Carta ta stojol te Efesioetik 3:1-21
3 Jaʼ swentail ini, joʼon te Pabloon, te ayon ta chukel ta swenta te Cristo Jesús ta swenta alekilalik, jaʼex te jyanlumex...
2 Laniwan anaʼikix te la kichʼ akʼbeyel kaʼtel ta swentainel te slekil yoʼtan Dios te ma snujpʼuk ya kichʼtik yuʼun ya ata alekilalik,
3 jaʼ te la yakʼbon jnaʼ te Dios te bin mato yakʼoj ta naʼel-ae jich te bitʼil ay la jtsʼibaybeyex jtebuk skʼoplal ta nailale.
4 Jich yuʼun, te kʼalal ya akʼoponik te carta ini, yame awilik te kʼoem ta koʼtan ta lek te bin mato naʼbiluk ta swenta-a te Cristoe.
5 Te kajalkaj tsʼumbalil kʼaxem tale, te Dios maba la yakʼbey snaʼ te snichʼnab te winiketik te bin mato yakʼoj ta naʼel-ae jich te bin-utʼil la yakʼbeyix snaʼ ta ora ini te chʼul jpuk-kʼopetik yuʼun sok te j-alwanejetik ta swenta te chʼul espiritue:*
6 jaʼ te ay bin pajal ya kichʼtik sok te jyanlumetik sok te jun-nax jbakʼetaltik ya xkʼootik soke. Jaʼnix jich, pajal ya kichʼtik akʼbeyel te bin jamal yaloj te Dios te ya yakʼbotik ta swenta te jun ayotik sok te Cristo Jesús soknix ta swenta te lek yachʼil kʼope.
7 Jaʼ swentail te ochon ta j-abat yuʼun ini ta swenta te slekil yoʼtan Dios te ma snujpʼuk ya kichʼtik te jaʼ majtanil te la kichʼ akʼbeyel ta swenta te bin-utʼil ya x-aʼtej te yuʼel te Diose.
8 Joʼon, te kʼax pekʼelxan ayon ta stojol te machʼa pekʼel ay ta spisil te machʼatik chʼultesbilike, la kichʼ akʼbeyel te slekil yoʼtan Dios te ma snujpʼuk ya kichʼtik yuʼun ya jcholbey yaʼiy te jyanlumetik te lek yachʼil kʼop yuʼun te kʼulejalil yuʼun te Cristo te ma xjuʼ ta ajtayele,
9 yuʼun jich ya kakʼbey yilik ta spisilik te bin-utʼil ta wentainel te bintik mato yakʼoj ta naʼel-a te Diose sok te kʼax bayalix jaʼbil mukul yuʼun-ae, jaʼ te machʼa la spas spisil te bintik aye.
10 Yuʼun jich ta ora ini, te ajwaliletik sok te machʼatik yichʼoj mukʼ yaʼtelik ta chʼulchan ya snaʼik ta swenta te congregación te bayal ta chajp te bin-utʼil ya yakʼ ta ilel te spʼijil yoʼtan te Diose.
11 Jich stsakoj sba skʼoplal sok te skʼanojel yoʼtan te sbajtelkʼinal ay te jaʼnix la schajpan ta stojol te Cristo, jaʼ te Kajwaltik Jesús.
12 Jaʼ ta swenta te maʼyuk bin ya smakotik yuʼun ya xkʼopojotik sok te maʼyuk bin ya xjuʼ ya smakotik yuʼun ya x-ochotik ta stojol te Dios sok smukʼul koʼtantik, melel ay schʼuunel koʼtantik ta stojol te Cristo.
13 Jaʼ yuʼun ya jkʼanbeyex te manchuk ya xchebaj awoʼtanik yuʼun te wokoliletik yak ta kʼaxel ta jtojol ta awentaike, melel te bin lek ya xlokʼ-ae jaʼ te ya ata awutsilalik te jaʼexe.
14 Jaʼ swentail te ya jkejan jba ta stojol te Tatile,
15 te jaʼ ta swenta te chiknaj te machʼatik* ay ta chʼulchan sok spisil te familiaetik ta balumilal.
16 Ya jkʼanbey ta oración, te Dios te bayal yutsilal stukele, te akʼa yakʼbeyex yip awoʼtanik ta swenta te yuʼel te chʼul espíritu* yuʼune,
17 yuʼun jich ta swenta te schʼuunel awoʼtanike, ya xnain ta awoʼtanik te Cristo sok kʼuxul oʼtanil. Jaʼnix jich ya jkʼopon Dios ta atojolik te tsʼunbilukex ta lek sok te awichʼojuk awipik ta yiptajib te nae,
18 yuʼun jich ta apisilik sok te machʼatik chʼultesbilik ya skʼan tsʼakal ya xkʼot ta awoʼtanik ta lek te bin-utʼil ay te sjamalul, te snajtil, te stoyolil sok te skʼubulil,
19 sok te ya xjuʼ ya anaʼbeyik skʼoplal te skʼuxul yoʼtan te Cristo te jaʼ toyolxan ay-a te bin ay ta naʼel, yuʼun jich tsʼakal ya yakʼbeyex spisil te taleliletik yuʼun te Diose.
20 Ta ora ini, te machʼa ta swenta yuʼel —te yak ta aʼtel ta jtojoltike— ya xjuʼ te kʼaxtoxan jich ya yakʼbotik spisil-a te bin ya jkʼanbeytik o te bin-utʼil jnopojtike,
21 jaʼ akʼa yichʼ albeyel yutsil skʼoplal te Dios ta sbajtelkʼinal ta swenta te congregación sok ta swenta te Cristo Jesús soknix spisil te kajalkaj tsʼumbaliletike. Jichuk.
Notaetik
^ Ta griego: «spisil te familiaetik».
