Apocalipsis 14:1-20
-
Te Jkolel Tuminchij sok te 144 mil ta tul (1-5)
-
Te bin la yalbeyik skʼoplal te oxtul chʼul-abatetik (6-12)
-
Jtul chʼul-abat yak ta wilel ta yolil chʼulchan, yichʼoj lek yachʼil kʼop (6, 7)
-
-
Tseʼelnaxme yoʼtanik te machʼatik lajemik te jun yoʼtan lajik ta stojol te Cristo (13)
-
Te chaʼchajp sit awal tsʼunubil te ay ta balumilal (14-20)
14 Tey-abi la kil te Jkolel* Tuminchij te tekʼel ta wits Sion, jokinbil yuʼun te 144 mil ta tul te tsʼibaybil ta stiʼbaik te sbiil sok te sbiil te sTate.
2 Ay bin la kaʼiybey skʼop ta chʼulchan, te skʼop jaʼ jich yaʼiyel te bin-utʼil ya xkʼopoj bayal snojel jaʼ* sok jich skʼop te bin-utʼil skʼop tulan chawuk. Te bin la kaʼiybey skʼop jaʼ jich te bin-utʼil machʼatik ya xkʼayojinik te kʼalal ya stijik arpa ta kʼayoj.
3 Yakik ta kʼayoj ta stojol te mukʼul naktajibal sok ta stojol te chantul querubinetik* soknix ta stojol te mamaletik. Yakik ta skʼayojtayel jun kʼayojil te jich yaʼiyel te yachʼile, maʼyuk machʼa ya xjuʼ yuʼun snopel te kʼayojil-abi, jaʼnax te 144 mil ta tul te la yichʼik manel ta yolil te machʼatik ayik ta balumilal.
4 Jaʼik te machʼatik maba la sbolobtes sbaik sok te antsetike, melel maʼyuk machʼa la sjokinik ta wayel. Jaʼik te machʼatik yakik ta stʼunel te Jkolel* Tuminchij chikan te banti ya xbajte. Jaʼik te machʼatik la yichʼik manel ta yolil te ants winiketik yuʼun jich ya xkʼotik te bin-utʼil sba sit awal tsʼunubil ta stojol te Dios sok ta stojol te Jkolel Tuminchij,
5 jkʼaxel maba la snaʼik spasel lot; jkʼaxel maʼyuk yabakulik.*
6 La kil yan chʼul-abat te yak ta wilel ta yolil te chʼulchane. Yichʼoj lek yachʼil kʼop ta swenta sbajtelkʼinal yuʼun ya yalbey yaʼiy te machʼatik nainemik ta balumilal: ta spisil ta chajp nacionetik, tsʼumbaliletik, kʼopiletik sok lumetik.
7 Jich tulan yak ta yalel: «Xiʼaik* te Dios sok albeyaik yutsil skʼoplal, melel kʼotix yorail te ya x-ichʼawan ta kʼope. Jich yuʼun ichʼaik ta mukʼ te machʼa la spas te chʼulchan, te balumilal, te mar sok te slokʼib jaʼetike».
8 Ta patil tal yan chʼul-abat te jich yak ta yalel: «¡Jinix! ¡Jinix te Mukʼul Babilonia! Jaʼ te machʼa la yakʼbey yuchʼ spisil te nacionetik te vino yuʼun te spasel mulweje».*
9 Tal yan chʼul-abat, jaʼix te yoxebale, jich tulan yak ta yalel: «Teme ay machʼa ya yichʼ ta mukʼ te chambalam te xiʼbantik sba sok te slokʼombae, sok teme ya yichʼ te marca ta stiʼba o ta skʼab,
10 jaʼnix jich yame yuchʼ te vino yuʼun te yilinba te Dios, te maʼyuk bin kapbil-a te ay ta copa yuʼun te yilinbae, sok yame yichʼ akʼbeyel swokol ta kʼajkʼ sok azufre ta sit te chʼul-abatetik sok ta sit te Jkolel* Tuminchij.
