Apocalipsis 20:1-15
20 La kil jtul chʼul-abat te yak ta koel tal ta chʼulchan te yichʼoj te sllaveul te xaab sok yichʼoj mukʼul cadena ta skʼab.
2 La stsak te dragón, te antiguo chan, jaʼ te Pukuj* sok Satanás sbiil, la schuk jmil jaʼbil.
3 La schʼoj ochel ta xaab, la smak jilel, sok la yakʼbey sello te stiʼil yuʼun jich maba ya sloʼlayix te nacionetik jaʼto te kʼalal ya stsʼakaj te jmil jaʼbil. Tey-abi yame yichʼ koltayel lokʼel jtebnax tiempo.
4 La kil mukʼul naktajibaletik, te machʼatik najkajik tey-ae la yichʼik akʼbeyel tulan yaʼtelik yuʼun ya x-ichʼawanik ta kʼop. Jich, la kilbey skuxlejalik te machʼatik la yichʼik milel* ta skaj te la yalbeyik skʼoplal te Jesús sok te la yalbeyik skʼoplal te Diose, jaʼik te machʼatik maba la yichʼik ta mukʼ te chambalam te xiʼbantik sba soknix te maba la yichʼik ta mukʼ te slokʼombae sok maba la skʼan la yichʼbeyik te smarca ta stiʼbaik ni ta skʼabik. Jaʼik ini chaʼkuxajik sok wentainwanik jmil jaʼbil sok te Cristo.
5 Jaʼ ini jaʼ te sbabial chaʼkuxajele. (Te yantikxan te machʼatik lajemik maba chaʼkuxajik jaʼto te kʼalal tsʼakaj te jmil jaʼbile).
6 Bayalme yutsilik sok chʼultesbilik te machʼatik ya yichʼik te sbabial buelta chaʼkuxajel; maba ya xwentainotik yuʼun te schebal buelta lajel, melel sacerdoteetik yuʼun Dios sok yuʼun Cristo ya xkʼotik, yame sjokinik ta wentainwanej te Cristo jmil jaʼbil.
7 Pero, te kʼalal tsʼakajix-a te jmil jaʼbil, te Satanás yame yichʼ koltayel lokʼel tal ta chukel
8 yuʼun ya sloʼlay te nacionetik te ay ta schanxujkul te balumilal —jaʼ te Gog sok te Magog— yuʼun ya stsobtiklan ta yakʼel guerra. Te yajtalul jaʼ jich te bin-utʼil sjiʼal te mar.
9 La spuk sbaik bael ta swolol te balumilal sok la sjoytayik te campamento yuʼun te machʼatik chʼultesbilik sok te mukʼul lum te kʼux ta oʼtanile. Pero ko tal kʼajkʼ ta chʼulchan te lajinotik yuʼune.
10 Te Pukuj* te loʼlayotik yuʼune la yichʼ chʼojel ochel ta pamal kʼajkʼ te yak ta tilel sok azufre, jaʼ te banti yichʼojikix chʼojel ochel te chambalam te xiʼbantik sba sok te lotil j-alwanej. Ta kʼajkʼal ajkʼabal yame xkʼax swokolik* ta sbajtelkʼinal.
11 La kil jun mukʼul sakal naktajibal sok te machʼa nakal tey-ae. Te balumilal sok te chʼulchan lokʼik ta anel ta stojol sok maʼyuk la yichʼikix ilel yuʼun-a.
12 Sok la kil te machʼatik lajemik —mukʼ bikʼit— tekʼajtik ta stojol te mukʼul naktajibal sok la yichʼ jamel balbil junetik. Pero la yichʼ jamel yan balbil jun: jaʼ te balbil jun yuʼun kuxlejalil. Ta swenta te bintik tsʼibaybil ta balbil junetik, jich la yichʼik ichʼel ta kʼop te machʼatik lajemik ta swenta te yaʼtelike.
13 Te mar la skoltaylan tal te machʼatik lajemik tey-ae, te lajel sok te Mukenal* la skoltaylan lokʼel tal te machʼatik lajemik tey-ae. Ta jujuntul la yichʼik ichʼel ta kʼop ta swenta te yaʼtelike.
14 Te lajel sok te Mukenal* la yichʼik chʼojel ochel ta pamal kʼajkʼ te yak ta tilel. Te pamal kʼajkʼ te yak ta tilel jaʼ señail te schebal buelta lajel.
15 Jaʼnix jich, te machʼatik maba tsʼibaybil sbiilik ta libro yuʼun kuxlejalil la yichʼik chʼojel ochel ta pamal kʼajkʼ te yak ta tilele.
Notaetik
^ O «Diablo».
^ Ta griego: «la yichʼik milel ta echej».
^ O «Diablo».
^ O «yichʼik chukel».
