te Jehová.
2 Yame skʼan ya skajan skʼab ta sjol te majtanil sok yame skʼan ya yichʼ milel ta yochibal te nailpakʼ ta swenta tsoblej. Te snichʼnab te Aarón te jaʼik sacerdoteetik yame stsijtsinik te schʼichʼel ta sjoyobal te skajtajib chikʼbil majtanil.
3 Yame yakʼ jtebuk te milbil majtanil ta swenta lamalkʼinal jich bitʼil jun majtanil te ya yichʼ chikʼel ta stojol te Jehová. Yame yakʼ te sjujpʼel* te potsol-a te sbikil sok spisil te sjujpʼel te lapʼal ta sbikil,
4 jaʼnix jich te cheb sriñon sok te sjujpʼel* te potsol-a sok te nopol* ay ta slomo. Jaʼnix jich yame slokʼesbey te sjujpʼel te potsol-a te sejkub.
5 Te snichʼnab Aarón yame yakʼ te xtomet schʼailel spisil ta skajtajib chikʼbil majtanil ta sba te chikʼbil majtanil te ay ta siʼ te yak ta tilel. Jaʼ jun majtanil te ya yichʼ chikʼel ta stojol te Jehová te kʼax sumetnax yikʼe.*
6 »›Teme ay machʼa ya skʼan ya yakʼ stuminchij o stentsun ta stojol te Jehová jich bitʼil milbil majtanil ta swenta lamalkʼinal, yame skʼan te maʼyuk schamel te chambalam chikan teme stat o smeʼ.
7 Teme ya yakʼ ta majtanil jkojt jkolel* tat tuminchij, yame skʼan ya yakʼ ta stojol te Jehová.
8 Yame skajan te skʼab ta sjol te majtanil yuʼun, yame yichʼ milel ta yelaw te nailpakʼ ta swenta tsoblej. Te snichʼnab Aarón yame stsijtsinik te schʼichʼel ta sjoyobal te skajtajib chikʼbil majtanil.
9 Yame yakʼ te sjujpʼel* te milbil majtanil ta swenta lamalkʼinal jich bitʼil jun majtanil te ya yichʼ chikʼel ta stojol te Jehová. Yame slokʼesbey spisil te sjujpʼel ta schʼixil te sne teyto te banti ya xlokʼ tal, te sjujpʼel te potsol-a te sbikil sok spisil te sjujpʼel te lapʼal ta sbikil,
10 jaʼnix jich te cheb sriñon sok te sjujpʼel* te potsol-a sok te nopol* ay ta slomo. Jaʼnix jich yame slokʼesbey te sjujpʼel te potsol-a te sejkub.
11 Te sacerdote yame yakʼ te xtomet schʼailel spisil ta sba te skajtajib chikʼbil majtanil. Te weʼelil-abi,* jaʼ jun majtanil te ya yichʼ chikʼel ta stojol te Jehová.
12 »›Teme ay machʼa ya yakʼ jkojt tentsun, yame skʼan ya yakʼ ta stojol te Jehová.
13 Yame skajan te skʼab ta sjol te majtanil, yame yichʼ milel ta yelaw te nailpakʼ ta swenta tsoblej. Te snichʼnab Aarón yame skʼan ya stsijtsinik te schʼichʼel ta sjoyobal te skajtajib chikʼbil majtanil.
14 Te bin ya yakʼ jich bitʼil jun majtanil te ya yichʼ chikʼel ta stojol te Jehová jaʼ te sjujpʼel* te potsol-a te sbikil sok spisil te sjujpʼel te lapʼal ta sbikil,
15 jaʼnix jich te cheb sriñon sok te sjujpʼel* te potsol-a sok te nopol* ay ta slomo. Jaʼnix jich yame slokʼesbey te sjujpʼel te potsol-a te sejkub.
16 Te sacerdote yame yakʼ te xtomet schʼailel spisil ta sba te skajtajib chikʼbil majtanil. Te weʼelil-abi,* jaʼ jun majtanil te ya yichʼ chikʼel te kʼax sumetnax* yikʼe. Spisil te sjujpʼel* te chambalam jaʼ yuʼun te Jehová.
17 »›Jaʼ ini jaʼ jun mantalil te ma xlaj skʼoplal ta kajalkaj stsʼumbalik chikan te banti ya xnainik: mame ayuk bin-ora ya aweʼbeyik sjujpʼel* sok schʼichʼel te chambalame›».
Notaetik
^ Ta yantik variante «xepuil».
^ Ta yantik variante «xepuil».
^ Ta yantik variante «tijil».
^ Ta hebreo: «slamantes oʼtanile».
^ Ta yantik variante «jchʼiel».
^ Ta yantik variante «xepuil».
^ Ta yantik variante «tijil».
^ Ta yantik variante «xepuil».
^ Jaʼ skʼoplal te bin ya yichʼ akʼel ta milbil majtanil ta swenta lamalkʼinal ta stojol te Dios.
^ Ta yantik variante «xepuil».
^ Ta yantik variante «xepuil».
^ Ta yantik variante «tijil».
^ Jaʼ skʼoplal te bin ya yichʼ akʼel ta milbil majtanil ta swenta lamalkʼinal ta stojol te Dios.
^ Ta yantik variante «xyukʼetnax».
^ Ta yantik variante «xepuil».
^ Ta yantik variante «xepuil».
