Carta ta stojol te Filipenseetik 3:1-21
3 Ta slajibal, kermanotak te kʼuxex ta koʼtan, spisilukme-ora tseʼel awoʼtanik ta swenta te Kajwaltike. Ma wokoluk ya kaʼiy te ya jtsʼibaybeyex yan buelta ta swenta te bin kalojbeyexixe, yuʼun jaʼ ta swenta alekilalik.
2 Tsajtayame* abaik ta stojol te tsʼiʼetike; tsajtayame abaik ta stojol te machʼatik ya x-utsʼinwanike; tsajtayame abaik ta stojol te machʼatik ya sbojik te bakʼetalile.
3 Melel te joʼotike kichʼojtik te smelelil circuncisión,* joʼotik te yakotik ta spasel te chʼul aʼtelil ta swenta te chʼul espíritu* yuʼun te Diose sok leknax kʼinal ya kaʼiytik ta swenta te Cristo Jesús sok maba ya kakʼ smukʼul koʼtantik ta stojol te bakʼete,
4 teme ay machʼa ya skuy te ya xjuʼ ya smukʼulin yoʼtan te bakʼete, joʼon-abi.
Teme ay machʼa ya snop te ya xjuʼ ya smukʼulin yoʼtan te bakʼete, kʼaxtoxan-a te joʼone:
5 melel ta swaxakebal kʼajkʼal kayinel* la kichʼ akʼbeyel circuncisión,* jaʼ jlumal te Israel, talemon ta stsʼumbal Benjamín, hebreoon sok hebreo-euk te jmeʼ jtate, fariseoon ta swenta te leye;
6 ta skaj te jaʼ mukʼ skʼoplal ta koʼtan te bin jchʼuunoje, la jkontrain te congregación sok jaʼ bajt ta koʼtan spasel spisil te bintik toj ta pasel te ya yal te ley.
7 Pero, spisil te bintik mukʼ skʼoplal la kile, ta ora ini maʼyukix skʼoplal ta koʼtan* ta swenta te Cristoe.
8 Ta melel, jich ya kil te maʼyuk skʼoplal spisil te bintik aye, ta skaj te jaʼ bayalxan skʼoplal ta koʼtan te la jnaʼbey sba te Kajwaltik Cristo Jesús. Jaʼ ta swenta te la kijkitayix jilel te bintik ay kuʼun-ae sok jich ya kil te bin-utʼil kʼaʼpal swenta jun ya xkʼoon sok-a te Cristo,
9 jich ya xchiknaj ta ilel te jun ayon sok te Cristoe, pero ma jaʼuk toj ya kichʼ ilel yuʼun te la jchʼuun spasel te bin ya yal te Leye, jaʼ toj ya kichʼ ilel yuʼun te ay schʼuunel koʼtan ta stojol te Cristoe, jaʼ te toj ya kichʼtik ilel yuʼun Dios ta swenta te chʼuunel oʼtanile.
10 Te bin ya jkʼane jaʼ te ya jnaʼbey sba te Cristoe, ya jkʼan ya kaʼiy ta koʼtan te yip te chaʼkuxajel yuʼune sok te jich ya xkʼax jwokol-euk te bin-utʼil kʼax swokole, jaʼ te jich ya xlajon-euk te bin-utʼil laje,
11 yuʼun jich ya kil teme ya xjuʼ te nail ya kichʼ chaʼkuxajtesel ta yolil te machʼatik lajemike.
12 Ma yuʼunuk ya kal te kichʼojix te majtanile sok te ya kal te tojonix ta kʼinale, jaʼ ya jnuts yuʼun jich ya kil teme ya kichʼ te majtanil ta swenta te bin yuʼun la stsaon te Cristo Jesús.
13 Kermanotak, ma yuʼunuk ya kal te jtaojix te majtanile. Pero ay bin yakonix ta spasel: jaʼ te la jchʼayix ta koʼtan te bintik la kijkitayix jilel ta jpate sok ya jpas tulan ta stael te bin yak ta talele,
14 ya jnuts te banti ya skʼan ya xkʼoon yuʼun jich ya jta te majtanil, jaʼ te ikʼel yuʼun Dios ta chʼulchan ta swenta te Kajwaltik Cristo Jesús.
15 Jich yuʼun, jpisiltik te yijubenix te schʼuunel koʼtantike jichukme snopojibal kuʼuntik ini, pero teme ay yan te snopojibal awuʼunike, jaʼme ya yakʼbeyex anaʼik te Dios te bin stojil ta nopele.
16 Chikan te bantito kʼalal kakʼojbeytik yipale, mame jkom jbatik ta stʼunel te be te banti yakotikix ta beele.
17 Ta apisilik, kermanotak, kʼayinbonik te jtalele sok ilawilik te machʼatik yakik ta stʼunel te ejemplo te la kakʼbeyexkotik awilike.
18 Melel bayal machʼatik skontrainojik te teʼ yuʼun wokolil* yuʼun te Cristoe, bayal buelta la kalbey skʼoplalik, pero ta ora ini ya x-okʼon te kʼalal ya kalbey skʼoplalik.
19 Te bin ya xkʼot ta stojolik jaʼ te lajinele sok jaʼ dios yuʼunik te schʼujtike; ya stoy sbaik yuʼun te bintik ya skʼan ya xkʼexawik yuʼun te jichuke sok jaʼ baem ta yoʼtanik snopilanel te bintik swenta te balumilale.
20 Yan te joʼotike jaʼ jlumaltik te chʼulchane, sok ya jmaliytik sok spisil koʼtantik te Jkoltaywaneje, jaʼ te Kajwaltik Jesucristo,
21 ta swenta te smukʼul yuʼel jaʼme ya skʼatpʼun te jbakʼetaltik te maʼyuk yutsilal yuʼun jich ya xkʼootik te bin-utʼil te sbakʼetal te ay yutsilal stukele, soknix ta swenta te yuʼel ya xjuʼ ya swentain spisil te bintik aye.
Notaetik
^ O «Ilame».
^ O «jpʼejkʼajel», «jtojkel».
^ O jaʼniwan ya skʼan ya yal «spasemal koʼtan la kijkitayix».
