Levítico 7:1-38
7 »›Jaʼ ini jaʼ te ley yuʼun te majtanil ta swenta chʼayel. Jaʼ mero chʼultesbil.
2 Yame smilik te majtanil ta swenta chʼayel te banti ya yichʼ milel te chikʼbil majtaniletik, sok yame yichʼ tsijtsinel te schʼichʼel ta sjoyobal te skajtajib chikʼbil majtanil.
3 Yame yakʼ ta stojol te Dios spisil te sjujpʼel:* te sne te jujpʼenxan, te sjujpʼel te potsol-a te sbikil
4 sok te cheb sriñon sok te sjujpʼel* te nopol* ay ta slomo. Jaʼnix jich yame slokʼesbey te sjujpʼel te potsol-a te sejkub.
5 Te sacerdote yame yakʼ te xtomet schʼailel spisil ta sba skajtajib chikʼbil majtanil jich bitʼil jun majtanil te ya yichʼ chikʼel ta stojol te Jehová. Jaʼ jun majtanil ta swenta chʼayel.
6 Spisil te winiketik te jaʼik sacerdoteetik jaʼme ya sweʼik stukel. Yame skʼan ya sweʼik ta jun lugar te chʼultesbile. Jaʼ mero chʼultesbil.
7 Pajalme te ley ta swenta te majtanil ta swenta mulil sok te majtanil ta swenta chʼayel. Te tiʼbal yuʼun te majtanil jaʼme yuʼun ya xkʼot te sacerdote te ya yakʼ sta perdón soke.
8 »›Kʼalal te sacerdote ya yakʼ chikʼbil majtanil ta swenta jtul ants winik, jaʼme ya yichʼ jilel te snujkulel te chikʼbil majtanil te la yichʼ akʼele.
9 »›Spisil majtanil yuʼun sit awal tsʼunubil te ya yichʼ woel ta horno o te ya yichʼ chajpanel ta cacerola o ta samet jaʼme yuʼun ya xkʼot te sacerdote te ya yakʼe. Jaʼme yuʼun ya xkʼot.
10 Pero, spisil te majtanil yuʼun sit awal tsʼunubil te wotsʼbil sok aceite o te takine jaʼme yuʼun ya xkʼot spisil te snichʼnab Aarón; pajalme ya yichʼik ta jujuntul.
11 »›Jaʼ ini jaʼ te ley ta swenta te milbil majtanil ta swenta lamalkʼinal te ay machʼa ya xjuʼ ya yakʼ ta stojol te Jehová.
12 Teme ya yakʼ jich bitʼil milbil majtanil ta swenta yalel wokol, jaʼnix jich yame yakʼ sok rosca-pan te wotsʼbil ta aceite te maba yichʼoj levadura, jayal galletaetik te jaxbil ta aceite sok te maba yichʼoj levadura sok rosca-pan te pasbil ta lekil harina te wotsʼbil ta lek sok te kapbil ta aceite.
13 Te milbil majtanil ta swenta yalel wokol yuʼun te milbil majtaniletik ta swenta lamalkʼinal yame yakʼ sok te rosca-pan te yichʼoj levadura.
14 Ta majtanil-abi yame skʼan akʼel jun pan ta jujunchajp jich bitʼil te bintik chʼultesbil ya yichʼ akʼel ta stojol te Jehová. Jaʼme yuʼun ya xkʼot te sacerdote te ya stsijtsin te chʼichʼ yuʼun te milbil majtanil ta swenta lamalkʼinal.
15 Te tiʼbal yuʼun te milbil majtanil ta swenta yalel wokol yuʼun te milbil majtaniletik ta swenta lamalkʼinal yame skʼan ya yichʼ weʼel te bin kʼajkʼalil la yakʼe. Mame skʼan ya skʼej yuʼun ya yichʼ weʼel ta yan kʼajkʼal.
16 »›Teme jaʼ jun majtanil yuʼun te ay bin jamal ya awal te ya apas o jaʼ jun majtanil yuʼun te spasemal awoʼtan ay bin ya awakʼ, yame skʼan ya yichʼ weʼel te bin kʼajkʼalil ya yakʼ te milbil majtanil yuʼune sok yatome xjuʼ ta weʼel ta yan kʼajkʼal te bin jilxane.
17 Pero, ta yoxebal kʼajkʼal yame skʼan chikʼel te jayebxan tiʼbal jil yuʼun te milbil majtanile.
18 Pero, teme ta yoxebal kʼajkʼal ya yichʼ weʼel jtebuk te tiʼbal yuʼun te milbil majtanil ta swenta lamalkʼinal, maba lek ya yichʼ ilel yuʼun Dios te machʼa la yakʼ te majtanile. Ilaybilme ya xkʼot sok yame skʼan ya stoj te smul te machʼa ya sweʼe.
19 Te tiʼbal te ya slakʼ sba sok te bin boloben skʼoplal, mame skʼan ya yichʼ weʼel. Yame skʼan chikʼel. Chikan machʼa-a te maba boloben skʼoplal yame xjuʼ ya sweʼ te tiʼbal te maba boloben skʼoplale.
20 »›Pero, chikan te machʼa boloben skʼoplal te ya sweʼ te tiʼbal yuʼun te milbil majtanil ta swenta lamalkʼinal te jaʼ yuʼun te Jehová, yame yichʼ milel ta slumal.
