Carta ta stojol te Hebreoetik 1:1-14
1 Ta namey kʼinal, te Dios bayal buelta la skʼopon te antiguo jmeʼ jtatik ta swenta te j-alwanejetik sok bayal te bin-utʼil la skʼoponlane.
2 Pero, ta ora ini te slajibal kʼajkʼal ayotike, jaʼ ya skʼoponotikix ta swenta te sNichʼan te jaʼ la yakʼbey yuʼunin spisil te bintik aye sok te jaʼ ta swenta te la spas spisil te bintik ay ta chʼulchan sok ta balumilal.
3 Jaʼ xojobil te yutsilal te Diose sok mero jaʼ slokʼomba te bin yilel te Diose sok yakʼojbey yip spisil te bintik ay ta swenta yuʼel te skʼope. Te kʼalal schʼultesojotikix-a ta swenta te jmultike, la snajkan sba ta swaʼel kʼab te Machʼa kʼax bayal yutsilal ta toyol.
4 Jich yuʼun, jaʼ toyolxan kʼot te bin-utʼil te chʼul-abatetike, melel jaʼ mukʼxan kʼot sbiil te bin-utʼil te chʼul-abatetike.
5 Melel, ¿aybal jtul chʼul-abat te jich albil yuʼun te Diose: «Jaʼat jnichʼanat; ta ora ini kʼoonix ta atat»? O ¿aybal jich la yichʼ albeyel: «Joʼon staton ya xkʼoon sok jaʼ jnichʼan ya xkʼot», te xchie?
6 Te kʼalal ya stikun tal yan buelta ta balumilal te sba sNichʼan, jich ya yal: «Akʼa snijan sbaik ta stojol spisil te chʼul-abatetik yuʼun te Diose».
7 Jaʼnix jich ya yal ta stojol te chʼul-abatetik: «Te chʼul-abatetik yuʼune ya skʼatpʼun ta espirituetik, te j-abatetik yuʼune ya skʼatpʼun ta kʼajkʼ te yak ta tilele».
8 Pero, jich ya yal ta stojol te sNichʼan: «Te Dios jaʼ ya yakʼbat awaʼtel* ta wentainwanej ta sbajtelkʼinal, te bastón awuʼun yuʼun te Wentainel* jaʼ bastón yuʼun te bin toj ta pasele.
9 Kʼux la awaʼiy ta awoʼtan te bin stojil ta pasel sok la awilay te bintik chopol* ta pasele. Jich yuʼun te Dios, te Dios awuʼun, la smalbat ta atojol te aceite yuʼun tseʼel oʼtanil kʼaxemtoxan-a te bin-utʼil te ajoʼtake».
10 Jaʼnix jich la yalxan: «Kajwal, ta sjajchibal jaʼat la awakʼbey yiptajib te balumilale sok jaʼ yaʼtel akʼab te chʼulchane.
11 Ya xlajik stukelik, pero te jaʼate maʼyuk bin-ora ya xlajat; ya xpokoʼubik jich te bin-utʼil kʼuʼul pakʼal
12 sok jaʼatnix ya abal jich te bin-utʼil ya yichʼ balel jlijkʼ najtil kʼuʼul, ya yichʼik jeltayel jich te bin-utʼil kʼuʼul pakʼal. Pero te jaʼate, atalel ayat atukel sok maʼyuk slajibal te awaʼbilale».
13 Pero, ¿machʼa chʼul-abat te jich albot yuʼun te Diose: «Naklan ta jwaʼel kʼab jaʼto te kʼalal ya kakʼbat te akontratak jich te bin-utʼil skajtajib awok», te xchie?
14 ¿Mabal espirituetikuk ta spisilik te yakik ta spasel chʼul aʼtelil te tikunbilik ta skoltayel te machʼatik ya staik te skolelike?
Notaetik
^ Ta griego: «jaʼ mukʼul naktajibal ya xkʼot awuʼun te Dios».
^ Ta griego: «skʼaxuntayel te ley». Jaʼ te ya yichʼ pʼajel te leyetik yuʼun te Diose.
