Carta ta stojol te Hebreoetik 10:1-39
-
Te chambalametik te ya yichʼ akʼel ta milbil majtaniletik ma xtuunik (1-4)
-
Te Ley jaʼ yaxinal te bintik lek yak ta talel (1)
-
-
Jun-nax buelta la yichʼ akʼel ta milbil majtanil te Cristoe (5-18)
-
Yachʼil be sok te kuxul (19-25)
-
Mame jkom jbatik ta stsobilanel jbatik (24, 25)
-
-
Jultesel oʼtanil ta stojol te machʼa spasemal yoʼtan ya spas mulil (26-31)
-
Ya skʼan ay smukʼul koʼtantik sok schʼuunel koʼtantik yuʼun ya xkujch kuʼuntik (32-39)
10 Melel te Ley jaʼ yaxinal te bintik lek yak ta talele, pero ma jaʼuk te bin smelelil yato xtale, ma xjuʼ* ya xlekubik ta swenta te Ley te machʼatik ya xnoptsajik* ta stojol Dios manchukme ya yakʼik milbil majtaniletik ta jujun jaʼbil.
2 Te jichuke maba kejchajik ta yakʼel milbil majtanil te machʼatik ya spasik chʼul aʼtelil ta skaj te lekubenikix sok maʼyuk bin ya x-albotikix yoʼtanik yuʼun te ay smulike.
3 Pero, ma jichuk kʼot ta pasel, te milbil majtaniletik ini ya sjultesbotik ta koʼtantik ta jujun jaʼbil te jmulawilotike,
4 melel te schʼichʼel te toroetik sok te tentsunetik ma xjuʼ ya slajinbey skʼoplal te mulile.
5 Melel te kʼalal jul ta balumilale, jich la yal: «‹Maba lek la awil te milbil majtaniletik sok te majtaniletik, pero la achajpanbon jbakʼetal.
6 Maba lek la awil te chikʼbil majtaniletik sok te majtaniletik ta swenta te mulile›.
7 Jaʼ yuʼun, jich la kal: ‹Ilawil, talemon ta spasel te skʼanojel awoʼtan, Dios kuʼun (jich te bin-utʼil tsʼibaybil jkʼoplal ta balbil june)›».
8 Jich nail la yal: «Maba la akʼan sok maba lek la awil te majtaniletik, te milbil majtaniletik, te chikʼbil majtaniletik sok te majtaniletik ta swenta te mulile», te jaʼ majtaniletik te ya yichʼ akʼel jich bitʼil ya yal te Leye.
9 Ta patil, jich la yalxan: «Ilawil, talemon ta spasel te skʼanojel awoʼtan». Ya slajin te bin ay ta nailal yuʼun jich ya xjajch te schebale.
10 Ta swenta te jich la skʼan yoʼtane la kichʼtik chʼultesel ta swenta te sbakʼetal te Jesucristoe, te jun-nax buelta la yichʼ akʼel.
11 Jaʼnix jich, spisil te sacerdoteetik ya spasik ta jujun kʼajkʼal te chʼul aʼtelil yichʼojike yuʼun jich bayal buelta ya yakʼik te milbil majtaniletik te kʼayemik ta yakʼel, te maʼyuk bin-ora ya xjuʼ ya slajinbey skʼoplal ta jkʼaxel te mulile.
12 Pero, te winik ini jun-nax buelta ta sbajtelkʼinal la yakʼ milbil majtanil ta swenta te mulile sok la snajkan sba ta swaʼel kʼab te Diose,
13 jaʼto tal-abi yak ta smaliyel te ya yichʼ akʼel te skontratak jich bitʼil skajtajib yok.
14 Melel ta swenta te jun-nax buelta la yakʼ milbil majtanile la slekubtes ta sbajtelkʼinal te machʼatik yakik ta chʼultesele.
15 Jaʼnix jich, te chʼul espiritue* la yakʼ jnaʼtikix ta swenta-abi, melel jich nail la yal:
16 «Te kʼalal ya sta yorail te ya jpas te chapbilkʼop soke —xchi te Jehová—* jaʼ ini. Ya kakʼbey ta yoʼtanik te leyetik kuʼun sok ya jtsʼibaybey ta snopojibal yuʼunik».
17 Jich ya yalxan: «Sok maba ya jultesix ta koʼtan te smulike sok te bintik chopol* la spasike».
18 Jich yuʼun, te kʼalal pasbilikix perdón yuʼun-a te Diose, ma puersaukix te ya yichʼ akʼel majtanil ta swenta te mulile.