21 Teme ay machʼa ya spik te bin boloben skʼoplal, chikan teme jaʼ yuʼun ants winik o chambalam o biluk-a te ilaybil skʼoplal, te ya sweʼ jtebuk te tiʼbal yuʼun te milbil majtanil ta swenta lamalkʼinal te jaʼ yuʼun te Jehová, yame yichʼ milel ta slumal›».
22 Te Jehová kʼopojxan sok te Moisés, jich la yalbey:
23 «Albeya yaʼiy te israeletik ini: ‹Mame xa aweʼbey sjujpʼel* te toro, te jkolel* tat tuminchij sok te tentsun.
24 Te sjujpʼel* te chamen chambalam te la yichʼ tael o te sjujpʼel te chambalam te la yichʼ milel yuʼun yan chambalam, ya xjuʼ biluk bin ya yichʼ tuuntesel-a, pero mame xjuʼ ta weʼel.
25 Machʼauk-a te ya sweʼ te sjujpʼel* te chambalam te ya yakʼ jich bitʼil majtanil te ya yichʼ chikʼel ta stojol te Jehová, yame yichʼ milel ta slumal.
26 »›Mame xa aweʼik chʼichʼ te banti yakex ta nainel, chikan teme schʼichʼel mutetik o yantik chambalametik.
27 Machʼauk-a te ya sweʼ chʼichʼ, yame yichʼ milel ta slumal›».
28 Te Jehová jich la yalbeyxan te Moisés:
29 «Albeya yaʼiy te israeletik ini: ‹Machʼauk-a te ya yakʼ milbil majtanil ta swenta lamalkʼinal ta stojol te Jehová, yame yichʼ bael jtebuk te majtanil-abi ta stojol te Jehová.
30 Ta skʼabnix ya yichʼ bael te sjujpʼel* sok te stan* te chambalam jich bitʼil majtanil te ya yichʼ chikʼel ta stojol te Jehová. Talel kʼaxel yame sjimulan jich te bitʼil majtanil te ya yichʼ jimulanel ta stojol te Jehová.
31 Te sacerdote yame yakʼ te xtomet schʼailel te sjujpʼel* chambalam ta sba te skajtajib chikʼbil majtanil, pero te stane* jaʼme yuʼun ya xkʼot te Aarón sok te snichʼnabe.
32 »›Yame awakʼbeyik te sacerdote schʼixil swaʼel yok te chambalam yuʼun te milbil majtanil ta swenta lamalkʼinal te chʼultesbile.
33 Te snichʼan Aarón te ya yakʼ te schʼichʼel te milbil majtanil ta swenta lamalkʼinal sok te sjujpʼele* jaʼ yuʼun ya xkʼot te schʼixil swaʼel yok te chambalam.
34 Melel joʼon ya kichʼ te stan* te majtanil te ya yichʼ jimulanel sok schʼixil te yok te chʼultesbil yuʼun te milbil majtanil ta swenta lamalkʼinal te ya yakʼ te israeletik. Joʼonme ya kakʼbey te sacerdote Aarón sok te snichʼnab, jaʼ jun mantalil te ma xlaj skʼoplal ta stojol te israeletik.
35 »›Jaʼik ini te bintik ya yichʼ lokʼesel yuʼun te majtaniletik te ya yichʼ chikʼel ta stojol te Jehová te ya yichʼ akʼbeyel te sacerdoteetik —te Aarón sok te snichʼnab— jaʼ te bin kʼajkʼalil la yichʼik yaʼtelik jich bitʼil sacerdoteetik ta stojol te Jehová.
36 Te Jehová la yal ta mantal te jaʼik-abi te bintik ya skʼan ya yakʼik te israeletik ta stojol te sacerdoteetik te bin kʼajkʼalil la yichʼ malel ta aceite ta sjolik. Jaʼ ini jaʼ jun mantalil te ma xlaj skʼoplal ta kajalkaj stsʼumbalik›».
37 Jaʼ ini jaʼ te ley ta swenta te chikʼbil majtanil, te majtanil yuʼun sit awal tsʼunubil, te majtanil ta swenta mulil, te majtanil ta swenta chʼayel, milbil majtanil ta swenta te machʼatik ya yichʼ yaʼtelik ta sacerdoteil sok te milbil majtanil ta swenta lamalkʼinal,
38 jichnix te bitʼil albot ta mantal yuʼun Jehová te Moisés ta wits Sinaí te bin kʼajkʼalil la yalbey ta mantal te israeletik te ya yakʼik majtaniletik ta stojol te Jehová ta jochol takin kʼinal Sinaí.
Notaetik
^ Ta yantik variante «xepuil».
^ Ta yantik variante «xepuil».
^ Ta yantik variante «tijil».
^ Ta yantik variante «xepuil».
^ Ta yantik variante «jchʼiel».
^ Ta yantik variante «xepuil».
^ Ta yantik variante «xepuil».
^ Ta yantik variante «xepuil».
^ Ta yantik variante «stiʼ yoʼtan».
^ Ta yantik variante «xepuil».
^ Ta yantik variante «stiʼ yoʼtane».
^ Ta yantik variante «xepuile».
^ Ta yantik variante «stiʼ yoʼtan».
