Apocalipsis 17:1-18
-
Te castigo ta stojol te «Mukʼul Babilonia» (1-18)
-
Te mero j-antsinel ants skajtajibinoj jkojt tsajal chambalam te xiʼbantik sba (1-3)
-
Te chambalam te xiʼbantik sba «te ay-ae, pero te maʼyukix ta ora ini, manchukme jich-abi nopol ya xlokʼix tal ta xaab» (8)
-
Te lajunchʼix xulubiletik yame yakʼbeyik guerra te Jkolel Tuminchij (12-14)
-
Te lajunchʼix xulubiletik yame spʼajik te j-antsinel ants (16, 17)
-
17 Ay jtul ta sjukebal te chʼul-abatetik te yichʼojik te jukeb tazaetik, jich tal yalbon: «Laʼ, ya kakʼbat awil te castigo te ya yichʼ akʼbeyel te mero j-antsinel* ants te nakal ta sba jaʼetik.
2 Te ajwaliletik ta balumilal la spasik mulwej* sok, jaʼnix jich te machʼatik nainemik ta balumilal yakubik ta swenta te vino yuʼun te spasel mulwej yuʼune».
3 Ta swenta te chʼul espíritu,* te chʼul-abat la yikʼon bael ta jochol takin kʼinal. Tey-abi la kil jtul ants te skajtajibinoj jkojt tsajal chambalam te xiʼbantik sba te nojel ta biililetik te ya sbolkʼoptay te Dios, ay jukeb sjol sok lajunchʼix xulub.
4 Te antse slapoj kuxul morado pak’ sok tsaj, sok schʼaloj* sba ta oro, ta tʼujbil tonetik sok ta perlaetik. Stsakoj jun copa te pasbil ta oro te nojel ta bintik chopol* sok te nojel ta bintik ilobtik sba ta swenta te mulwej* ya spase.
5 Ay jun biilil te tsʼibaybil ta stiʼba te ma naʼbiluk skʼoplal: «Mukʼul Babilonia, snan* te j-antsinel* antsetik sok te bintik ilobtik sba te ay ta balumilal».
6 La kil te ants te yakuben ta swenta te schʼichʼel te machʼatik chʼultesbilik soknix ta swenta te schʼichʼel te testigoetik yuʼun te Jesús.
Chamnax koʼtan* yuʼun te kʼalal jich la kil te antse.
7 Jaʼ yuʼun, jich la yalbon te chʼul-abat: «¿Bin yuʼun te chamnax awoʼtan* yuʼune? Joʼon ya jcholbat awaʼiy ta swenta te ants te ma naʼbiluk skʼoplal sok ta swenta te chambalam te xiʼbantik sba te banti kajal te antse, jaʼ te ay jukeb sjol sok lajunchʼix xulub.
8 Te chambalam te xiʼbantik sba te la awil te ay-ae, pero te maʼyukix ta ora ini, manchukme jich-abi nopol* ya xlokʼix tal ta xaab, sok ya xbajt ta lajinel. Te machʼatik nainemik ta balumilal —jaʼik te machʼatik maba tsʼibaybil sbiilik ta balbil jun yuʼun kuxlejalil jaʼto te kʼalal chiknaj tal te ants winiketike—* chamnaxme yoʼtanik* yuʼun te kʼalal ya yilik te chambalam te xiʼbantik sba te ay-ae, pero te maʼyukix ta ora ini, manchukme jich-abi yananixme xchiknaj-a.
9 »Ta swenta ini ya skʼan te ay pʼijil oʼtanil. Te jukeb sjol jaʼ señail jukeb witsetik jaʼ te banti ya snajkan sba te antse.
10 Ay juktul ajwaliletik: joʼtul lajemikix skʼoplal, jtul ay ta ora ini, te jtulxane mato xchiknaj; pero te kʼalal ya xchiknaj maba ya xjalaj bayal tiempo.
11 Te chambalam te xiʼbantik sba te ay-ae pero te maʼyukix ta ora ini, jaʼ swaxakebal ajwalil-euk; tey chiknaj te banti juktul ajwaliletik sok ya xbajt ta lajinel.
12 »Te lajunchʼix xulubiletik la awile jaʼ señail lajuntul ajwaliletik te mato yichʼojik yaʼtelik ta wentainwanej, pero yame yichʼ yaʼtelik ta wentainwanej ta jun-nax ora jich te bin-utʼil ajwaliletik sok jun-nax ya xwentainwanik sok te chambalam te xiʼbantik sbae.
13 Jun-nax te bin snopoj ya spasike, jich yuʼun ya yakʼbeyik yip sok tulan yaʼtel te chambalam te xiʼbantik sbae.
14 Yame yakʼbeyik guerra te Jkolel* Tuminchij, pero yame yichʼik tsalel yuʼun te Jkolel Tuminchij, melel jaʼ Ajwalil yuʼun te machʼatik ya xwentainwanik sok jaʼ Ajwalil yuʼun te ajwaliletik. Jaʼnix jich yame stsalawanik-euk te machʼatik jokinlanbilik yuʼune, jaʼik te machʼatik ikʼbilik, te tsabilik sok te jun yoʼtanike».
15 Sok jich la yalbon te chʼul-abate: «Te jaʼetik la awil te banti nakal te j-antsinel* antse, jaʼ señail lumetik, bayal ants winiketik, nacionetik sok kʼopiletik.
16 Te lajunchʼix xulubiletik te la awil sok te chambalam te xiʼbantik sba yame spʼajik te j-antsinel* ants, yame spojbeyik spisil te bintik ay yuʼun sok tʼanalme ya yijkitayik. Yame stiʼbeyik te sbakʼetal sok jkʼaxelme ya schikʼik ta kʼajkʼ.
17 Melel te Dios jaʼ la yakʼtiklanbey ta yoʼtanik te ya spasik te bin ya skʼan yoʼtan stukele, jaʼ te jun-nax ya schap skʼopik te ajwaliletik yuʼun ya yakʼbeyik tulan yaʼtel te chambalam te xiʼbantik sba jaʼto teme kʼot ta pasel te bintik yaloj te Diose.
18 Te ants te la awil jaʼ señail te mukʼul lum te ya xwentainwan jich te bin-utʼil ajwalil ants ta stojol te ajwaliletik te ayik ta balumilal».
Notaetik
^ O «jmulawil».
^ O «schapoj».
^ O «ma lek».
^ O «jmulawil».
^ O «smeʼ», «smama».
^ O «Chajpnax la kil».
^ O «chajpnax ya awaʼiy».
^ O «tijil».
^ Jaʼ skʼoplal te yal snichʼnab te Adán sok te Evae.
^ O «chajpnaxme ya yilik».
^ O «Alal».
^ O «jmulawil».
^ O «jmulawil».
