Carta ta stojol te Efesioetik 4:1-32
4 Jich yuʼun, joʼon te chukulon ta swenta te Kajwaltike, ya jkʼanbeyex te tojuk ya xkuxinex ta swenta te bitʼil ikʼbilexe:
2 kʼax pekʼelukme xa awakʼ abaik, mansouk awoʼtanik sok lamaluk awoʼtanik; talel kʼaxel kujchuk awuʼunik ta swenta skʼuxul oʼtanil te bin ya apasbey abaik;
3 pasaik tulan yuʼun junuknax ayex ta swenta te chʼul espíritu* sok te lamaluk awoʼtanik ya xkuxinex.
4 Jun-nax te bakʼetalil sok jun-nax te chʼul espiritue,* jichnix te bin-utʼil jun-nax te bin yakotik ta smaliyel te jaʼ ikʼbilex yuʼune.
5 Jun-nax te Kajwaltik, jun-nax te chʼuunel oʼtanil sok jun-nax te ichʼjaʼe.*
6 Jun-nax te Dios kuʼuntik sok Tatil kuʼuntik ta jpisiltik, te toyol ay ta jtojoltik te ya stuuntesotik ta jpisiltik yuʼun ya spas te yaʼtele sok bayal ta chajp te bin-utʼil ya x-aʼtej te yuʼele.
7 Ta jujuntul la kichʼtik akʼbeyel te slekil yoʼtan Dios te ma snujpʼuk ya kichʼtike, jaʼ chikan te bitʼil yakʼojbotik te Cristo te majtanil ini.
8 Melel jich ya yal te sJun Diose: «Te kʼalal mo bael ta chʼulchan, la yikʼ bael jchukeletik; la yakʼ winiketik jich bin-utʼil majtaniletik».
9 Pero, ¿bin ya skʼan ya yal te «mo bael», te xchie? ¿Mabal jaʼuk ya skʼan ya yal te nail ko tal ta alan, te jaʼ te balumilale?
10 Te machʼa ko tal jaʼnix te machʼa mo bael kʼalal ta sba chʼulchan swenta ya skʼotes ta pasel spisil te skʼanojel yoʼtan te Diose.
11 Ay machʼa la yak’ jich bin-utʼil jpuk-kʼopetik, j-alwanejetik, jcholkʼopetik yuʼun te lek yachʼil kʼop, jkanantaywanejetik sok jnojpteswanejetik.
12 Jich la yakʼtiklan ini yuʼun ya stojobteslan te machʼatik chʼultesbilik, yuʼun ya yichʼ pasel te yaʼtel Dios sok te ya yichʼ yip yoʼtan te jchʼuunjeletik yuʼun te Cristo
13 jaʼto teme jun-nax kʼootik ta jpisiltik ta swenta te schʼuunel koʼtantik sok te pajal ya jnaʼbeytik sba ta lek te sNichʼan te Diose, jaʼto teme yijub te snopojibal kuʼuntik jich te bin-utʼil jtul ants winik sok teme la jtabeytik te stalel te Cristoe.
14 Mame jichukotikxan te bin-utʼil alaletik, mame xkakʼtik te bayuknax ya yikʼotik bael biluk nojptesel te jich kʼoem te bin-utʼil yip sbul mar te bayuknax ya x-ikʼot bael yuʼun te ikʼe, ta skaj te pejtsʼetik yuʼun te winiketik te ay spʼijilik ta sloʼlayel te yantike.
15 Yan te joʼotik te smelelil ya xkʼopojotike, akʼa mukʼubukotik ta spisil ta swenta te skʼuxul oʼtanil ta stojol te jolal kuʼuntik, te jaʼ te Cristoe.
16 Jaʼnix ta swenta te Cristo te jun-nax stsʼaktiklanoj sba spisil te bintik ay ta bakʼetalile, jun-nax ya x-aʼtejik ta swenta te bin-utʼil stsʼakoj sba te baketike. Te kʼalal lek ya spas yaʼtel te jujunchajp te bintik ay ta bakʼetalile, jaʼme ya xkoltayot te bakʼetalil yuʼun ya xmukʼub ta swenta te kʼuxul oʼtanile.
