Carta ta stojol te Hebreoetik 13:1-25
13 Spisilukme-ora kʼux ya awaʼiy abaik jich te bin-utʼil kʼux ya yaʼiy sbaik te machʼatik jun-nax smeʼ statike.
2 Mame xchʼay ta awoʼtanik te ya x-otseswanex ta anaike,* melel te kʼalal ay machʼatik jich la spasike, maba la snaʼik te chʼul-abatetik te la yikʼik ochel ta snaike.
3 Julukme ta awoʼtanik te machʼatik chukulik,* jichukme ya awaʼiyik te pajal chukulex soke, sok julukme ta awoʼtanik te machʼatik yakik ta utsʼinel, melel jun-nax bakʼetalil* ayex.
4 Ta apisilik ichʼbilukme ta mukʼ awuʼunik te nujpunele, mame xa akapik ta mulwej* te bitʼil nujpunemexe, melel yame x-ichʼotik ta kʼop yuʼun Dios te machʼatik ya spasik mulwej, te machʼatik ya yaʼiyik antsiwej sok te machʼatik ya yakʼ sbaik ta antsinele.
5 Mame jaʼuk ya xbajt ta awoʼtanik sbikʼtal oʼtantayel takʼin, tseʼelukme awoʼtanik yuʼun te bintik ay awuʼunike. Melel jich yaloj te Dios: «Maʼyuk bin-ora ya kijkitayat sok maʼyuk bin-ora ya jpijtesat».
6 Jaʼ yuʼun, jich ya xjuʼ ya kaltik sok smukʼul koʼtantik: «Jaʼ jkoltaywanej kuʼun te Jehová.* Maba ya xiwon. ¿Bin ya xjuʼ ya spasbon te ants winiketike?».
7 Julukme ta awoʼtanik te machʼatik ya stojobtesexe, te jaʼik te machʼatik yalojbeyex awaʼiy te skʼop Dios, kʼayinbeyaik te schʼuunel yoʼtanik te kʼalal ya awilbeyik te bin lek lokʼem yuʼunik-a ta swenta te stalelike.
8 Te Jesucristo ma xjelon stukel, jichnix ay te bitʼil wojey, yoʼtik sok ta sbajtelkʼinal.
9 Mame xa awakʼ abaik ta loʼlayel yuʼun yantik nojptesel te yan ta aʼiyel-ae, melel jaʼ lekxan-a te ya kakʼbeytik yip te koʼtantik ta swenta te slekil yoʼtan Dios te ma snujpʼuk ya kichʼtik, ma jaʼuk ta swenta te weʼeliletike,* te maʼyuk bin lek ya staik yuʼun-a te machʼatik jaʼnax ya xbajt ta yoʼtanik-abi.
10 Ay jun skajtajib chikʼbil majtanil kuʼuntik te ma xjuʼ ya xweʼik tey-a te machʼatik ya spasik te chʼul aʼtelil ta nailpakʼ,
11 melel te schʼichʼel te chambalametik ya yichʼ ochel te mukʼul sacerdote ta chʼul awilal yuʼun ya yakʼ ta majtanil ta swenta te mulil, yan stukel te sbakʼetal te chambalametike ya yichʼ chikʼel ta fuera yuʼun te campamento.
12 Jaʼ yuʼun, te Jesús kʼax swokol-euk ta fuera yuʼun te stiʼil te lume, yuʼun jich ya schʼultes te lum ta swenta te schʼichʼele.
13 Jaʼ yuʼun akʼa lokʼukotik ta fuera yuʼun te campamento sok kujchuk kuʼuntik te bolkʼoptayel jich te bin-utʼil kujch yuʼune,
14 melel maʼyuk jpam mukʼul lum kuʼuntik liʼi te ma xlaj skʼoplale, jaʼ yakotik ta sleel sok spisil koʼtantik te mukʼul lum te yak ta talele.
15 Ta swenta te Jesús spisil-ora akʼa kakʼtik milbil majtaniletik, jaʼ te yalbeyel yutsil skʼoplal te Diose, te jaʼ ya skʼan ya yal te bin ya xlokʼ ta ketik te ya yalbey skʼoplal ta komonsitil te sbiile.
16 Jaʼnix jich mame xchʼay ta awoʼtanik spasel te bin leke sok ta yakʼbeyel yantik te bintik ay awuʼunike, melel jich kʼoem te bin-utʼil milbil majtaniletik te kʼax lek ya yil te Diose.
17 Chʼuunbeyaik smantal sok akʼa abaik ta wentainel yuʼun te machʼatik ya stojobtesexe, melel yak skanantaybelex sok yame yichʼik ichʼel ta kʼop ta awentaik. Jichme sok stseʼelil yoʼtanik ya spasik te yaʼtelik, mame jaʼuk sok mel-oʼtan, melel teme ya awakʼbeyik smel yoʼtanike, maʼyuk bin lek ya ataik yuʼun.
18 Mame xa akom abaik ta skʼoponel Dios ta jtojoltik, yuʼun schʼuunoj koʼtantik te maʼyuk bin chopol* ya yalbotik te koʼtantike, melel koʼtantikuk te toj spisil te bin ya jpaskotike.
19 Pero, jaʼme xa akʼanbeyikxan Dios te yakuk sujt kilex ta oranax te banti ayexe.
20 Jaʼ yuʼun, te Dios te ya yakʼ lamalkʼinal, te la schaʼkuxajtes ta yolil te machʼatik lajemik te mukʼul jkanantuminchij, jaʼ te Kajwaltik Jesús te la yakʼ schʼichʼel ta swenta te chapbilkʼop yuʼun sbajtelkʼinal,
21 akʼame yakʼbeyex spisil te bin ya xtuun awuʼunik ta swenta spasbeyel te skʼanojel yoʼtan sok te jaʼuk ta swenta te Kajwaltik Jesucristo te ya stijbotik koʼtantik ta spasel te bin lek ya yile. Akʼa yichʼ albeyel yutsil skʼoplal ta sbajtelkʼinal. Jichuk.
22 Jich yuʼun, kermanotak, ya jkʼanbeyex wokol te lamaluk awoʼtanik ya awaʼiyik stojol te kʼopetik ini te ya yakʼ mukʼul oʼtanil, melel maba najt te carta la jtsʼibaybeyex tale.
23 Ya jkʼan te yakuk anaʼik te kolix ta chukel te kermanotik Timoteo. Teme tal ta orae, yame sjokinon bael yuʼun ya xbajt kilexkotik.
24 Akʼbonik spatjibal yoʼtan spisil te machʼatik ya stojobtesex sok spisil te machʼatik chʼultesbilike. Ya stikunbeyex spatjibal awoʼtanik te hermanoetik te ayik ta Italia.
25 Ayukme ta atojolik te slekil yoʼtan Dios te ma snujpʼuk ya kichʼtike.
Notaetik
^ O «yakʼbeyel yil slekil awoʼtanik te machʼatik ma xa anaʼbeyik sbae».
^ Ta griego: «chukulik ta cadena».
^ O jaʼniwan ya skʼan ya yal «te jichuk ya awaʼiyik te pajal ay awokolik soke».
^ Jaʼ ya skʼan ya yal «mantaliletik ta swenta te weʼeliletike».
^ O «ma lek».
