Levítico 8:1-36
-
La yichʼ yaʼtel ta sacerdote te Aarón sok te snichʼnab (1-36)
8 Te Jehová kʼopojxan sok te Moisés, jich la yalbey:
2 «Ikʼa tal te Aarón sok te snichʼnab, jaʼnix jich ichʼa tal te kʼuʼuletik, te aceite te ay machʼa ya yichʼ malel ta sjol, te toro yuʼun te majtanil ta swenta mulil, te chaʼkojt tat tuminchij sok te moch yuʼun te panetik te maba yichʼoj levadura,
3 sok tsoba spisil te lum ta yochibal te nailpakʼ ta swenta tsoblej».
4 Te Moisés jichnix la spas te bitʼil pasot ta mantal yuʼun te Jehová, jich te lum la stsob sbaik ta yochibal te nailpakʼ ta swenta tsoblej.
5 Ta patil, te Moisés jich la yalbey te lume: «Jaʼ ini jaʼ te bin la yal ta mantal te Jehová te ya skʼan ya jpastike».
6 Jich te Moisés la yakʼ te noptsajukik* tal ta stojol te Aarón sok te snichʼnab, sok la yakʼ te ya spok sbaik.
7 Ta patil la yakʼbey slap te Aarón te najtil kʼuʼul sok la schuk ta chujkilal, la yakʼbey slap te najtil kʼuʼul te maʼyuk skʼab, la yakʼbey slap te efod* sok tulan la schukbey sok te jalbil chujkil chʼujtul yuʼun te efod.
8 Tey-abi la yakʼ te majkil tanil* sok tey la yotses-a te Urim sok te Tumim.*
9 La yakʼbey ta sjol te bejchʼil jolal te mukʼ skʼoplal sok tey la yakʼbey-a te jayal pechel takʼin te xlemetnax te pasbil ta oro,* jich te bitʼil pasot ta mantal yuʼun Jehová te Moisés.
10 Ta patil, te Moisés la smalbey aceite te nailpakʼ templo sok spisil te bintik ay tey-ae, sok la schʼulteslan.
11 Tey-abi, jukeb buelta la stsijtsin ta jtebuk aceite te kajtajibale. La smalbey aceite te kajtajib sok spisil te bintik ya xtuun yuʼun, jaʼnix jich la spas sok te yawil jaʼ sok te skajtajib yuʼun ya yichʼik chʼultesel.
12 Ta slajibal la smalbey jtebuk aceite ta sjol te Aarón, jich la yichʼ tsael yuʼun chʼultesbil ya xkʼot.
13 Ta patil, te Moisés la yakʼ te noptsajukik* tal te snichʼnab te Aarón. Ta patil la yakʼtiklanbey slapik te najtil kʼuʼul, la schuktiklanbey te chujkil chʼujtul sok la yakʼtiklanbey bejchʼil jolal, jich te bitʼil pasot ta mantal yuʼun Jehová te Moisés.
14 Ta patil la stikun ta ikʼel te toro yuʼun te majtanil ta swenta mulil, tey-abi te Aarón sok te snichʼnab la skajan skʼabik ta sjol te toro yuʼun te majtanil ta swenta mulil.
15 Te Moisés la smil te toro sok la sjaxbey jtebuk te schʼichʼel ta xulubiletik yuʼun te kajtajibale, jich la yichʼ lekubtesel yuʼun mulil te kajtajibale. La smal te chʼichʼ te jilxan ta banti yok te skajtajib chikʼbil majtanil, jich la yichʼ chʼultesel yuʼun tey ya xjuʼ ya yichʼ pasel te stael perdón yuʼun te mulile.
16 Ta patil la stsakbey spisil te sjujpʼel* te potsol-a te sbikil, te sjujpʼel te potsol-a te sejkub sok te cheb sriñon sok sjujpʼel te potsol-ae, te Moisés la yakʼ te xtomet schʼailel ta sba te kajtajibale.
17 Tey-abi, spisil te bin jil yuʼun te toro —te snujkulel, te stiʼbalul sok te stsaʼ— la yakʼ ta lokʼesel ta fuera yuʼun te campamento yuʼun ya yichʼ chikʼel tey-a, jich te bitʼil pasot ta mantal yuʼun Jehová te Moisés.
18 Ta patil la stikun ta ikʼel te tat tuminchij yuʼun te chikʼbil majtanil, tey-abi te Aarón sok te snichʼnab la skajan skʼabik ta sjol te tat tuminchij.
19 Te Moisés la smil te tat tuminchij sok la stsijtsin te schʼichʼel ta sjoyobal te kajtajibale.
20 La sbojtiklan te tat tuminchij, tey-abi te Moisés la yakʼ te xtomet schʼailel te sjol, te sbakʼetal te bojtiklanbil sok te sjujpʼele.*
21 La spokbey te sbikil sok te yok, tey-abi te Moisés la yakʼ te xtomet schʼailel spisil te sbakʼetal te tat tuminchij ta sba te kajtajibale. Jaʼ jun chikʼbil majtanil-a te kʼax sumetnax* yikʼ. Jaʼ jun majtanil-a te ya yichʼ chikʼel ta stojol te Jehová, jich te bitʼil pasot ta mantal yuʼun Jehová te Moisés.
22 Ta patil, te Moisés la stikun ta ikʼel te yan tat tuminchij te jaʼ te tat tuminchij te ya yichʼ akʼel ta swenta te machʼatik ya yichʼ yaʼtelik ta sacerdoteil, tey-abi te Aarón sok te snichʼnab la skajan skʼabik ta sjol te tat tuminchij.
