Carta ta stojol te Colosenseetik 2:1-23
2 Ya jkʼan te yakuk anaʼik stojol te yakon ta tulan aʼtel ta swenta alekilalik soknix ta stojol te machʼatik ayik ta Laodicea sok spisil te machʼatik maʼyuk yilojbonik jsite.
2 Te bin ya jkʼane jaʼ te ya kakʼbeyex smukʼul kʼinal awaʼiyik sok te junuknax ayex ta apisilik ta swenta kʼuxul oʼtanil sok te ayuk awuʼunik spisil te kʼulejalil te ya yichʼ tael ta swenta te tsʼakal kʼoemix ta awoʼtanik te bin smelelile, yuʼun jich ya xkʼot ta awoʼtanik ta lek te bin mato yakʼoj ta naʼel-a te Diose: jaʼ te Cristo.
3 Melel jaʼ nakʼbil ta stojol spisil te kʼulejalil yuʼun te pʼijil oʼtanil sok te bin ay ta naʼel.
4 Jich ya kalbeyex ini swenta maʼyuk machʼa ya sloʼlayex ta swenta pʼijil kʼopetik yuʼun te balumilale.
5 Manchukme maba tey ayon-a te banti ayexe, jokinojex ta koʼtan, tseʼel koʼtan yuʼun te chajpanbil ta lek awuʼunik te bin ya apasike sok te tulan te schʼuunel awoʼtanik ta stojol te Cristo.
6 Jich te bin-utʼil la achʼuunikix te Kajwaltik Cristo Jesús, junukme awoʼtanik ya xbeenex sok,
7 te tsʼunbilukex ta stojol, te tsʼakbilukex moel ta stojol sok te yichʼojuk yip te schʼuunel awoʼtanik, jich te bin-utʼil la awichʼik nojptesele, sok te yakuk anaʼik yalel bayal wokole.
8 Tsajtayame* abaik te manchuk ayuk machʼa ya sloʼlayex ta swentanax spʼijil yoʼtan te ants winiketik sok te snopojibal yuʼunik te ya xloʼlaywanik te talemik ta costumbreetik yuʼun te ants winiketik, te jaʼ te snopojibal yuʼun te balumilal, te ma jaʼuk talem ta swenta te Cristo.
9 Melel te Cristo tsʼakal yichʼojbey spisil te taleliletik yuʼun te Diose.
10 Jich yuʼun, te jaʼexe tsʼakal awichʼojikix-euk ta swenta te Cristoe, te jaʼ jolal yuʼun spisil te ajwaliletik sok spisil te machʼatik yichʼoj mukʼ yaʼtelik.
11 Jaʼ yuʼun la awichʼik circuncisión* yuʼun lek ya awil abaik sok, pero ma jaʼuk jun circuncisión te la yichʼ pasel ta skʼab ants winiketik, jaʼ te circuncisión yuʼun te Cristo, jaʼ te ya alokʼesik jilel te bin ya skʼan te abakʼetalike.
12 Melel te jaʼexe pajal la awichʼik mukel sok te Cristo ta swenta te ichʼjaʼ* yuʼune, ta swenta te bin-utʼil lek awiloj abaik soke, jaʼnix jich pajal la awichʼik chaʼkuxajtesel sok, jaʼ yuʼun te ay schʼuunel awoʼtanik ta swenta te bin-utʼil ya x-aʼtej te yuʼel te Diose, te machʼa la schaʼkuxajtes te Cristo ta yolil te machʼatik lajemike.
13 Jaʼnix jich, manchukme lajemex ta swenta te la akʼaxuntayik mantal sok te maba awichʼojik circuncisión* ta abakʼetalik-ae, te Dios pajal la yakʼbeyex akuxlejalik sok te Cristoe. Ta swenta slekil yoʼtan la spasbotik perdón yuʼun te la jkʼaxuntaytik mantal
14 sok la stupʼ te bin tsʼibaybil ta kʼabal te yichʼoj bayal mantaliletik te skontrainojotik-ae. Jaʼnix la slokʼes ta koliltik te kʼalal la sjijpan ta teʼ yuʼun wokolil.*
15 Ta swenta ini la spojbey yaʼtel ta jkʼaxel te ajwaliletik sok te machʼatik yichʼoj mukʼ yaʼtelik sok la yakʼ ta ilel ta komonsitil te la stsaltiklan te kʼalal la yikʼtiklan ta beel jich te bin-utʼil jchukeletik.
16 Jich yuʼun mame ayuk machʼa ya yichʼex ta kʼop ta swenta te bin ya aweʼik sok bin ya awuchʼik o ta spasel kʼin, o ta swenta yichʼel ta mukʼ te yuninal u o te skʼajkʼalel sábado.
17 Spisil ini jaʼ yaxinal te bintik ya xtal ta patile, pero te bin smelelil jaʼ yuʼun te Cristo.
18 Mame xa awakʼ spojbeyex te amajtanik te machʼa ya skuy te ay spekʼelil yoʼtan sok te ya smulanik te ya yichʼik ta mukʼ te chʼul-abatetike. Leknax ya yaʼiy sbaik ta swenta te bin staojik ta ilele.* Ta swenta te jaʼ baem yoʼtanik ta snopilanel te bin swentanax chʼichʼbakʼete, maʼyuk swentail te bin ya stoy sbaik yuʼune,
19 jaʼnix jich maba jun ayik sok te jolal, te jaʼ ta swenta te ya yakʼbey te bin ya xtuun yuʼun te bakʼetalil sok te jun-nax ya x-aʼtejik ta swenta te bin-utʼil stsʼakoj sba te baketik sok te schial te jich ya xmukʼub te bin-utʼil ya skʼan yoʼtan te Diose.
20 Teme pajal lajex sok te Cristo yuʼun te bintik swenta balumilal, ¿bin yuʼun te yakex ta kuxinel te jich yilel te jaʼto yuʼunex te balumilale? ¿Bin yuʼun te yakexto ta schʼuunel te mantaliletik
21 «mame xa atsak, mame xa aweʼ, mame xa apik», te xchie?
22 Spisil ini ya xlaj skʼoplal te kʼalal ya yichʼ tuuntesele, melel jaʼ mantaliletik sok jaʼ te bin ya yakʼik ta nopel te ants winiketike.
23 Spisil te mantaliletik ini jich yilel te ya yakʼik ta ilel te bin-utʼil ya skʼan ichʼel ta mukʼ te Diose sok jich yilel te ay pekʼel oʼtanil tey-a te kʼalal kʼaxto ya yakʼbeyik swokol te sbakʼetalike, pero jkʼaxel ma xkoltayotik ta spʼajel te bintik ya skʼan te sbakʼetalike.
Notaetik
^ O «Ilame».
^ Te bin la skʼan la yal te Pablo liʼi jaʼ te bin ya spasik te machʼatik ayik ta lotil religión te kʼalal ay machʼa yachʼil ya x-och ta sreligionik.