17 Jich yuʼun ya kalbeyex sok ya jkʼanbeyex wokol ta sbiil te Kajwaltik te manchuk jichukix akuxlejalik te bin-utʼil te jyanlumetik te ma xtuun te snopojibal yuʼunike.
18 Ayik ta ijkʼal kʼinal te snopojibal yuʼunik sok namal* ayik ta stojol te kuxlejalil te ya yakʼ te Diose ta skaj te maʼyuk bin ya snaʼik sok kʼax tulan te yoʼtanike.
19 Te bitʼil maʼyukix kʼexlal ta yoʼtanik, maʼyukix skʼexlalik ta skʼaxuntayel mantal* sok ya xjelawik ta spasel te bintik ilobtik sbae.
20 Pero, te jaʼexe ma jichuk la anopik te jich stalel te Cristoe,
21 melel ma jichuk la awaʼiyik stojol sok ma jichuk la awichʼik nojptesel ta swenta te Jesús te jaʼ ay ta stojol te smelelil kʼope.
22 Te jaʼexe la anopik te ya skʼan ya awijkitayik te apokoʼ talelik, te jaʼ te bin-utʼil ayex ta nailaltoe sok te ya xbolobteswan ta skaj te loʼlayel yuʼun te mulile.
23 Mame xa akom abaik ta yachʼubtesel te snopojibal awuʼunike
24 sok ya skʼan ya alapik te yachʼil talelil te jich pasbil te bin-utʼil ya skʼan yoʼtan te Diose, te stsakoj yip ta bin stojil ta pasel sok ta smelelil jun-oʼtanil.
25 Jich bitʼil te la awijkitayikix spasel spisil ta chajp loʼlaywanej, ta jujuntulex smelelilukme te bin ya awalbeyik te apatxujkike, melel ta jpisiltik jtsʼakoj jbatik ta jun-nax bakʼetalil.
26 Teme ya x-ilinexe, mame xa ata amulik yuʼun; mame kʼalalto ta smaleluk kʼajkʼal te ilinemexe.
27 Mame xa awakʼik te ya x-och te Pukuj* ta awolilik.
28 Te machʼa ya x-elkʼaj mame x-elkʼajix, tulan akʼa aʼtejuk sok skʼab ta spasel lekil aʼtelil yuʼun jich ya xjuʼ ya yakʼbey te machʼa ay bin ya xtuun yuʼune.
29 Mame xlokʼ bolkʼop ta aweik. Spisil te bin ya awalike jaʼuk ya yakʼbey yip yoʼtan te yantik jaʼ chikan te bitʼil ya xtuun yuʼunik sok te yakuk sta slekilalik te machʼatik ya yaʼiybeyex te akʼopike.
30 Jaʼnix jich mame xa awakʼbeyik smel yoʼtan te chʼul espíritu* yuʼun te Diose, te jaʼ aselloilik yuʼun libre ya xjilex ta skʼajkʼalel te akolelike.
31 Ijkitayaik spisil lab-oʼtanil, kʼajkʼubel, ilinba, utaw sok kʼopetik te kʼux ta aʼiyel, jaʼnix jich spisil te bintik chopole.*
32 Talel kʼaxel akʼbeya aba awilik slekil awoʼtanik, kʼuxuk xa awaʼiy abaik sok naʼbeya yoʼbolil abaik, sok pasbeya abaik perdón sok spisil awoʼtanik, jich te bin-utʼil sok spisil yoʼtan la spasbeyex perdón te Dios ta swenta te Cristoe.
Notaetik
^ O «jakal».
^ O «toybail ta skʼaxuntayel mantal». Ta griego kʼop, asélgueia. Ilawil ta glosario, Maʼyuk kʼexlalil ta skʼaxuntayel mantal.
^ O «Diablo».
^ O «ma leke».
