Levítico 6:1-30
6 Te Jehová jich la yalbey te Moisés:
2 «Teme ay machʼa ya sta smul sok te ma junukix yoʼtan ya yakʼ sba ta stojol te Jehová ta skaj te ya sloʼlay te spatxujk yuʼun ay bin akʼbot swentain o ay bin akʼbot jilel ta skʼab o teme ay bin la yelkʼanbey o la spojbey
3 o ya smuk ta yoʼtan te la sta te bin chʼayeme, pero teme ya yal ta jamal te maba skʼotesoj ta pasel biluk te mulil-abi, yame skʼan ya spas ini:
4 teme yuʼun-nix la spas-a te mulil te jaʼ smul kʼot, yame skʼan ya sujtes te bin la yelkʼan, te bin la sta ta swenta loʼlaywanej, ta swenta pojel, te bin akʼbot swentain, te bin la sta te chʼayeme
5 o chikan te bin la yal ta jamal ta lot, yame skʼan te tsʼakal ya yakʼbey sjelol sok yame skʼan ya yakʼbey junxan ta yoʼebal te stojole. Yame yakʼbey te yajwal te bin kʼajkʼalil ya yichʼ naʼel te yuʼun-nix jaʼ smul-ae.
6 Yame skʼan ya yichʼ bael ta stojol te sacerdote jkojt tat tuminchij te maʼyuk schamel jich bitʼil majtanil ta swenta chʼayel ta stojol te Jehová jaʼ chikan te jayeb stojol ya yichʼ kʼanel yuʼun ya yakʼ jich bitʼil majtanil ta swenta chʼayel ta stojol Dios.
7 Te sacerdote yame yakʼ te ya sta perdón yuʼun te smul ta stojol te Jehová, jichme ya yichʼ pasbeyel perdón ta swenta chikan biluk mulil te la spase».
8 Te Jehová kʼopojxan sok te Moisés, jich la yalbey:
9 «Albeya te Aarón sok te snichʼnab te mantalil ini: ‹Jaʼ ini jaʼ te ley ta swenta te chikʼbil majtanile. Te chikʼbil majtanil yame xjil sjunal ajkʼabal ta kʼajkʼ te ay ta kajtajibal, jich maba ya xtupʼ te kʼajkʼ te ay ta kajtajibal.
10 Te sacerdote ya slap te kʼuʼul pakʼal ta swenta sacerdote te pasbil ta lino, yame slap te skomil wex te pasbil ta lino-euk swenta ya smuk te sbakʼetale. Ta patil yame sjop lokʼel te stanul te chikʼbil majtanil te laj ta kʼajkʼ te ay ta sba te kajtajibal, yame yakʼ ta stsʼeel te kajtajibal.
11 Tey-abi yame sjel te skʼuʼ sok ya yichʼ bael te stanul kʼajkʼ ta fuera yuʼun te campamento ta jun lugar te ma boloben skʼoplale.
12 Yame skʼan te spisil-ora yak ta tilel te kʼajkʼ ta kajtajibal. Mame skʼan te ya yichʼ tupʼel. Ta jujun sab, te sacerdote yame skʼan ya yakʼbey siʼul sok yame skʼan ya yakʼ ta sba te chikʼbil majtanil, jaʼnix jich yame yakʼ te xtomet schʼailel te sjujpʼel* te chambalametik yuʼun te milbil majtaniletik ta swenta lamalkʼinal.
13 Yame skʼan te spisil-ora yak ta tilel te kʼajkʼ ta kajtajibal. Mame skʼan te ya yichʼ tupʼel.
14 »›Jaʼ ini jaʼ te ley ta swenta te majtanil yuʼun sit awal tsʼunubil. Jaʼex, te snichʼnabex Aarón, yame skʼan ya awakʼik ta yelaw te kajtajibal ta stojol te Jehová.
15 Jtul te snichʼan te Aarón yame sjop lekil harina yuʼun te majtanil yuʼun sit awal tsʼunubil sok jtebuk yaceiteul sok spisil sakal pom te ay ta sba sok yame yakʼ te xtomet te schʼailel ta sba te kajtajibal swenta snaʼojibal, jich bitʼil jun majtanil ta stojol te Jehová te kʼax sumetnax yikʼe.*
16 Te jayebxan ya xjil yuʼun te majtanil jaʼme ya sweʼ te Aarón sok te snichʼnabe. Yame sweʼik ta jun lugar te chʼultesbil jich te bitʼil pan te maba yichʼoj levadura. Yame sweʼik ta yamakʼul te nailpakʼ ta swenta tsoblej.
