Carta ta stojol te Efesioetik 5:1-33
5 Jich yuʼun nopbeyaik stalel te Diose jich te bin-utʼil yal snichʼnabex te kʼuxex ta yoʼtane.
2 Kʼuxme xa awaʼiy abaik ta spisil-ora jich te bin-utʼil kʼux la yaʼiyotik-euk* te Cristoe sok te la yakʼ sba jich bin-utʼil majtanil sok chikʼbil majtanil ta jtojoltik,* te jich sumet* yikʼ kʼot ta stojol te Diose.
3 Jich te bin-utʼil chʼultesbilex, mame ayuk bin-ora xa awalbeyik skʼoplal mulwej,* spisil ta chajp te bintik ilobtik sba o te bikʼtal oʼtanile.
4 Jaʼnix jich mame xa awalbeyik skʼoplal te bintik kʼexlaltik sbae, kʼopetik te ma xtuun,* aʼiyejetik te chopolik* ta aʼiyele sok spisil te bintik ma stojiluk ta alele. Te bin lekxan ya skʼan ya apasike jaʼ te ya awalbeyik wokol te Diose.
5 Melel te jaʼexe anaʼojik sok kʼoem lek ta awoʼtanik te machʼauk-a te ya yaʼiy mulwej,* machʼauk-a te ya spas te bin ilobtik sbae sok machʼauk-a te ay sbikʼtal yoʼtan —te jaʼ pajal sok te yichʼel ta mukʼ lokʼombaetik— maba ya yichʼik te Wentainel* yuʼun te Cristo sok te Diose.
6 Mame ayuk machʼa ya sloʼlayex sok kʼopetik te maʼyuk swentaile, melel jaʼ ta swenta te ya xtal yilinba Dios ta stojol te yal snichʼnab te jkʼaxunkʼopetike.
7 Jich yuʼun mame xa ajokinik ta spasel ini,
8 melel ijkʼal kʼinalex ta nailalto, pero ta ora ini sakal kʼinalexix ta swenta te jun ayex sok te Kajwaltike. Jichukme ya xbeenex te bin-utʼil yal snichʼnab sakal kʼinal,
9 melel te sit te sakal kʼinale smakojbey skʼoplal spisil ta chajp lekil oʼtanil, te bin stojil ta pasel sok te bin smelelile.
10 Ilame awilik ta lek te bin ya smulan te Kajwaltike
11 sok ijkitayaik spasel te aʼteliletik te ma xtuun te jaʼ yuʼun te ijkʼal kʼinal. Jaʼ lekxan te ya awakʼik ta ilel te bin yilel te yaʼtelike.
12 Melel kʼexlaltik sba ta alel te bintik muken ya spasike.
13 Spisil te bintik ma lek ya yichʼ pasele ya xchiknaj ta swenta te sakal kʼinal, melel spisil te bintik ya yichʼ akʼel ta ilele jaʼ sakal kʼinal.
14 Jaʼ yuʼun, jich ya yichʼ alel: «Wikʼame asit, jaʼat te wayalate, jajchan ta yolil te machʼatik lajemike, jichme ya xchiknaj ta atojol te xojobil te Cristoe».
15 Jich yuʼun tsajtayame* abaik ta lek te manchuk jichukex te bin-utʼil machʼatik ma snaʼik kʼinale, jichukexme te bin-utʼil machʼatik ay spʼijil yoʼtanik,
16 naʼaikme stuuntesel ta lek te tiempo, melel chopol* te bintik ya xkʼot ta pasel ta jujun kʼajkʼale.
17 Jich yuʼun ayukme spʼijil awoʼtanik sok naʼaikme bin-a te skʼanojel yoʼtan te Jehová.*
18 Jaʼnix jich mame xyakubex yuʼun te vino, melel yame yakʼ te ma xa anaʼ skomel abaik yuʼune; jaʼ lekxan te ya anojes ta awoʼtanik te chʼul espíritu.*
19 Talel kʼaxel xa akʼopon abaik ta salmoetik, albeyaik yutsil skʼoplal te Dios sok kʼayojtayaik ta swenta yichʼel ta mukʼ, kʼayojtayaik te Jehová* sok música ta awoʼtanik,
20 ta spisil albeyaik wokol spisil-ora te jTatik Dios ta swenta sbiil te Kajwaltik Jesucristo.
21 Talel kʼaxel akʼa abaik ta wentainel ta swenta xiʼel te Cristo.
22 Te antsetik te nujpunemik akʼa yakʼ sbaik ta wentainel yuʼun te smamalalik jich te bin-utʼil ya spasik ta stojol te Kajwaltike,
23 melel te mamalalile jaʼ jolal ta stojol te yiname, jich te bin-utʼil te Cristo jaʼ jolal yuʼun te congregación, te jaʼ jkoltaywanej yuʼun te bakʼetalil ini.
24 Jich te bin-utʼil te congregación yakʼoj sba ta wentainel yuʼun te Cristo, jaʼnix jich-euk te antsetik te nujpunemik akʼa yakʼ sbaik ta wentainel yuʼun te smamalalik ta spisil.
25 Winiketik te nujpunemexe, kʼuxme xa awaʼiy ta awoʼtanik te awinamik, jich te bin-utʼil kʼux la yaʼiy ta yoʼtan te Cristo te congregación sok te la yakʼ sba ta lajel ta stojol,
26 yuʼun jich la schʼultes kʼalal la sakubtes ta jaʼ, jaʼ-abi jaʼ te skʼop Diose,
27 yuʼun jaʼnix ya stejkʼan ta stojol te congregación sok spisil yutsilal, te maʼyuk yabakul,* te maʼyuk bin boloben yuʼun sok yantikxan te bintik ma lek skʼoplale, jaʼ ya skʼan te chʼultesbil sok te maʼyuk schopolile.
28 Jaʼnix jich, te winiketik te nujpunemik ya skʼan te kʼux ya yaʼiy ta yoʼtanik te yinamik jich te bin-utʼil kʼux ya yaʼiy ta yoʼtanik te sbakʼetalike. Te winik te kʼux ya yaʼiy ta yoʼtan te yinam jaʼnix kʼux ya yaʼiy sba,
29 melel maʼyuk jtuluk te machʼa ya spʼaj te sbakʼetale, te bin ya spase jaʼ te ya smakʼlin sok ya skanantay sok skʼuxul yoʼtan, jich te bin-utʼil ya spas te Cristo ta stojol te congregación,
30 melel jun-nax ayotik ta sbakʼetal.
31 «Jaʼ swentail te ya yijkitay jilel smeʼ stat te winik yuʼun ya yikʼ sba sok te yiname, jich jun-nax sbakʼetal ya xkʼot ta schebalik».
32 Jaʼ ini kʼax mukʼ skʼoplal te mato yakʼoj ta naʼel-a te Diose. Ta ora ini, jaʼ yakon ta yalbeyel skʼoplal te Cristo sok te congregacione.
33 Jich yuʼun, ta jujuntulex ya skʼan te kʼuxuk ya awaʼiy ta awoʼtanik te awinamik jich te bin-utʼil kʼux ya awaʼiy abaike. Jaʼnix jich te antse, akʼa yichʼ ta mukʼ sok spisil yoʼtan te smamalale.
Notaetik
^ O jaʼniwan la skʼan la yal «kʼux la yaʼiyex».
^ O jaʼniwan la skʼan la yal «ta atojolik».
^ O «xjukʼet».
^ O «ixtaʼkʼopetik».
^ O «ma lekik».
^ O «ilame».
^ O «ma lek».
^ O «yijkʼalul».
