Carta ta stojol te Colosenseetik 1:1-29
1 Joʼon Pabloon, te jpuk-kʼopon yuʼun te Cristo Jesús ta swenta te skʼanojel yoʼtan te Diose, joʼon sok te kermanotik Timoteo
2 ya jtikunbeyexkotik te carta ini, jaʼex te chʼultesbilex sok te jun awoʼtanik te jun ayex sok te Cristo, jaʼex te ayex ta Colosas:
Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios.
3 Spisil-ora ya kalbeykotik wokol Dios te sTat te Kajwaltik Jesucristo te kʼalal ya jkʼopontik Dios ta atojolik,
4 melel kaʼiyojkotik stojol te schʼuunel awoʼtanik ta stojol te Cristo Jesús sok te skʼuxul awoʼtanik ta stojol spisil te machʼatik chʼultesbilik
5 ta swenta te bin yakex ta smaliyel te kʼejbil ta atojolik ta chʼulchane. Te bin yakex ta smaliyel te la awaʼiyik stojol ta swenta te smelelil kʼope, jaʼ te lek yachʼil kʼop
6 te jul ta atojolike. Jich te bin-utʼil yak ta sitinel te lek yachʼil kʼop sok te yak ta pukel bael ta swolol balumilal, jaʼnix jich yakex ta spasel-euk jaʼto tal te kʼalal la awaʼiyik stojol sok te kʼalal la anaʼbeyik swentail ta lek te bin-nix yilel ta smelelil-a te slekil yoʼtan Dios te ma snujpʼuk ya kichʼtike.
7 Jaʼ te bin la yakʼbeyex anopik te kermanotik Epafras te kʼux ta koʼtantik, te joy jbatik ta abatinel sok, jaʼnix jich jun yoʼtan yak ta abatinel ta stojol te Cristo ta jwentatik.
8 Jaʼnix la yalbonkotik te ay skʼuxul awoʼtanik te ya yakʼ chiknajuk te chʼul espiritue.*
9 Jaʼ yuʼun, jaʼto te kʼalal jich la kaʼiykotik akʼoplalike, maba jkomoj jbatik ta skʼoponel Dios ta atojolik sok ta skʼanel te yakuk xkʼot ta awoʼtanik ta lek te skʼanojel yoʼtan Dios swenta ayuk lek apʼijilik sok te yakuk awichʼbeyik ta lek swentail te bin ya yakʼ ta nopel te chʼul espiritue,*
10 yuʼun jich toj ya xkuxinex ta swenta te Jehová* sok jich lek yoʼtan awuʼunik ta spisil te bin ya apasik te kʼalal ya sitinex ta spasel spisil lekil aʼtelil sok te bejbe* ya anaʼbeyikxan sba ta lek te Diose.
11 Jaʼnix jich ya jkʼanbeytik ta swenta te yutsil yuʼel te yakuk yichʼ yip awoʼtanik te bantito kʼalal ya xtuun awuʼunik, yuʼun jich ay slamalil awoʼtanik sok stseʼelil awoʼtanik ta stsʼikel spisil
12 te kʼalal ya awalbeyik wokol te Tatile. Melel jaʼ schajpanojex yuʼun pajal ya awichʼik sok te bin ya yichʼik akʼbeyel te machʼatik chʼultesbilik te ayik ta sakal kʼinale.
13 Jaʼnix la skoltayotik lokʼel ta yuʼel te ijkʼal kʼinale sok la yikʼotik bael ta wentainel yuʼun te sNichʼan te kʼux ta yoʼtane,
14 te jaʼ ta swenta te kolotik jilel ta libre, jaʼ te ya jtatik perdón yuʼun te jmultike.
15 Jaʼ slokʼomba te Dios te ma chikan ta ilele, jaʼ te machʼa sbabial la yichʼ pasel ta spisil te bintik aye;
16 melel jaʼ ta swenta te la yichʼtiklan pasel spisil te bintik ay ta chʼulchan sok ta balumilal, spisil te bintik chikanik ta ilel sok te bintik ma chikanik ta ilele, chikan teme mukʼul naktajibaletik, wentainel, ajwaliletik o te machʼatik yichʼoj mukʼ yaʼtelik. Jaʼnix jich, spisil te bintikxan aye jaʼ la yichʼ pasel ta swenta sok jaʼ la yichʼ pasel ta stojol.
