Carta ta stojol te Efesioetik 6:1-24
6 Alnichʼanetik, chʼuunbeyaik smantal te ameʼ atatik te bitʼil jun ayex sok te Kajwaltike, melel jaʼ stojil ta pasel ini.
2 «Ichʼa ta mukʼ te atat sok te anan».* Jaʼ te sbabial mantalil-abi te ya yal te ay bin ya yichʼ tael yuʼune:
3 «Yuʼun jich lek ya xkʼoat ta lokʼel sok jal ya xkuxinat ta balumilal».
4 Tatiletik, mame xa awakʼ ilinuk yoʼtanik te awal anichʼnabike, chʼitesaik ta swenta te tojobtesel sok te tsitsel* yuʼun te Jehová.*
5 Mosoetik, chʼuunbeyaik smantal te awajwalik ta balumilal, xiʼaik sok nijkanik ta stojol sok chʼuunbeyaik smantal sok spisil awoʼtanik, jichukme ya awilik te jaʼ yakex ta schʼuunbeyel smantal te Cristoe.
6 Mame jaʼuknax ya apasik te kʼalal yakex ta ilel yuʼun te ants winiketike, te jaʼnax ya akʼanik te lek akʼoplalik yuʼune. Jichukexme te bin-utʼil j-abatetik yuʼun Cristo te ya spasik sok spisil yoʼtanik te skʼanojel yoʼtan te Diose.
7 Spisilukme awoʼtanik ya x-abatinex ta stojolik, jichukme ya awilik te yakex ta abatinel ta stojol te Jehová* ma jaʼuk ta stojol te ants winiketike,
8 melel anaʼojik te ya sutbeyex te Jehová* ta jujuntul biluk-a te bin lek ya apasike, chikan teme ayex ta mosoil o teme libre ayexe.
9 Jichex-euk, te yajwalex te mosoetike, spisilukme-ora pajal ya awiltiklan, mame xa axiwteslan, melel anaʼojik te pajal Awajwalik sok ta chʼulchan sok maʼyuk machʼa tsabilnax yuʼun stukel.
10 Ta slajibal, akʼame yichʼxan yip awoʼtanik ta stojol te Kajwaltik sok ta swenta te yip yuʼele.
11 Lapaik spisil te majkilal ya yakʼ te Diose, yuʼun jich ay yip awoʼtanik swenta maba ya xyalex ta pejtsʼetik yuʼun te Pukuje;*
12 melel ma jaʼuk ya jtsal jbatik sok chʼichʼbakʼet, jaʼ ya jtsal jbatik sok te ajwaliletik, te machʼatik yichʼoj mukʼ yaʼtelik, te ajwaliletik yuʼun te balumilal ini te ayik ta ijkʼal kʼinal sok te pukujetik te ay yipik te ayik ta toyole.
13 Jaʼ yuʼun lapaik spisil te majkilal te ya yakʼ te Diose, yuʼun jich ya xkujch awuʼunik te utsʼinel yuʼun te jkontratike, te kʼalal apasojikix spisil-a te bantito ya xjuʼ awuʼunike, junukme awoʼtanik.
14 Jich yuʼun, tulanme xa awakʼ abaik, chukulukme ta lek ta achʼujtik te cinturón yuʼun te smelelil kʼope, lapaik te smajkil awoʼtanik yuʼun te toj-oʼtanil
15 sok lapaik te atepik o axanabik sok chapalukex ta yalel te lek yachʼil kʼop yuʼun te lamalkʼinal.
16 Ma jaʼuknax-abi, tsakaik te mukʼul majkilal yuʼun te chʼuunel oʼtanile, yuʼun jich ya atupʼbeyik skʼajkʼal te flechaetik yuʼun te Satanase.*
17 Jaʼnix jich lapaik te smajkil jolal yuʼun te kolel sok te espada yuʼun te chʼul espíritu,* te jaʼ te skʼop Diose.
18 Jaʼnix jich kʼoponaik Dios ta spisil-ora ta swenta te yip te chʼul espiritue,* pasaik spisil ta chajp te bin-utʼil ta kʼoponel te Diose sok kʼanbeyaik wokol. Te kʼalal jich ya apasike, jichme wikʼil asitik sok spisil-ora kʼanbeyaik wokol Dios ta stojol te machʼatik chʼultesbilike.
19 Jaʼnix jich kʼoponbonik Dios ta jtojol-euk, yuʼun jich te kʼalal ya xkʼopojon ya kichʼ akʼbeyel jnaʼ te bin ya kal swenta maba ya xiwon ta yalel te bin mato yakʼoj ta naʼel Dios ta swenta te lek yachʼil kʼope,
20 jaʼ ta swenta te chukulon joʼon, te tikunbilon yuʼun te Diose, kʼoponbonik Dios yuʼun jich maba ya xiwon ta yalbeyel skʼoplal te lek yachʼil kʼop, jich te bin-utʼil ya skʼan ya xkʼopojone.
21 Swenta ya anaʼik te bin-utʼil ayon sok te bin yakon ta spasele, jaʼme ya yalbeyex awaʼiyik spisil te kermanotik Tíquico te kʼux ta koʼtantik sok te jun yoʼtan yak ta aʼtel ta stojol te Kajwaltike.
22 Jaʼ swentail te ya jtikun ta atojolik, yuʼun jich ya anaʼik te bin-utʼil ayonkotik sok yuʼun ya yakʼbeyex smukʼul kʼinal awaʼiyik.
23 Te jTatik Dios sok te Kajwaltik Jesucristo akʼame yakʼbey te kermanotaktik lamalkʼinal sok kʼuxul oʼtanil ta swenta te chʼuunel oʼtanil.
24 Ayukme ta stojolik te slekil yoʼtan Dios te ma snujpʼuk ya kichʼtik spisil te machʼatik kʼux ta yoʼtanik te Kajwaltik Jesucristo sok te kʼuxul oʼtanil te ma xlaj skʼoplale.