19 Jich yuʼun, kermanotak, te bitʼil ayix smukʼul koʼtantik te ya x-ochotik ta sbelal te chʼul awilal ta swenta te schʼichʼel te Jesús
20 —jun yachʼil be sok te kuxul te la sjambotik ochel te cortina, jaʼ te sbakʼetal—
21 sok te ayix mukʼul sacerdote kuʼuntik te swentainoj te sna te Diose,
22 noptsajukotik* ta stojol Dios sok spisil koʼtantik sok ayuk schʼuunel koʼtantik, melel la yichʼix pokel te koʼtantik ta swenta te bin ma lek jpasojtike sok la yichʼ pokel ta lekil jaʼ te jbakʼetaltike.
23 Mame xkijkitaytik ta yalbeyel skʼoplal ta komonsitil te bin yakotik ta smaliyel sok mame xchebetuk koʼtantik, melel te machʼa jamal la yal ini yananix skʼotes ta pasel-a.
24 Talel kʼaxel ayukme skʼoplal ta koʼtantik te yantik yuʼun jich ya jtijbey jba koʼtantik ta yakʼel ta ilel kʼuxul oʼtanil sok ta spasel lekil aʼteliletik,
25 mame jkom jbatik ta stsobilanel jbatik jich te bin-utʼil ay machʼatik kʼayemik ta spasele, jaʼ lekxan te talel kʼaxel ya kakʼbey jba smukʼul koʼtantik kʼaxemtoxan-a te ya kiltik te nopolix* te skʼajkʼalel te Diose.
26 Melel teme spasemal koʼtantik ya jpastik te mulil te kʼalal kʼoemix ta koʼtantik ta lek-a te smelelil kʼope, maʼyukix milbil majtanil te ya stoj te jmultike.
27 Jaʼnax ya smaliyik ichʼel ta kʼop te xiʼbantik sba sok te yilinba Dios te ya slajin te machʼatik ya xkontrainotik yuʼune.
28 Teme ay chaʼtul o oxtul testigoetik te la yilik te ay machʼa la skʼaxuntay te Ley yuʼun Moisés, mame xyichʼ naʼbeyel yoʼbolil sba te kʼalal ya yichʼ milel.
29 ¿Mabal snujpʼuk te ya yichʼxan tulan castigo te machʼa la stsʼoʼ* ta tekʼel te sNichʼan Dios, te maʼyuk skʼoplal ta yoʼtan te chʼichʼ yuʼun te chapbilkʼop te la yichʼ chʼultesel-ae, te la sbolkʼoptay sok te la spʼaj te chʼul espíritu* te jaʼ ya stuuntes te Dios yuʼun ya yakʼbotik kiltik te slekil yoʼtan te ma snujpʼuk ya kichʼtike?
30 Melel ya jnaʼbeytik sba te machʼa jich yaloje: «Joʼonme ya jsutbey spakol; joʼon ya kakʼbey stoj», te xchie. Jaʼnix jich: «Te Jehová* yame yichʼ ta kʼop te lum yuʼune».
31 Xiʼbantik sba teme jaʼ ya xkʼootik ta skʼab te kuxul Diose.
32 Julukme ta awoʼtanik spisil-ora te bin kʼax ta akuxlejalik ta nailal tale, te kʼalal la awichʼik akʼbeyel awilik te sakal kʼinal, kujch awuʼunik te tulan wokolil kʼax ta atojolike.
33 Ay la awichʼik kontrainel sok bolkʼoptayel ta komonsitil, sok ay la ajokinik te machʼatik jich kʼax ta stojolike.
34 Te jaʼexe la awakʼik ta ilel te ya anaʼbeyik yoʼbolil sba te machʼatik ayik ta chukel sok maʼyuk bin la awalik yuʼun te la awichʼik pojbeyel te bintik ay awuʼunike, melel anaʼojik te kʼax lekxan te bin ya xbajt awichʼik sok te maba ya xlaje.
35 Jich yuʼun mame xiwex,* melel yame awichʼik majtantesel.
36 Melel ya skʼan te ya xkujch awuʼunik, yuʼun jich te kʼalal apasojikix-a te skʼanojel yoʼtan te Diose, ya awichʼik te bin jamal yaloje.
37 Melel «jtebxanix ya skʼan» te «ya xjul te machʼa yak ta talele, sok maba ya xjalajix».
38 «Pero, te j-abat kuʼun te toj yoʼtan ya xkuxin ta swenta te schʼuunel yoʼtane», «teme ya sujt ta spate, maba lek koʼtan yuʼun».
39 Te joʼotike ma jichukotik te bin-utʼil machʼatik ya sujtik ta spatik sok te ya yichʼik lajinele, joʼotik te ay schʼuunel koʼtantik te jich ya xkolotik.
Notaetik
^ O jaʼniwan ya skʼan ya yal «te winiketik maʼyuk bin-ora ya xjuʼ yuʼunik».
^ O «xjijtsʼik».
^ Ta griego: «ya skontrain te ley».
^ O «jijtsʼajukotik».
^ O «tijilix».
^ O «spechʼ».
^ Ta griego: «mame xiwex ta kʼop».