17 Jaʼnix jich ayix stukel-a te kʼalal mato ayuk spisil-a te bintik aye, sok jaʼ ta swenta te la yichʼ pasel spisil te bintik aye,
18 sok jaʼ jolal yuʼun te bakʼetalil, jaʼ te congregación. Jaʼ sjajchibal stukel, jaʼ te machʼa nail la yichʼ chaʼkuxajtesel ta yolil te machʼatik lajemike, yuʼun jich jaʼ nail ya xkʼot ta spisil te bintik aye;
19 melel te Dios la skʼan te tsʼakal ya yichʼ spisil stukel te Cristo
20 sok jaʼ ta swenta te lekuk ya yil sbaik spisil te bintik ay —spisil te bintik ay ta balumilal sok spisil te bintik ay ta chʼulchan—, jaʼ la yakʼ te lamalkʼinal ta swenta te la smal schʼichʼel ta teʼ yuʼun wokolil.*
21 Ta melel, namal* ayex ta stojol Dios ta nailal sok akontrainojik-a, melel jaʼ ay ta awoʼtanik spasel-a te bintik chopole,*
22 pero ta ora ini, te Dios la yakʼ te lek ya awil abaik sok ta swenta te sbakʼetal te machʼa la yakʼ sba ta lajele, yuʼun jich chʼultesbil ya xkʼoex, te maʼyuk awabakulik* sok te maʼyuk amulik ta stojole.
23 Jichme ya xkʼot ta pasel teme spisil-ora ya awakʼik ta ilel schʼuunel awoʼtanik, teme awichʼoj awiptajibik ta yiptajib te na, teme tsʼunulex ta lek sok teme ma xa awijkitayik te smukʼul awoʼtanik ta swenta te lek yachʼil kʼop te la awaʼiyik stojole sok te la yichʼix cholbeyel spisil te bintik pastiklanbil te ay ta yeʼtal te chʼulchane. Joʼon Pabloon, te la kichʼ akʼbeyel kaʼtel ta spukel te lek yachʼil kʼop-abi.
24 Ay stseʼelil koʼtan ta ora ini ta skaj te ayon ta wokol ta atojolike, sok yak ta kujchel kuʼun te wokoliletik yuʼun te Cristo te yato xkʼax ta jbakʼetal ta swenta slekilal te sbakʼetal, jaʼ te congregación.
25 Kʼoon ta j-abat yuʼun te congregación ini, jaʼ te aʼtelil te la kichʼ akʼbeyel yuʼun te Dios ta scholbeyel ta tsʼakal te skʼop te jaʼ ta swenta te alekilalike,
26 jaʼ te bin mato yakʼoj ta naʼel-a te Dios ta stojol te ants winiketik ta namey sok ta stojol te kajalkaj tsʼumbaliletike. Pero, ta ora ini jaʼ la yichʼix akʼbeyel snaʼik te machʼatik chʼultesbilik yuʼune,
27 jaʼnix jich te Dios la skʼan la yakʼbey snaʼ te machʼatik chʼultesbilik te yutsil skʼulejal te bin mato yakʼoj ta naʼel-ae sok te la yichʼix akʼel ta naʼel ta yolil te jyanlumetike. Te bin mato yakʼoj ta naʼel-a te Diose, jaʼ te Cristo te jun ayex soke, te yakex ta smaliyel te pajal ya awichʼ awutsilalik soke.
28 Jaʼ te machʼa yakotik ta yalbeyel skʼoplal, te jamal yakotik ta yalbeyel spisil te ants winiketik sok te yakotik ta snojptesel sok spisil pʼijil oʼtanil, yuʼun jich ya awichʼik tejkʼanel ta apisilik jich bin-utʼil ants winiketik te jun ayex sok te Cristo te yijuben te schʼuunel awoʼtanike.
29 Jaʼ yuʼun, tulan yakon ta aʼtel, ta swenta te tulan yak ta aʼtel ta jtojol te yip ya yakʼbone, yak ta juʼel kuʼun.
