Apocalipsis 10:1-11
10 La kil yan chʼul-abat te bayal yuʼel te yak ta koel tal ta chʼulchan te potsol ta tokal, ay jun arcoiris ta yajkʼolal sjol. Te sit yelaw jaʼ jich te bin-utʼil te kʼajkʼale, te yakan jaʼ jichik te bin-utʼil balal kʼajkʼetik.
2 Yichʼoj chʼin balbil jun ta skʼab te jambilixe. La stekʼ te mar ta swaʼel yok, pero ta skʼexam yok la stekʼ te lumkʼinal.
3 Tey-abi, tulan awun jich te bin-utʼil ya x-awun te león-choje. Te kʼalal awune, chiknaj skʼopik-euk te jukeb chawuk.
4 Te kʼalal chiknaj skʼop te jukeb chawuk, kʼan jtsʼibay ta oranax, pero la kaʼiy te ay machʼa kʼopoj ta chʼulchan, jich la yal: «Muka ta awoʼtan te bin la yalik te jukeb chawuk, mame xa atsʼibay».
5 Te chʼul-abat te la kil te la stejkʼan sba ta mar sok ta lumkʼinal la stoy moel te swaʼel kʼab ta chʼulchan
6 sok la yal ta jamal ta stojol te machʼa kuxul ta sbajtelkʼinal te la spas te chʼulchan sok te bintik ay tey-a, te balumilal sok te bintik ay tey-a, te mar sok te bintik ay tey-a. Jich la yal: «Maba ya xjalajix bayal kʼajkʼal.
7 Ta yorail te kʼalal nopol* ya yokʼesinix-a te strompeta te sjukebal chʼul-abate, ya xkʼot ta pasel te bin mato yakʼoj ta naʼel-a te Diose, te yalojbey skʼoplal jich te bin-utʼil lek yachʼil kʼop ta stojol te j-abatetik yuʼun, te j-alwanejetike».
8 La kaʼiy te ay machʼa kʼopoj ta chʼulchan te la schaʼkʼoponone. Jich la yalbon: «Baan, tsaka tal te balbil jun te jamalix te yichʼoj ta skʼab te chʼul-abat te tekʼel ta mar sok ta lumkʼinal».
9 Jich boon te banti ay te chʼul-abate sok la jkʼanbey te chʼin balbil june. Jich la yalbon: «Ichʼa te balbil jun sok weʼa. Yame schʼaubtesbat te achʼujte, pero chiʼ ya xkʼot ta awe jich te bin-utʼil chab».
10 Jich la jtsak te chʼin balbil jun te ay ta skʼab te chʼul-abate sok la jweʼ. Chiʼ la kaʼiy ta ke jich te bin-utʼil chab, pero te kʼalal jweʼojix-ae, chʼaub jchʼujt yuʼun.
11 Jich la yalbonik: «Yame awalxan skʼop j-alwanej ta stojol lumetik, nacionetik, kʼopiletik sok ta stojol bayal ajwaliletik».
Notaetik
^ O «tijil».
