Levítico 5:1-19
5 »›Teme ay machʼa la sta smul ta swenta te la yichʼ ikʼel ta testigoil* ta skaj te ay bin la yil o ay bin la yaʼiy stojol, pero maba ya yakʼ ta naʼel, yame skʼan ya stoj te smule.
2 »›O, teme ay machʼa ya spik te bin boloben skʼoplal, chikan teme chamen sbakʼetal jtiʼawal chambalam te boloben skʼoplal, alakʼil chambalam* te boloben skʼoplal o chʼin chambalam* te ay ta balumilal te boloben skʼoplal, te ants winik-abi boloben skʼoplal sok staoj smul ya xkʼot, manchukme ma snaʼoj-a.
3 O, teme ay machʼa ma la snaʼ te la spik te bin boloben skʼoplal yuʼun te ants winiketik —chikan teme ants winik o biluk te boloben skʼoplal te ya xjuʼ ya xbolobtesbot skʼoplal yuʼune—, pero ta patil la snaʼ stojol, jaʼme smul ya xkʼot-abi.
4 »›Teme ay machʼa oranax ya yal ta jamal te ay bin ya skʼotes ta pasel —chikan teme lek o ma lekuk, maʼyuk skʼoplal-abi— te maba la snaʼ stojol, pero ta patil la snaʼ te oranax ay bin la yal ta jamal, jaʼme smul ya xkʼot-abi.*
5 »›Teme ay machʼa ya sta smul ta swenta te muliletik la yichʼix alele, yame skʼan ya yal ta jamal te bin mulil la stae.
6 Jaʼnix jich yame skʼan ya yichʼ bael ta stojol te Jehová te majtanil ta swenta chʼayel ta skaj te smul la stae, jaʼ te jkojt jkolel* smeʼ tuminchij o jkojt jkolel smeʼ tentsun. Jich te sacerdote yame yakʼ te ya sta perdón yuʼun te smule.
7 »›Pero, teme maʼyuk stojol yuʼun ya sman jkojt tuminchij o jkojt tentsun, yame skʼan ya yichʼ bael ta stojol te Jehová chaʼkojt xpuliwok* o chaʼkojt jkolel stsumut* jich bitʼil majtanil ta swenta chʼayel ta skaj te smul la stae, te jkojte jaʼ ta swenta te majtanil ta swenta mulil, te yane jaʼ ta swenta chikʼbil majtanil.
8 Yame skʼan ya yichʼ bael te chʼin mutetik ta stojol te sacerdote te jaʼ nail ya yakʼ te majtanil ta swenta mulil. Yame stuchʼbey ta yejkʼach te snukʼe, pero mame jkʼaxeluk ya xotʼbey* lokʼel te sjole.
9 Yame stsijtsin jtebuk te schʼichʼel te majtanil ta swenta mulil ta sjoyobal te kajtajibal, pero yame yichʼ malel te chʼichʼ te jilxan ta banti yok te kajtajibale. Jaʼme majtanil ta swenta mulil.
10 Yame yakʼ te yan chʼin mut ta chikʼbil majtanil jich te bitʼil ay ta pasele. Te sacerdote yame yakʼ te ya sta perdón yuʼun te smul, jichme ya yichʼ pasbeyel perdón.
11 »›Pero, teme maʼyuk stojol yuʼun ya sman chaʼkojt xpuliwok* o chaʼkojt jkolel stsumut* yame skʼan ya yichʼ bael jun ta slajunebal yuʼun te jun efá* yuʼun lekil harina swenta ya yakʼ jich bitʼil majtanil ta swenta mulil. Mame skʼan ya smalbey aceite sok mame yakʼbey sakal pom ta sba, melel jaʼ jun majtanil ta swenta mulil.
12 Yame yichʼ bael te majtanil ta stojol te sacerdote, jich te sacerdote ya stsak jojp te lekil harina ta swenta snaʼojibal sok yame yakʼ te xtomet schʼailel ta kajtajibal ta sba te majtaniletik te ya yichʼ chikʼel ta stojol te Jehová. Jaʼme majtanil ta swenta mulil.
13 Te sacerdote yame yakʼ te ya sta perdón yuʼun te smul chikan te bin mulil te la yichʼix albeyel skʼoplale, jichme ya yichʼ pasbeyel perdón. Te jayeb majtanil ya xjil jaʼme yuʼun ya xkʼot te sacerdote jich bitʼil te majtanil yuʼun te sit awal tsʼunubil›».
14 Te Jehová kʼopojxan sok te Moisés, jich la yalbey:
15 «Teme ay machʼa ma yolojuk la sta smul ta swenta te bintik chʼultesbil yuʼun te Jehová, yame skʼan ya yichʼ bael ta stojol te Jehová jkojt tat tuminchij te maʼyuk schamel jich bitʼil majtanil ta swenta chʼayel. Te jayeb siclo* yuʼun plata ya yichʼ pʼisel jaʼ chikan te jayeb siclo ya yichʼ tuuntesel ta chʼul awilal.
16 Yame stoj te smul la sta ta swenta te chʼul awilal jaʼnix jich yame yakʼ jun ta yoʼebal te stojole. Jaʼme ya yakʼbey spisil te sacerdote yuʼun jaʼ ya yakʼ te ya sta perdón ta swenta te tat tuminchij te ya yakʼ ta majtanil ta swenta chʼayel, jichme ya yichʼ pasbeyel perdón.
17 »Teme ay machʼa ma yolojuk la sta smul sok te ay bin la spas te yaloj te Jehová te ma xjuʼ ta pasel, aynanixme smul-a, jich yuʼun yame skʼan ya stoj te smule.
18 Yame skʼan ya yichʼ bael ta stojol te sacerdote jkojt tat tuminchij te maʼyuk schamel jaʼ chikan te jayeb stojol ya yichʼ kʼanel yuʼun te majtanil ta swenta chʼayel. Jaʼ yuʼun, te sacerdote yame yakʼ te ya sta perdón yuʼun te smul te ma yolojuk la spase, jichme ya yichʼ pasbeyel perdón.
19 Jaʼme majtanil ta swenta chʼayel. Ta mero melel la sta smul ta stojol te Jehová».
Notaetik
^ Jaʼniwan skʼoplal te ay bin ya yichʼ alel ta swenta jun mulil te smajokbey skʼoplal te ya yichʼ bolkʼoptayel te machʼa la spas te mulil o ta stojol te testigo teme ma skʼan ya yal te bin la yil o te bin la yaʼiy stojol.
^ Jaʼ te chambalam te ma xtiʼawan.
^ Jaʼniwan skʼoplal te chʼin chambalametik te jtsojbnax ya yakʼ sbaik.
^ Jich yilel te jaʼ skʼoplal te machʼa maba ya skʼotes ta pasel te bin ya yal ta jamale.
^ Ta yantik variante «jchʼiel».
^ O «tórtola».
^ O «paloma».
^ Ta yantik variante «skʼokbey».
^ O «tórtola».
^ O «paloma».
^ Jaʼ 2.2 litro. Ilawil ta apéndice, B14.
^ Te jun siclo jaʼ 11.4 gramo. Ilawil ta apéndice, B14.
