Levítico 9:1-24
-
Te Aarón ya yakʼ majtaniletik (1-24)
9 Ta swaxakebal kʼajkʼal, te Moisés la yikʼ tal te Aarón, te snichʼnab sok te jwolwanejetik yuʼun te Israel.
2 Jich la yalbey te Aarón: «Ikʼa tal jkojt jkolel* toro te maʼyuk schamel jich bitʼil majtanil ta swenta mulil sok jkojt tat tuminchij te maʼyuk schamel jich bitʼil chikʼbil majtanil, akʼtiklana ta stojol te Jehová.
3 Pero, jich xa awalbey te israeletik: ‹Ikʼaik tal jkojt tat tentsun jich bitʼil majtanil ta swenta mulil, jkojt jkolel* toro sok jkojt jkolel tat tuminchij te maʼyuk schamelik sok te juntonax yaʼbilalik ta jujunkojt jich bitʼil chikʼbil majtanil
4 sok jkojt toro sok jkojt tat tuminchij yuʼun ya yichʼ milel ta stojol te Jehová te ya yichʼ akʼel jich bitʼil milbil majtanil ta swenta lamalkʼinal, jaʼnix jich ichʼaik tal majtanil yuʼun sit awal tsʼunubil te wotsʼbil ta aceite, melel yoʼtik ya xchiknaj ta atojolik te Jehová›».
5 Jich la yichʼik bael ta yelaw te nailpakʼ ta swenta tsoblej te bin la yal ta mantal te Moisés. Ta patil, spisil te lum noptsajik* bael sok la stejkʼan sbaik ta stojol te Jehová.
6 Te Moisés jich la yal: «Jaʼ ini jaʼ te bin la yalbeyex ta mantal te Jehová te ya yichʼ pasel yuʼun ya xchiknaj ta atojolik te yutsilal te Jehová».
7 Tey-abi, te Moisés jich la yalbey te Aarón: «Noptsajan* bael ta kajtajibal sok akʼa te majtanil awuʼun ta swenta mulil sok te chikʼbil majtanil awuʼun, kʼana perdón ta atojol sok ta stojol te machʼatik ay awuʼun; jaʼnix jich akʼa te majtanil yuʼun te lum sok kʼana perdón yuʼun te smulik, jich bitʼil la yal ta mantal te Jehová».
8 Ta oranax, te Aarón noptsaj* bael ta kajtajibal sok la smil te jkolel* toro yuʼun te majtanil ta swenta te smulike.
9 Tey-abi, te Aarón ichʼbot bael yuʼun te snichʼnab te chʼichʼe, jich la smul te yal skʼab ta chʼichʼ sok la sjaxbey te xulubiletik yuʼun te kajtajibal. Ta patil la smal te chʼichʼ te jilxan ta banti yok te kajtajibal.
10 Tey-abi la yakʼ te xtomet schʼailel ta kajtajibal te sjujpʼel,* te sriñon sok te sjujpʼel te potsol-a te sejkub yuʼun te majtanil ta swenta mulil, jich te bitʼil pasot ta mantal yuʼun Jehová te Moisés.
11 Te stiʼbalul sok te snujkulel la schikʼ ta fuera yuʼun te campamentoe.
12 Ta patil la smil te chikʼbil majtanil. Akʼbot yuʼun te snichʼnab Aarón te chʼichʼe, jich la stsijtsin sok-a te sjoyobal te kajtajibal.
13 Kʼasesbot-euk te sbakʼetal te jkolel* toro te bojtiklanbil yuʼun te chikʼbil majtanil soknix te sjole, la yakʼ te xtomet schʼailel ta sba te kajtajibal.
14 Jaʼnix jich la spok te sbikil sok te yok, la yakʼ te xtomet schʼailel ta sba te chikʼbil majtanil te ay ta kajtajibal.
15 Tey-abi la yakʼ te majtanil yuʼun te lume: la stsak te tat tentsun yuʼun te majtanil ta swenta te smul te lume, la smil sok la yakʼ jich bitʼil majtanil ta swenta mulil, la spas jich te bin-utʼil te sbabiale.
16 Jaʼnix jich la yakʼ te chikʼbil majtanil, jich la spas te bitʼil ay ta pasele.
17 Ta patil la yakʼ te majtanil yuʼun sit awal tsʼunubil: la stsak jojpuk te majtanil sok la yakʼ te xtomet schʼailel ta sba te kajtajibal sok te chikʼbil majtanil te ya yichʼ akʼel ta sab.
18 Ta patil la smil te toro sok te tat tuminchij ta stojol te lum ta swenta te milbil majtanil ta swenta lamalkʼinal. Akʼbot yuʼun te snichʼnab te Aarón te chʼichʼe, la stsijtsin sok-a te sjoyobal te kajtajibal.
19 Ta swenta te sjujpʼel* te bojtiklanbil yuʼun te toro sok te sne te jujpʼenxan yuʼun te tat tuminchij, jaʼnix jich te sjujpʼel te potsol-a te sbikil, te sriñon sok te sjujpʼel te potsol-a te sejkub.
20 La scholanik spisil-abi ta sba te stan* te chambalametik sok ta patil la yakʼ te xtomet schʼailel ta sba te kajtajibal.
21 Yan stukel te stan* sok te swaʼel yaʼ te chambalametik talel kʼaxel la sjimulan te Aarón jich bitʼil majtanil te ya yichʼ jimulanel ta stojol te Jehová, jich te bitʼil la yal ta mantal te Moisés.
22 Kʼalal te Aarón yakʼojix-a te majtanil ta swenta mulil, te chikʼbil majtanil sok te milbil majtaniletik ta swenta lamalkʼinal, la stoy te skʼab ta stojol te lum, la yakʼtiklanbey bendición, jich ko tal.
23 Te Moisés sok te Aarón ochik bael ta nailpakʼ ta swenta tsoblej; ta patil lokʼik tal sok la yakʼtiklanbeyik bendición te lume.
Tey-abi chiknaj te yutsilal te Jehová ta stojol te lume,
24 lokʼ tal kʼajkʼ ta stojol te Jehová sok jajch slajin te chikʼbil majtanil sok te sjujpʼel* te bojtiklanbil te ay ta kajtajibal. Kʼalal la yilik te bin kʼot ta pasele, jajchik ta aw yuʼun te chamnax yoʼtanik* sok la spajkan sbaik ta lum.
Notaetik
^ Ta yantik variante «jchʼiel».
^ Ta yantik variante «jchʼiel».
^ Ta yantik variante «jijtsʼajik», «tijtsajik».
^ Ta yantik variante «Jijtsʼajan», «Tijtsajan».
^ Ta yantik variante «jijtsʼaj», «tijtsaj».
^ Ta yantik variante «jchʼiel».
^ Ta yantik variante «xepuil».
^ Ta yantik variante «jchʼiel».
^ Ta yantik variante «xepuil».
^ Ta yantik variante «stiʼ yoʼtan».
^ Ta yantik variante «stiʼ yoʼtan».
^ Ta yantik variante «xepuil».
^ Ta yantik variante «chajpnax la yilik».