11 Sbajtelkʼinal xtomomet ya xmo te schʼailel te swokolike. Te machʼatik ya yichʼik ta mukʼ te chambalam te xiʼbantik sba sok te slokʼomba sok te machʼatik ya yichʼik te marca yuʼun te sbiile maba ya skux yoʼtanik ta kʼajkʼal ajkʼabal.
12 Jaʼ yuʼun, te machʼatik chʼultesbilik —te ya schʼuunbeyik smantal te Dios sok te maba ya yijkitayik te schʼuunel yoʼtanik ta stojol te Jesús— ya skʼan te ya xkujch yuʼunik».
13 La kaʼiy stojol te ay machʼa kʼopoj ta chʼulchan te jich yak ta yalel: «Tsʼibaya ini: ‹Tseʼelnaxme yoʼtanik te machʼatik lajemik te jun yoʼtan lajik ta stojol te Kajwaltik ta ora bael ini; jich, jich ya yal te chʼul espíritu,* akʼa skux yoʼtanik yuʼun te tulan yaʼtelike, melel jun-nax ya xbajtik sok te yaʼtelike›».
14 Tey-abi la kil sakal tokal, sok ay machʼa jich yilel te bin-utʼil snichʼan te winik te nakal ta tokal; yichʼoj jun corona ta sjol te pasbil ta oro sok yichʼoj jchʼix hoz* ta skʼab te ay yee.
15 Ay yan chʼul-abat te lokʼ tal ta chʼul awilal ta templo sok jich tulan la yawtay te machʼa nakal ta tokale: «¡Ochan ta stuuntesel te hoz* sok tsobeya sit te awal tsʼunubile, la staix yorail te ya yichʼ stsobeyel site, melel yijubix te sit te awal tsʼunubil te ay ta balumilale!».
16 Te machʼa nakal ta tokal och stuuntes te hoz* ta balumilal, jich la yichʼ tsobeyel sit te awal tsʼunubil te ay ta balumilale.
17 Ay yan chʼul-abat te lokʼ tal ta chʼul awilal ta templo te ay ta chʼulchan, jaʼnix jich ay yichʼoj jchʼix hoz* te ay yee.
18 Lokʼ tal yan chʼul-abat ta skajtajib chikʼbil majtanil te yichʼoj tulan yaʼtel ta swentainel te kʼajkʼe. Jich tulan la yawtay te machʼa yichʼoj te hoz* te ay yee: «¡Ochan ta stuuntesel te hoz te ay yee sok tsobeya sit ta chejpelchejp te tsʼusub te ay ta balumilal, melel yijubix te tsʼusube!».
19 Te chʼul-abat och stuuntes te hoz* ta balumilal, sok la sboj te tsʼusubiltik te ay ta balumilal, la schʼoj ochel ta smukʼul yawil spʼeojibal tsʼusub yuʼun te yilinba te Diose.
20 La yichʼ tsʼoʼel* ta tekʼel te tsʼusub ta fuera yuʼun te mukʼul lume, okin lokʼel chʼichʼ tey-a te banti spʼeojibal te tsʼusub te kʼot kʼalalto ta sfrenoil ye te caballoetik sok ayniwan okin bael 296 kilómetro.
Notaetik
^ O «Alal».
^ O «mukʼul cascada».
^ O «bintik kuxajtik».
^ O «Alal».
^ O «yijkʼalulik».
^ O «Alal».
^ Jun najtil cuchillo te lukul te ya xtuun ta setʼel sok ta stsobeyel sit te awal tsʼunubil.
^ Jun najtil cuchillo te lukul te ya xtuun ta setʼel sok ta stsobeyel sit te awal tsʼunubil.
^ Jun najtil cuchillo te lukul te ya xtuun ta setʼel sok ta stsobeyel sit te awal tsʼunubil.
^ Jun najtil cuchillo te lukul te ya xtuun ta setʼel sok ta stsobeyel sit te awal tsʼunubil.
^ Jun najtil cuchillo te lukul te ya xtuun ta setʼel sok ta stsobeyel sit te awal tsʼunubil.
^ Jun najtil cuchillo te lukul te ya xtuun ta setʼel sok ta stsobeyel sit te awal tsʼunubil.
^ O «pechʼel».