23 Te Moisés la smil te tat tuminchij sok la yakʼ jtebuk te schʼichʼel ta skʼunil swaʼel schikin te Aarón, jaʼnix jich la yakʼbey ta swaʼel smeʼ skʼab sok ta swaʼel smeʼ yok.
24 Tey-abi, te Moisés la yakʼ noptsajukik* tal ta stojol te snichʼnab Aarón sok la yakʼtiklanbey jtebuk chʼichʼ ta skʼunil swaʼel schikinik, jaʼnix jich ta swaʼel smeʼ skʼabik sok ta swaʼel smeʼ yokik. Te jayebxan chʼichʼ jile jaʼ la stuuntes te Moisés ta stsijtsinel-a te kajtajibale.
25 Tey-abi la stsak te sjujpʼel* te tat tuminchij, te sne te jujpʼenxan, spisil te sjujpʼel te potsol-a te sbikil, te sjujpʼel te potsol-a te sejkub, te cheb sriñon sok sjujpʼel sok te swaʼel yaʼ.
26 Ta moch yuʼun te panetik te maba yichʼoj levadura te ay ta stojol te Jehová la stsak tal lokʼel jpejch rosca-pan te maba yichʼoj levadura, jpejch rosca-pan te yichʼoj aceite sok jpejch jayal galleta. Tey-abi la scholan ta sba te sjujpʼel* te bojtiklanbil sok ta sba te swaʼel yaʼ.
27 Ta patil la yakʼbey spisil-abi ta skʼab te Aarón sok te snichʼnab, talel kʼaxel la sjimulanik jich te bitʼil majtanil te ya yichʼ jimulanel ta stojol te Jehová.
28 Tey-abi, te Moisés la stsak sujtel te bin ay ta skʼabik, la yakʼ te xtomet schʼailel ta sba te chikʼbil majtanil te ay ta kajtajibale. Jaʼ milbil majtaniletik ta swenta te machʼatik ya yichʼ yaʼtelik ta sacerdoteil te kʼax sumetnax* yikʼe. Jaʼ jun majtanil te ya yichʼ chikʼel ta stojol te Jehová.
29 Ta patil, te Moisés la stsak te stan* te tat tuminchij sok talel kʼaxel la sjimulan jich te bitʼil majtanil te ya yichʼ jimulanel ta stojol te Jehová. Te stan te tat tuminchij te ya yichʼ akʼel ta swenta te machʼatik ya yichʼ yaʼtelik ta sacerdoteil jaʼ yuʼun kʼot te Moisés, jich te bitʼil pasot ta mantal yuʼun Jehová te Moisés.
30 Te Moisés la stsak jtebuk te aceite te ya yichʼ tuuntesel kʼalal ay machʼa ya yichʼ tsael sok jtebuk chʼichʼ te ay ta sba te kajtajibal swenta ya stsijtsin-a te Aarón sok te skʼuʼ, jaʼnix jich te snichʼnab sok te skʼuʼike. Jich la schʼultes te Aarón sok te skʼuʼe, te snichʼnab sok te skʼuʼike.
31 Tey-abi, te Moisés jich la yalbey te Aarón sok te snichʼnab: «Payaik te tiʼbal ta yochibal te nailpakʼ ta swenta tsoblej. Teyme ya aweʼik-a sok te pan te ay ta moch ta swenta te machʼatik ya yichʼ yaʼtelik ta sacerdoteil, jich te bitʼil la kichʼ albeyel ta mantal: ‹Jaʼme ya sweʼik te Aarón sok te snichʼnabe›.
32 Te jayeb tiʼbal sok jayeb pan ya xjilxane yame yichʼ chikʼel.
33 Jukebme kʼajkʼal maba ya xnamajex* ta stojol te yochibal te nailpakʼ ta swenta tsoblej jaʼto te kʼalal ya stsʼakaj te jayeb kʼajkʼal ya awichʼ awaʼtelik ta sacerdoteil, melel ya xjalaj jukeb kʼajkʼal te ya awichʼ awaʼtelik ta sacerdoteil.
34 Jaʼ smantal te Jehová te bin la jpastik ta kʼajkʼal ini, yuʼun jich ya ataik perdón yuʼun te amulik.
35 Yame xjilex jukeb kʼajkʼal sok jukeb ajkʼabal ta stojol te yochibal te nailpakʼ ta swenta tsoblej sok yame akʼotesik ta pasel te bin ay ta awentaik ta stojol te Jehová yuʼun maba ya xlajex; melel jich la kichʼ albeyel ta mantal».
36 Te Aarón sok te snichʼnab la spasik spisil te bin la yal ta mantal te Jehová ta swenta te Moisés.
Notaetik
^ Ta yantik variante «jijtsʼajukik», «tijtsajukik».
^ Ta hebreo: «te chʼul señail te ya yakʼ ta naʼel te la yichʼ akʼel te Aarón ta stojol Dios».
^ Ta yantik variante «jijtsʼajukik», «tijtsajukik».
^ Ta yantik variante «xepuil».
^ O «te sjujpʼel te ay ta sriñon».
^ Ta yantik variante «xjukʼetnax».
^ Ta yantik variante «jijtsʼajukik», «tijtsajukik».
^ Ta yantik variante «xepuil».
^ Ta yantik variante «xepuil».
^ Ta yantik variante «xjukʼetnax».
^ Ta yantik variante «stiʼ yoʼtan».
^ Ta yantik variante «xjakalajex», «xkʼubex».
