Carta ta stojol te Efesioetik 1:1-23
1 Joʼon Pabloon, te jpuk-kʼopon yuʼun te Cristo Jesús ta swenta te skʼanojel yoʼtan te Diose, ya jtsʼibay ta atojolik te carta ini, jaʼex te chʼultesbilex te ayex ta Éfeso sok te jun awoʼtanik ta stojol te Cristo Jesús:
2 Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.
3 Akʼa yichʼ albeyel yutsil skʼoplal te Dios te sTat te Kajwaltik Jesucristo, melel la yakʼbotik te bendición te talem ta stojol te chʼul espíritu* ta swenta te jun ayotik sok Cristoe,
4 melel jaʼ la stsaotik te kʼalal mato ayuk-a te ants winiketik yuʼun jich jun ya xkʼootik sok te Cristo, yuʼun jich chʼultesbil ya xkʼootik sok te manchuk ayuk kabakultik ta stojol Dios ta swenta te kʼuxul oʼtanile.
5 Nail la stsaotik yuʼun jich ya xkʼootik te bin-utʼil yal snichʼnab ta swenta te Jesucristo, jich te bin-utʼil ya smulan sok te bin-utʼil ya skʼan yoʼtan stukele,
6 yuʼun jich ya kalbeytik yutsil skʼoplal te slekil yoʼtan te ma snujpʼuk ya kichʼtik te jaʼnix la yakʼbotik kiltik sok slekil yoʼtan ta swenta te sNichʼan te kʼux ta yoʼtane.
7 Jaʼ ta swenta te Dios te la yakʼotik ta libre ta swenta te schʼichʼel te sNichʼane, jich, jaʼ te stael perdón yuʼun te jmultik ta swenta te skʼulejal te slekil yoʼtan Dios te ma snujpʼuk ya kichʼtike.
8 Kʼax jelawen la yakʼbotik kiltik te slekil yoʼtan te ma snujpʼuk ya kichʼtik soknix la yakʼbotik spʼijil koʼtantik sok te bintik ay ta naʼel
9 te kʼalal la yakʼbotik jnaʼtik te bintik mato yakʼoj ta naʼel-a te Dios ta swenta te skʼanojel yoʼtane. Jich te bin-utʼil ya smulan stukel, jaʼnix la snop te ya spas
10 te bin-utʼil ya schajpan te bintik ay te kʼalal ya stsʼakaj te yorail te albil skʼoplal yuʼune, yuʼun jich ya stsob tal ta stojol Cristo spisil te bintik ay ta chʼulchan sok spisil te bintik ay ta balumilal. Jich, jaʼ ta swenta,
11 jaʼ te machʼa jun ayotik sok te ay bin pajal ya kichʼtik akʼbeyel soke, te kʼalal nail la kichʼtik tsael jich te bin-utʼil la skʼan stukel te machʼa ya skʼotes ta pasel spisil te skʼanojel yoʼtane jaʼ chikan te bin-utʼil ya skʼan ya skʼotes ta pasel stukele,
12 yuʼun jich ya yichʼ albeyel yutsil skʼoplal te yutsilal te Dios ta jwentatik, joʼotik te nail la kakʼtik smukʼul koʼtantik ta stojol te Cristoe.
13 Jaʼnix jichex-euk la awakʼ smukʼul awoʼtanik ta stojol te kʼalal la awaʼiyik te smelelil kʼope, jaʼ te lek yachʼil kʼop ta swenta te akolelike. Te kʼalal achʼuunojikix-ae, la awichʼik aselloilik ta swenta te chʼul espíritu* te yaloj Dios te ya yakʼbeyex ta swenta te Cristoe
14 te jaʼ señail te bin ya xbajt kichʼtik akʼbeyele, yuʼun jich libre ya xjil te machʼatik jaʼ yuʼun te Dios ta swenta te machʼa la sle jkoleltik yuʼun jich ya yichʼ albeyel yutsil skʼoplal.
15 Jaʼnix jichon-euk, jaʼto te kʼalal la kaʼiy stojol te schʼuunel awoʼtanik ta stojol te Kajwaltik Jesús sok te skʼuxul awoʼtanik te ya awakʼbeyik yil spisil te machʼatik chʼultesbilike,
16 maba ya jkom jba ta yalbeyel wokol Dios ta atojolik. Yananix jnaʼex-a te kʼalal ya jkʼopon te Diose,
17 yuʼun jich te Dios yuʼun te Kajwaltik Jesucristo, te Tatil te ay yutsilal, akʼa yakʼbeyex spʼijil awoʼtanik sok ayuk bin ya yakʼbeyex anaʼik te bitʼil yakex ta snaʼbeyel sba ta leke.
18 Jaʼ la yakʼbeyex spʼijil awoʼtanik yuʼun jich ya anaʼik bin-a te yakex ta smaliyel ta swenta te la yikʼex, sok bintik-a te kʼulejalil te ay yutsilal te skʼejoj yuʼun ya yakʼbey te machʼatik chʼultesbilike
19 sok te jelawen yutsilal te smukʼul yuʼel te ya yakʼ ta ilel ta jtojoltik te jchʼuunjelotike. Te smukʼul yuʼel ini chiknaj ta ilel
20 te kʼalal la schaʼkuxajtes te Cristo ta yolil te machʼatik lajemike sok te la yakʼ najkajuk ta swaʼel kʼab ta chʼulchan,
21 te jaʼ kʼax toyol ya xkʼot ta stojol spisil te ajwaliletik, te machʼatik yichʼoj mukʼ yaʼtelik, te machʼatik ya xwentainwanik sok spisil biililetik te ya xjuʼ albeyel skʼoplal, ma jaʼuknax ta ora ini,* soknix te ya xtal ta patile.
22 Jaʼnix jich, te Dios la yakʼbey ta yeʼtal yok spisil te bintik ay sok la yakʼ te jaʼ jolal ya xkʼot yuʼun spisil te bintik swenta te congregación,
23 te jaʼ sbakʼetal sok te ya snojes ta taleliletik yuʼun spisil te bintik aye.
Notaetik
^ Ta griego: «ta balumilal ini».
