Carta ta stojol te Efesioetik 2:1-22
2 Jaʼnix jich, te Dios la yakʼbeyex akuxlejalik manchukme lajemex ta swenta te la akʼaxuntayik mantal sok te la ale amulik
2 te la apasik te kʼalal la atʼunbeyik stalel te balumilal, sok te la atʼunik te ajwalil te swentainoj te ikʼe, jaʼ te espíritu te yak ta aʼtel ta stojol te alnichʼanetik yuʼun jkʼaxunkʼop.
3 Ta melel, ta jpisiltik jich jtaleltik ta nailal-euk, jaʼ bajt ta koʼtantik spasel te bintik ya skʼan te jbakʼetaltik, jaʼ la jpasbeytik skʼanojel yoʼtan te bakʼet sok te snopojibal kuʼuntik. Ta swenta te jich jtaleltik-abi, jaʼ yal snichʼanotik te yilinba te Diose, jich te bin-utʼil te yantike.
4 Pero, te Dios te bayal ya snaʼ yoʼbolil jbatik ta swenta te smukʼul skʼuxul yoʼtan te la yakʼbotik kiltike,
5 pajal la yakʼbotik jkuxlejaltik sok te Cristo, manchukme lajemotik ta swenta-a te la jkʼaxuntaytik mantale (te jaʼexe la awichʼik koltayel ta swenta te slekil yoʼtan Dios te ma snujpʼuk ya kichʼtike).
6 Jaʼnix jich, pajal la schaʼkuxajtesotik sok te Cristo sok pajal la snajkanotik sok ta chʼulchan yuʼun jich jun-nax ya xkʼootik sok te Cristo Jesús,
7 yuʼun jich ta pajel chaʼbej, ya yakʼ ta ilel te jelawen yutsil te slekil yoʼtan te ma snujpʼuk ya kichʼtik ta swenta te lek yoʼtan ta jtojoltik te bitʼil jun-nax ayotik sok te Cristo Jesús.
8 Ta swenta te slekil yoʼtan Dios te ma snujpʼuk ya kichʼtik, jaʼex la ata akolelik ta swenta te schʼuunel awoʼtanike. Pero, ma jaʼuk ta swenta awaʼtelik, jaʼ majtanil yuʼun te Diose.
9 Ta melel, ma jaʼuk ta swenta awaʼtelik, jich maʼyuk machʼa ya xjuʼ ya stoy sba yuʼun.
10 Te joʼotike yaʼtelotik skʼab te Diose sok la kichʼtik pasel yuʼun jun ya xkʼootik sok te Cristo Jesús swenta ya jpastik lekil aʼteliletik te nailto schajpanoj te Dios te ya jpastike.
11 Jich yuʼun julukme ta awoʼtanik te bitʼil ayex ta nailalto, te jyanlumex ta awayinelikto,* jich naʼbil abaik te maba awichʼojik circuncisión* yuʼun te machʼatik yichʼojik circuncisión, jaʼ te bin pasbil ta kʼabal ta sbakʼetalik.
12 Ta nailalto maʼyukex ta stojol te Cristo, ma junuk alumalik sok te lum Israel, maba ochem akʼoplalik ta chapbilkʼopetik yuʼun te Diose. Maʼyuk bin ya amaliyik-a sok maba jokinbilex yuʼun Dios ta balumilal-a.
13 Pero, te bitʼil jun ayex sok Cristo Jesús ta ora ini, te namal* ayex ta stojol ta nailal, nopol* ayexix ta stojol ta swenta te schʼichʼel te Cristo.
14 Melel jaʼ lamalkʼinal kuʼuntik, jaʼ te la yakʼ te jun-nax ya xkʼootik te bitʼil chaʼtsojb ayotik-ae sok la sjin te tsʼajkʼ te ay ta koliltik te xatojotik-ae.
15 Ta swenta te sbakʼetal la slajinbey skʼoplal te bin ya sjach te kontrainele, jaʼ te Ley te bayal mantaliletik yichʼoje, yuʼun ya spas te jun-nax yachʼil ants winik ya xkʼot te chaʼtsojb ants winiketik te jun ayik sok te Cristo, jich la yakʼ lamalkʼinal,
16 sok te kʼax lek ya yilix sbaik sok Dios te chaʼpam lumetik te jun-nax ayix ta bakʼetalil ta swenta te teʼ yuʼun wokolil,* melel jaʼnix ta stojol te la slajinbey skʼoplal te kontrainele.
17 Xtaluk te Cristo sok la yalbeyex awaʼiyik te lek yachʼil kʼop yuʼun lamalkʼinal, jaʼex te namal* ayex-ae, sok la yalbey skʼoplal lamalkʼinal ta stojol te machʼatik nopol* ayik-ae,
18 melel jaʼ ta swenta te maʼyuk bin ya smakotikix te chaʼpam lumotik te jich ya xjuʼ ya x-ochotik ta stojol te Tatil ta swenta te chʼul espíritu.*
19 Jich yuʼun, te jaʼexe naʼbilix abaik sok maba jyanlumexix, pajalix alumalik sok te machʼatik chʼultesbilike sok jun kʼoemexix sok te machʼatik ay yuʼun te Diose,
20 te jaʼexe la awichʼik tsʼakel moel ta yiptajib te mukʼul na, te yiptajib te na jaʼik te jpuk-kʼopetik sok te j-alwanejetik, pero te Cristo Jesús jaʼ te mukʼul ton te ya yakʼbey yiptajib te xujk nae.
21 Te na te jun-nax ay sok te Cristoe lek stsʼakoj sba, yak ta toyel moel jaʼto te kʼalal ya xkʼatpʼuj ta chʼul templo yuʼun te Jehová.*
22 Jich bitʼil te jun ayex sok te Cristo, jaʼnix jich yakex ta tsʼakel moel yuʼun ya xkʼoex ta jun na te banti ya xnain te Dios ta swenta te chʼul espíritu* yuʼune.