17 Mame xyichʼ woel sok te bintik yichʼoj levadura. Jaʼ kakʼojbey te bin ay ta swentaik yichʼel yuʼun te majtaniletik kuʼun te ya yichʼ chikʼele. Jaʼ mero chʼultesbil jich bitʼil te majtanil ta swenta mulil sok te majtanil ta swenta chʼayel ta stojol Dios.
18 Spisil te winiketik te jaʼik te snichʼnab te Aarón jaʼme ya sweʼik stukel. Jaʼme jich te parte te ya yichʼik spisil-ora ta kajalkaj stsʼumbalik yuʼun te majtaniletik te ya yichʼ chikʼel ta stojol te Jehová. Biluk-a te bin ya xtaot yuʼun te majtaniletike, chʼultesbilme ya xkʼot›».
19 Te Jehová kʼopojxan sok te Moisés, jich la yalbey:
20 «Jaʼme te majtanil ini te ya yakʼ te Aarón sok te snichʼnab ta stojol te Jehová te bin-ora ya yichʼik malbeyel aceite ta sjolik: yame yichʼ akʼel jun ta slajunebal yuʼun te jun efá* yuʼun lekil harina jich bitʼil majtanil yuʼun sit awal tsʼunubil te ya yichʼ akʼel spisil-ora, olil ta sab sok olil ta xmal kʼajkʼal.
21 Yame yichʼ pasel sok aceite ta samet. Xetʼtiklana jich bitʼil te kʼalal ya yichʼ woel ta horno te majtanil yuʼun sit awal tsʼunubile. Lek wotsʼbil ta aceite ya awichʼ bael sok ichʼa bael jich bitʼil majtanil te kʼax sumetnax yikʼ* ta stojol te Jehová.
22 Jaʼme ya yakʼ te sacerdote te tsabil te ya sjelolin te Aarón te jaʼ snichʼane. Jaʼ jun mantalil te ma xlaj skʼoplal: spisil te majtanil xtometme schʼailel ya yichʼ akʼel ta stojol te Jehová.
23 Spisil majtanil yuʼun sit awal tsʼunubil te ya yichʼ akʼel ta swenta jtul sacerdote tsʼakalme ya yichʼ akʼel. Mame xjuʼ ta weʼel».
24 Te Jehová kʼopojxan sok te Moisés, jich la yalbey:
25 «Jichme xa awalbey te Aarón sok te snichʼnab: ‹Jaʼ ini jaʼ te ley yuʼun te majtanil ta swenta mulil. Te majtanil ta swenta mulil yame yichʼ milel ta stojol te Jehová te banti ya yichʼ milel te chikʼbil majtanile. Jaʼ te bin mero chʼultesbil.
26 Te sacerdote te ya yakʼ te majtanil ta swenta mulil jaʼnixme ya sweʼ. Yame sweʼ ta jun lugar te chʼultesbil ta yamakʼul te nailpakʼ ta swenta tsoblej.
27 »›Spisil te bin ya xtaot yuʼun te tiʼbale chʼultesbilme ya xkʼot, teme ay machʼa kʼot ta skʼuʼ te chʼichʼe, yame skʼan ya asakʼ te kʼuʼul te banti taot ta chʼichʼ ta jun lugar te chʼultesbil.
28 Teme la yichʼ payel ta oxom te tiʼbale, yame skʼan ya yichʼ topʼel. Pero, teme la yichʼ payel ta yawil te pasbil ta cobre, yame skʼan ya yichʼ juxel sok pokel ta jaʼ.
29 »›Spisil te winiketik te jaʼik sacerdoteetik jaʼme ya sweʼik stukel. Jaʼ mero chʼultesbil.
30 Pero mame skʼan ya yichʼ weʼel junuk majtanil ta swenta mulil teme ya yichʼ ichʼel bael jtebuk schʼichʼel swenta stael perdón ta yutil te nailpakʼ ta swenta tsoblej tey ta chʼul awilal. Yame skʼan ya yichʼ chikʼel.
Notaetik
^ Ta yantik variante «xepuil».
^ Ta hebreo: «slamantes oʼtanile».
^ Jaʼ 2.2 litro. Ilawil ta apéndice, B14.
^ Ta hebreo: «slamantes oʼtanil».
