Carta ta stojol te Hebreoetik 4:1-16
4 Jich bitʼil te yato xjuʼ ya x-ochotik te banti ay te kux-oʼtan yuʼun te Dios te jamal yaloje, akʼame jtsajtay* jbatik, mame jaʼuk te ay jtulukex te ma snujpʼuk te ya x-och tey-ae.
2 Melel jaʼnix jich la kichʼtik albeyel-euk te lek yachʼil kʼope, jichnix te bitʼil la yichʼik albeyele, pero maba la sta slekilalik yuʼun te bin la yaʼiyik stojole, melel maba jun schʼuunel yoʼtanik sok te machʼatik la schʼuunik mantale.
3 Pero, te machʼatik kakʼojtik ta ilel schʼuunel koʼtantik ya xjuʼ x-ochotik te banti ay te kux-oʼtan yuʼun te machʼa jich la yale «Jaʼ yuʼun jich jamal la kal sok kilinba: ‹Maba ya x-ochex te banti ay te kux-oʼtan kuʼune›», manchukme juʼemix ta pasel yuʼun-a te yaʼtel jaʼto te kʼalal chiknaj tal te ants winiketike.
4 Melel ay jich ya yal ta sJun Dios ta swenta te sjukebal kʼajkʼal: «Ta sjukebal kʼajkʼal la skux yoʼtan te Dios yuʼun spisil te yaʼtele».
5 Jaʼnix jich la yalxan: «Maba ya x-ochex te banti ay te kux-oʼtan kuʼune».
6 Jich bitʼil te ayto machʼatik ya xjuʼ ya x-ochik tey-ae —te machʼatik nail la yichʼik albeyel te lek yachʼil kʼope maba ochik tey-a ta skaj te la skʼaxuntayik mantal—,
7 la yakʼbey yan skʼajkʼalel bayal tiempo ta patil ta salmo yuʼun David. Te kʼalal la yal «yoʼtik» jich te bitʼil lajeltonax ta albeyel skʼoplale: «Teme ya awaʼiybeyik skʼop yoʼtik, mame tulanuk xa awakʼ te awoʼtanike».
8 Melel te lajuk yichʼik ikʼel bael yuʼun te Josué ta jun lugar yuʼun kux-oʼtanil, maba la yalbey skʼoplal yan kʼajkʼal te Dios te jichuke.
9 Jich yuʼun ayto jun skʼajkʼalel sábado yuʼun ya skux yoʼtan te lum yuʼun te Diose.
10 Melel te winik te ochemix te banti ay te kux-oʼtan yuʼun te Diose jaʼnix skuxojix yoʼtan yuʼun te yaʼtele, jich te bin-utʼil skuxojix yoʼtan te Dios yuʼun te yaʼtele.
11 Jich yuʼun akʼa jpastik tulan yuʼun ya x-ochotik te banti ay te kux-oʼtanil-abi, yuʼun jich maʼyuk machʼa ya skʼaxuntay mantal jich te bin-utʼil la spasik te yantike.
12 Melel kuxul te skʼop te Diose sok ay yuʼel ya x-aʼtej. Kʼaxemtoxan jich ay ye-a te bin-utʼil espada te schaʼjejchel ay yee, ya slow ochel jaʼto te kʼalal ya xchiknaj ta ilel te bin-nix yilel stalel-a te ants winik soknix te bin-nix ay ta skʼubulil yoʼtan-ae, ya slow ochel te banti stsʼaktiklanoj sba te jbakeltik sok te bin ay ta yutil te jbakeltik, jaʼnix jich ya yakʼ ta naʼel te bin ay ta snopojibal kuʼuntik sok te bin ya skʼan te koʼtantike.
13 Maʼyuk junuk te bintik pasbil yuʼun te ma xjuʼ ya yile, melel spisil te bintik aye jamal chikan ta ilel ta sit sok yananix yil stukel-a te machʼa ya kichʼtik ichʼel ta kʼop yuʼune.
14 Jich bitʼil te ayix mukʼul sacerdote kuʼuntik te ochemix ta chʼulchan —jaʼ te Jesús te sNichʼan te Diose—, mame xkijkitaytik ta yalbeyel skʼoplal ta komonsitil.
15 Te mukʼul sacerdote kuʼuntik ma yuʼunuk ma snaʼ yoʼbolil jbatik ta swenta te jmulawilotik, melel te mukʼul sacerdote kuʼuntike la yichʼ akʼel ta prueba ta spisil jich bitʼil te joʼotike, jaʼnax te maʼyuk smul stukele.
16 Jich yuʼun ayukme smukʼul koʼtantik ya xnoptsajotik* ta stojol te smukʼul naktajib te Dios te jaʼ ya yakʼ te slekil yoʼtan te ma snujpʼuk ya kichʼtike, yuʼun jich ya snaʼ yoʼbolil jbatik sok te ya jtatik te slekil yoʼtan te ma snujpʼuk ya kichʼtik ta yorail te ya xtuun kuʼuntik te koltayel yuʼune.
